Kuwamishako Busendwe Bwetu bwa Kusapwila—Kutendeka Mwisambo mu Jishinda Jakonsha Kwitukwasha Kusapwila Bantu

Yesu wasapwijile busapwishi bwa kushukilwa ku mwanamukazhi mwina Samaliya kutendekelapo kumulomba mema a kutoma. Twakonsha kuwamishako byepi busendwe bwetu pa kwisamba na muntu ye twabula kuyuka?

• Kasulukilai bantu ne kwisamba nabo. Nangwa kya kuba wakookele, Yesu wisambile na uno mwanamukazhi kupichila mu kumulomba mema a kutoma. Onkao mambo, mwakonsha kutendekelapo kwimuna muntu ne kwamba byo bwakya jojo juba nangwa kwamba pa bintu byamweka katataka. Yukai’mba kintu kyo mubena kukeba ke kutendeka mwisambo, onkao mambo mwakonsha kwamba pa mutwe yense wakonsha kutemwa muntu ye mwataana. Inge muntu wakana kukumbula, kange mulefulwe ne. Esekai kwisamba na muntu mukwabo. Lombai kwi Yehoba kwimukwasha kuchinchika.—Neh 2:4; By 4:29.

• Sapwilainga mambo awama ponse po mwataana bantu, pano bino kechi kuba lubilo ne. Tendekai mwisambo mu jishinda jisakwimulengela kwisamba na muntu. Inge mwakanjikizha muntu kwambapo, wakonsha kukana kwisamba nenu. Kechi mwafwainwa kuzhingila inge muntu wachibikizha mwisambo saka mukyangye kumusapwila ne. Inge mumvwa moyo pa kuba’mba mutendeke kusapwila mambo awama, pitulukilaingamo jimo mu byo mwakonsha kusapwila muntu. [Tambishai vidyo mutanshi ne kwisambapo.]

• Tendekelaipo kwamba pa bintu byo mwaitabilamo, kuba bino kukalengela muntu ye mubena kwisamba nanji kwimwipuzha. Yesu waambile pa bintu byawama bingi byalengejile mwanamukazhi kumwipuzha mepuzho. Yesu byo atendekele kwamba pa mambo awama, wakumbwilengatu mepuzho aipwizhenga yewa mwanamukazhi. [Tambishai vidyo wa bubiji ne kwisambapo, kabiji mutambishe ne vidyo wa busatu ne kwisambapo.]