Shukilwaingapo Bimye bya Kusampenyamo Mambo a Bufumu!

1. Tufunjilako ka ku byaubile Davida?

¹ Mfumu Davida kechi waswishishe kiji kyonse kumulengela kubula kwingila mwingilo ne. Kya kumwenako, Davida wakebelenga kushimika nzubo ya Yehoba. Byo bamukainye kuba bino, wapimpwile milanguluko yanji ne kukwashako mwananji aye Solomone kunengezha bya kushimikila nzubo ya Lesa. (1 Mfu. 8:17-19; 1 Moba. 29:3-9) Mu kifulo kya kulangulukanga pa mwingilo ye bamukainye, Davida watele muchima pa mwingilo mukwabo. Twakonsha kulondela byepi kya kumwenako kya kwa Davida byo tulanguluka pa mashinda a kusapwilamo mambo a Bufumu?

2. Mwakonsha kuba byepi pa kuba’mba mwingileko mwingilo?

² Kwingila Papelela Bulume Bwenu: Bavula bapezhako bwikalo pa kuba’mba bengileko bupainiya bwa kukwasha nangwa bwa kimye kyonse. (Mat. 6:22) Nanchi ne anweba mwafwainwa kuba bino nyi? Inge mwalanguluka pa biji bwikalo bwenu ne kulombelapo, mwakonsha kumona amba kuji “kibelo kikatampe kya mwingilo” kimushinkukila. Umvwe byo byo kiji, ingilaiko mwingilo.—1 Ko. 16:8, 9.

3. Inge kechi twakonsha kwingilako bupainiya ne, ñanyi bimye byo twakonsha kwingilako mwingilo wa kusapwila?

³ Kyakonsha kwikala byepi inge bwikalo bwenu kechi bwakonsha kwimuswisha kwingilako bupainiya ne? Mwakonsha kushukilwanga bimye bya kusapwila ku bantu. Kya kumwenako, umvwe mwingila na bantu babula kuyuka Lesa, nanchi kechi mwakonsha kutanapo ka kimye ka kwibasapwila ne nyi? Nangwa inge mukolwa kolwa, nanchi kechi mwakonsha kutanapo kimye kya kusapwila kuba dokotala ne nyi? Vulukai kuba’mba kuji lunengezho lwa kupana sawakya wa mwingilo wa maminiti 15 ku basapwishi babula kukonsha kwingila na mambo a bukote nangwa bikola. Pa kunemba sawakya wa mwingilo, monai kuba’mba mwanemba kimye kyo mwaingijile busapwishi bwa kushukilwa po mwashiile mabuku, kubikapotu ne matalakiti ne tupepala twa kwichilapo bantu ku Kivuluko ne ku kushonkena. Inge ke mube bino, mukamona amba mukekala na maola avula bingi.

4. Mwafuukulapo kuba byepi?

⁴ Kwesakanatu na biji bwikalo bwetu, twayai tushukilwengapo bimye bya kusampenyamo mambo awama. Inge twauba bino, tukekala balusekelo mambo tukayuka amba tubena kwingila papelela bulume bwetu kusapwila pa Bufumu.—Mako 14:8; Luka 21:2-4.