Nanchi Kimye kya Penshonyi, kyo kya Kwingijilamo Mwingilo na Ngovu Nyi?
1 Bantu bavula bengila na ngovu batonga bingi kuba’mba kimye kya penshonyi kifikenga bukiji ba kakuulweko ku makito o babena kwingila. Bino penshonyi ileta bingi mukose ne kukota bukiji. Kubula byakuba kilengela muntu kwikala na kijikila. Pepala wa byambo wa ku Brazil washimwine’mba bantu batambula penshonyi bapita mu makatazho a ‘kubula lusekelo, kuzhingila zhingila, kwilengulula bene, kulengululwa ku bantu, ne kuba’mba bwikalo bwabo bwatutu.’
2 Kupusanako na bino, bena Kilishitu bavula bamona kino kimye kya penshonyi kwikala ke kimye kya kwingijilamo na ngovu mwingilo wa ku mupashi mu bwikalo bwabo. Mulongo umo watendekele kwingila bupainiya panyuma ya milungu ibiji kufuma kimye kyo afikizhe myaka ya kusemwa 65 waambile’mba: “Mu bwikalo bwami bonse nkyangye kumonapo kala mfweto yavula nobe yo namona mu iye myaka jikumi yonaingila bupainiya ne.” Bamulume ne mukazhi bamo banembele’mba: “Kimye kyetu kine kya lusekelo kyatendekele byo twatendekele bupainiya.” Kine, ku bavula penshonyi ibaletela kimye kya lusekelo kya kwingijilamo na ngovu mwingilo wabo ne kumona mfweto kufuma kwi Yehoba.
3 Payankanai ne Kwingila na Ngovu: Bantu bavula batambula kala penshonyi bakomejile mu kimye kyabujile kwikalako biñambañamba byobabena kwingijisha bantu ano moba bibena kulengela nkito kupela. Abo kufumatu ku bwanyike bwabo bafunjishiwe kwingila ya mukokooko. Nangwa kyakuba pa kino kimye kechi baji na ngovu byonka byobajinga ku bwanyike ne, bino kwingila bengila bingi. Mu kyalo kimo, 22 pesenti ya bapainiya nangwa’mba balongo ne banyenga 20,000 babena kwingila bupainiya, baji na myaka ya kusemwa nobe 60. Bano bakikulumpe babena kwingila bingi na ngovu mu mwingilo wa kusapwila. Bintu byo bapitamo ne byubilo bya Lesa byo baji nabyo bilengela kipwilo kyobajimo kuilako palutwe.—Yako. 3:17, 18.
4 Kupayankana mu mwingilo wa bwina Kilishitu kulengela kwikala na butuntulu bwa mubiji ne bwikalo bwawama. Nyenga wa myaka ya kusemwa 84 watendekele bupainiya kimye kyoatambwile penshonyi waambile’mba: “Kwikala na bantu bavula bakeba kufunda Baibolo kwankwasha bingi kwikala wabambakana. Motoka mfwaye, ñendatu panshi miseke yalepa. Kino kindengela kwikala na butuntulu bwa mubiji bwawama.” Bamulume ne mukazhi bakikote bengila mwingilo wa bupainiya baambile’mba: “Mwingilo ye twingila witulengela kwikala bakosa mubiji ne kubambakana. Twikala pamo kimye kyonse, kusekela pamo ne kwilemena bumi.”
5 Kwingijila ku Mpunzha Kuji Kukajilwa: Bena Kilishitu bamo batambula penshonyi baji na mwakwikwashisha bavilukila ku mapunzha kwabula basapwishi ba Bufumu bavula ne. Bakwabo bengila na ngovu mu mwingilo wabo kupichila mu kwingijila ku mapunzha ko bamba mulaka ungi. Byonka byajinga mutumwa Paulo, bano basapwishi bamukoyo ‘boba byonse na mambo a mambo awama, kuba’mba bekale ke bakwabana na bakwabo bibusa byao.’—1 Ko. 9:23.
6 Bamulume ne mukazhi bamo batendekele bupainiya panyuma ya kukomesha baana babo babalume babiji. Panyuma ya kwingila bupainiya myaka yavula, batendekele kufunda mulaka wa ki Chainizi. Pano byo ke baji mu myaka ya mu ma 70, basangalele bingi pakumona jibumba ja ki Chainizi jo baingilanga najo jaaluka pano ke kipwilo. Ke jishuko bingi kwikala na bantu ba iwe mutundu!
7 Mwingilo wa Bwina Kilishitu Kechi uji na Penshonyi Ne: Nangwa kyakuba bantu bavula mu kupita kwa kimye batambula penshonyi pa mingilo yabo, bino kafwako mwina Kilishitu nangwa umo utambula penshonyi mu mwingilo wa Lesa ne. Bonse bafwainwa kutwajijila kwikala bakishinka kufika “ne ku mpelo.” (Mat. 24:13, 14) Ee bino, bamo na mambo a bukote kechi babena kwingila na ngovu mu mwingilo wa Yehoba byonka byo baingilanga kala ne. Pano bino kikosesha bingi pa kwibamona sabengila papelela bulume bwabo na muchima wabo yense. Byambo bya Lesa bibalaya’mba, Yehoba kechi ukavulama mwingilo wabo ne butemwe bobejimwesha jizhina janji ne.—Luka 21:1-4; Hebe. 6:10.
8 Umvwe kimye kyenu kya penshonyi kekinangijile, langulukaipo na lulombelo byo mukengijisha bulongo akyo kimye kyenu kyo mukalekelamo mingilo. Na bukwasho bwa Lesa, mwakonsha kumona’mba kimye kya penshonyi kyo kimye kya kwingijilamo mwingilo na ngovu uleta lutotelo kwi Yehoba ne kumona mfweto yavula.—Sala. 148:12, 13.