Ingilainga na Ngovu mu ‘Kwibabujisha Bantu Mambo’
1, 2. Kika kimusangajika pa mambo a Paulo byoaingijilenga mwingilo wa kusapwila mambo awama, kabiji twakonsha kulonda byepi byoaubile mu ‘kwibabujisha bantu mambo’?
1 Byonka byajinga Yesu ne bakalume bakwabo bakishinka bakukala, mutumwa Paulo naye wajinga musapwishi wa mukoyo wa mambo awama, ‘sa ebabujisha bantu mambo’ nangwa kyakuba bwikalo boajingamo bwajinga bwa byepi nangwa bwa byepi. Nangwatu kimye kyo bamukashijile mu nzubo, ‘wibatambwilanga bonse batwelelenga mo aji, kasa ebasapwila mambo a bufumu bwa Lesa, ne kwi bafunjisha bya mwi Nkambo Yesu Kilishitu, kasa ambatu na kuchinchika konse, ne wa kumukanya ne.’—Byu. 28:16-31.
2 Ne atweba twakonsha kwingilanga na ngovu mu ‘kwibabujisha bantu mambo’ bimye byonse. Kino kyavwangamo ne kusapwila bantu botukatananga pa lwendo lwetu lwa kuya ne kubwela kufuma ku kupwila kwa Nkambi kwa “Pai Lesa Lukumo” ne kimye kyotukekala ku mpunzha kukekela kuno kupwila.—Byu. 28:23; Sala. 145:10-13.
3. Twafwainwa kuba byepi kuba’mba busapwishi bwetu bwa kushukilwa bubulenga kubiwa nobe kintu kyabula kunema?
3 Busapwishi bwa Kushukilwa bo Buka? Busapwishi bwa kushukilwa kechi bubiwatu kwakubula kwinengezha nangwa kwakubula kulangulukapo uba nobe kintutu kyabula kunema ne. Mwingilo wetu kechi byo byoaji ne. Byonka byajinga Paulo, kupa Lesa lukumo kupichila mu kusapwila ke kintu kyanema bingi kotuji. Kabiji uno yewafwainwa kwikala mulanguluko wetu wa kusapwila kuji konse kotukayanga kisalo kino. Jishinda ja iwe mutundu ja kusolomokelamo bakwetu jakonsha kutongolwa’mba ja kushukilwa, mambo jino jishinda jikala ja kwisamba meso anteka. Nsapwilo ya uno mutundu mufuma byawama bingi.
4. Kika kyalengejile Paulo kusapwila ku nzubo ko aikalanga?
4 Inengezhai Kusapwila: Paulo wamonangapo mashinda amo akusapwilamo kimye kyo bamukashijile mu nzubo ku Loma. Waitanga bantangi ba Bayudea ba mu yewa muzhi kwiya ku nzubo yanji. (Byu. 28:17) Nangwa kyakuba mu Loma mwajinga kipwilo kya bena Kilishitu, Paulo wayukile’mba Bayudea ba mu yewa muzhi kechi bayukishe bulongo lwitabilo lwa bena Kilishitu ne. (Byu. 28:22; Loma 1:7) Kechi wakankazhamine ‘kwibabujisha bantu mambo’ a Yesu Kilishitu ne a Bufumu bwa Lesa ne.
5, 6. Mu ñanyi bimye mo twafwainwa kusapwila busapwishi bwa kushukilwa, kabiji lunengezho ka lo twafwainwa kunengezha kuba’mba tusapwile bulongo?
5 Akilangulukaipo pa bantu bonse bo mwakonsha kutana kimye kyo muji pa lwendo babula kuyukisha bulongo biji Bakamonyi bakwa Yehoba. Kechi bakonsha ne kuyuka’mba tufunjisha bantu bakeba lufunjisho lwa Baibolo ne. Labijilai bimye bya kusapwila ku boba bomutana pa lwendo, bomutana pa mpunzha pa kukokolokela, pakubikila maanyi mu motoka, kimye kya kupota bya kupotapota, kimye kyo mubena kwikala mu hotela, pa kuja mu lesitilanti, kimye kyo muji mu motoka, ne ku mapunzhatu akwabo. Langulukilai jimo byo mukamba bya kukatendekelamo mwisambo mukasapwile. Kimye kimo sa kukiji moba kulutwe, mwakonsha kutendekelako jimo kusapwila busapwishi bwa kushukilwa ku bakwenu ba kinkalankulo, balongo benu, bakwenu mo mwingijila, ne bayukanetu kuba’mba mwibijile.
6 Ikalai na mabuku akwingijisha kimye kyo mubena kusapwila busapwishi bwa kushukilwa. Mabuku ka? Mwakonsha kwingijisha talakiti wa Nanchi Mukeba Kuyuka Byavula pa Mambo a Baibolo Nyi? Tongolai mapalagalafu atanshi atanu muji bishinka byapusana pusana bibena kwamba pa ene mambo o twafwainwa kutangilanga Baibolo. Mweshai yewo muntu ka kupashi kaji kunyuma ya ino talakiti ka kulombelapo lufunjisho lwa Baibolo lwa pa nzubo. Umvwe mwatana muntu uji na lusekelo, mupai buloshuwa wa Nanchi Lesa Ukebaka. Na mambo akuba kuji ne bantu bamba milaka ingi, sendai ne kabuku ka Good News for All Nations. Pa peja 2 palondolola bya kwikengijisha pakuba’mba musapwile. Umvwe mubena kwenda na motoka wenu, mwakonsha kusendako mabuku akwabo acheche afwainwa, akupa boba bamwesha lusekelo lwa kine mu mambo a Bufumu.
7, 8. Lujimuno ka lo twafwainwa kumvwina pa mambo a mwekelo ne byubilo byetu kimye kyotuji pa lwendo ne kimye kya kukaya?
7 Monai’mba Mwekelo Yenu ne Byubilo Byenu Biji Bulongo: Twafwainwa kumona kuba’mba byubilo byetu, mvwajilo yetu, ne mwekelo yetu kechi bibena kupana jizhina jatama nangwa kulengela jibumba ja Yehoba ‘kunenwa bibi’ ne. (Byu. 28:22) Kino kechi kyafwainwatu kubiwa kimye kya kupwila kwa nkambi konka ne, kyafwainwa kubiwa ne mu kimye kyo tuji pa lwendo ne kimye kya kukaya. Kyamba kya Usopa kya August 1, 2002, pa peja 30, palagalafu 14, kyajimwine’mba: “Mwekelo yetu kechi yafwainwa kwikala yakuba’mba bammone, nangwa ingitu, yakumwesha byamukachi, ibindankanya muchima nangwa’mba mwane kikulu yefwashonyi waiyamone. Kikwabo twafwainwa kuvwala mvwajilo imwesha amba twi bantu ‘banemeka Lesa.’ Bino ke byambo byotwafwainwa kulangulukangapo, keibyo nenyi? Kechi kuvwalatu bulongo kimye kyotubena kupwila bino panyuma yabyobyo twakavwalamotu bingi-bingitune. Mwekelo yetu yafwainwa kwikala imwesha munema, nemushingi mambo twibena Kilishitu kabiji bantu bamwingilo mute nebufuku.”—1 Timo. 2:9, 10.
8 Twafwainwa kuvwala bulongo na mushingi. Umvwe mwekelo ne byubilo byetu kimye kyonse sa bimwesha lwitabilo lwetu mwi Lesa, kechi tukakankazhama kusapwila busapwishi bwa kushukilwa ne. Bino inge mvwajilo yetu yatama, kiketukatazha.—1 Pe. 3:15.
9. Ñanyi bintu byawama byafumine mu busapwishi bo asapwijilenga Paulo mu Loma?
9 Kusapwila Busapwishi Bwa Kushukilwa Mufuma Byawama: Pa myaka ibiji Paulo yo bamukashijile mu nzubo ku Loma, wamwene bintu byawama byafuminenga mu busapwishi bo asapwijilenga. Luka waambile’mba “bamo baitabile abya bintu byo aambile.” (Byu. 28:24) Paulo aye mwine wamwene buwame bwa ‘kwibabujisha bantu mambo’ byoanembele’mba: “Abya bintu byammwekejile amiwa byaalukile ke bya kwendesha mambo awama; onkao mambo mfungwa yami yaubile ke imweke byo iji ya mwi Kilishitu ku bashilikale bonse ba mu kipango ne ku bantu bonse bakwabo; kabiji ne balongo ba mwi Nkambo, pepi bonse, mfungwa yami ibalengela kukosa, kabiji pano bakila mu kuchinchika kwamba mambo a Lesa na kubula moyo.”—Fili. 1:12-14.
10. Ñanyi bintu byawama byamwene bamulume ne mukazhi bamo kisalo kya mwaka wapwa?
10 Kisalo kya mwaka wapwa, panyuma ya kutanwako juba jimo ku kupwila kwa nkambi, bamulume ne mukazhi bamo basapwijile busapwishi bwa kushukilwa kwi weteleshi wibepwizhe pa mambo a tu mabaji to bavwajile pa kupwila kwa nkambi. Bamubujile kupwila kwa nkambi byo kuji kabiji ne luketekelo lwaambiwapo mu Baibolo pa mambo a kimye kya kulutwe kya bantu. Bamupele talakiti wa Nanchi Mukeba Kuyuka Byavula pa Mambo a Baibolo Nyi? ne kumulumbulwila lunengezho lwa lufunjisho lwa Baibolo lwa pa nzubo byo luji. Uno mwanamukazhi waambile’mba ukeba muntu wakumufunjisha. Kabiji wanembele jizhina ne keyala yanji kunyuma ya kano katalakiti ne kulomba bano bamulume ne mukazhi amba banengezhe bya luno lufunjisho. Ñanyi bintu byawama byo mukamona uno mwaka umvwe mwaingila na ngovu ‘kwibabujisha bantu mambo’?
11. Twafwainwa kuba byepi pakuba’mba tutwale palutwe mambo awama kisalo kino kupichila mu ‘kwibabujisha bantu mambo’?
11 Twalai Mambo Awama Palutwe: Akifwanyikizhai lusekelo lo ajinga nalo Paulo byo aumvwine’mba bena Kilishitu bakwabo baji na kizaku kyoajingapo nakyo! Twayai twibikeko kutwala palutwe mambo awama kupichila mu kusapwila busapwishi bwa kushukilwa mu bintu byo twaitabilamo bya mu Baibolo byonkatu ne atweba byo tukafunda pa kupwila kwa nkambi kwa uno mwaka.
[Kitenguluzha pa peja 3]
Mabuku Akebewa pa Kusapwila Busapwishi bwa Kushukilwa
■ Nanchi Mukeba Kuyuka Byavula pa Mambo a Baibolo Nyi? (talakiti)
■ Nanchi Lesa Ukebaka Kwiatweba? (buloshuwa)
■ Good News for All Nations (kabuku)
■ Mabuku akwabo afwainwa
[Kitenguluzha pa peja 4]
Kwibalubako Ne!
Bañanyi? Aba bonse baji na lusekelo lwakukeba kufunda bukine batainwe ku Kivuluko kya kuvuluka lufu lwa Kilishitu ne ku jashi jiikajila. Abya twibeta’mba bakatanweko ku kupwila kwa nkambi kwa uno mwaka nyi? Bamo inge kyakuba mwibakoseshatu bulongo, bakonsha kwiya na kutanwako. Byo bakambañananga misambo ya kwikosesha pa kupwila kwa nkambi ne majashi akambiwanga akutundaikañana ku mupashi, kikebalengela kufwenya kwipi ne Yehoba ne ku jibumba janji. Nga mambo ka akubula kwibetako ne kumona umvwe bakeya? Babulai byonse bikebewa, moba akekelamo kupwila kwa nkambi, ne byakwenda kuya kukekela kupwila, bimye bikatendekelamo ne kupwilamo bipungu ne kwibabulako pacheche bikambiwangapo mu majashi.