“Kwibabujisha Bulongo”
1. Ñanyi kyakumwenako kyawama kya mu mwingilo Paulo kyo amwesheshe?
1 “Pwisha bulongo mwingilo wobe.” (2 Timo. 4:5) Mutumwa Paulo wabujilenga Timoti bino byambo saka akasuluka. Mambo pakachi ka 47 C.E ne 56 C.E., aye Paulo wapwishishe malwendo asatu a mwingilo wa bumishonale. Buku wa Byubilo bya Batumwa wabwezha bwezhapo kwamba pe Paulo pa “kushimuna bulongo mambo.” (Byu. 23:11; 28:23) Twakonsha kushimuna byepi bulongo mambo ano moba?
2. Twakonsha kushimuna byepi bulongo mambo awama mu mwingilo wa ku nzubo ku nzubo?
2 Ku Nzubo ku Nzubo: Pa kuba’mba tutane bantu pa mazubo bakyangye kumvwapo mambo awama, twafwainwa kwi bafwakesha pa bimye byapusana pusana. Pa kuba’mba tutane mwina nzubo wa mulume, twakonsha kuya na kusapwila pa kimye kyo tubula kuyilapo mu busapwishi. Twafwainwa kwibikako kwisamba na muntu yense pa nzubo ne kubwela bwelako ku boba bo twabujile kutanapo. Kyakonsha kwikala byepi umvwe mukankalwa kutana bantu pa mazubo? Kimo kimye mwakonsha kwingijisha nkalata nangwa foni kwimukwasha kwibatanapo.
3. Bintu ka byakonsha kwitulengela kwingila busapwishi bwa jibumba ne bwa kushukilwa?
3 Busapwishi bwa Jibumba ne bwa Kushukilwa: Ano moba ba kalume ba Yehoba bayukanyikisha “Mana” ku bonse bateleka. Boba bino “mu mikwakwa” nangwa “pa bisankanyi.” (Mana 1:20, 21) Nanchi kimye kyo twingila mingilo ya pa juba pa juba kuba twalangulukapo pa kusapwila ne nyi? Abya twakonsha kwamba’mba ‘twatako bingi muchima ku kusapwila mambo nyi’? (Byu. 18:5) Umvwe byo ibyo, ko kuba’mba tubena kufikizha mwingilo wetu wa “kwibabujisha bulongo.”—Byu. 10:42; 17:17; 20:20, 21, 24.
4. Milombelo ne kulanguluka langulukapo kwakonsha kwitulengela byepi kushimuna bulongo mambo awama?
4 Kimye kimo na mambo a bukoke bwetu nangwa kumvwa bumvu, kwakonsha kwitulengela kukankalwa kusapwila. Bino kwambatu kine, Yehoba wayuka bulongo byo tuji. (Sala. 103:14) Nangwa byonkabyo, umvwe twiumvwa bino, twakonsha kumulomba kwitupa bulume bwa kwamba. (Byu. 4:29, 31) Kabiji kimye kyo tuji pa lufunjisho lwa pa bunke ne kulanguluka languluka pa Mambo a Lesa, twakonsha kumwesha lusanchilo umvwe saka tulanguluka ne pa mwingilo wa kusapwila mambo awama. (Fili. 3:8) Kino kiketulengela kwikala babambakana mu mwingilo!
5. Twakonsha kwivwangamo byepi mu kufika kwa bungauzhi bwa kwa Yoela?
5 Bungauzhi bwa kwa Yoela bwaambijile jimo kuba’mba juba jikatampe ja Yehoba saka jikyangye kufika bantu ba Lesa ‘kechi bakasalañana ne’ kabiji kechi bakaleka kintu kiji kyonse kwibalengela kuleka kusapwila ne. (Yoe. 2:2, 7-9) Twayai twibikisheko kwingila uno mwingilo ukabula kwikalako jibiji!