Nanchi Mubena Kwingila na Ngovu Mwingilo Wenu Nyi?
1 Mu buku wa Byubilo, betubula kuba’mba baana babwanga bakwa Yesu baingijilenga mwingilo wabo kasa ‘babujisha’ bantu. (Byu. 2:40; 8:25; 28:23) Akyo kyokyajinga kikonkwanyi kya mutumwa Paulo. (Byu. 20:24) Nanchi nenuwa kechi kyokikonkwanyi kyenu byomuji basapwishi ba mambo awama nenyi? Mwakonsha kwingila byepi nangovu?
2 Nengezhai Mwakwambila: Pakuba’mba musapwile bulongo mumwingilo kyanema bingi kunengezhezha jimo. Byobyo kiji ne pakutambika magazini, mambo amba pamitwe yapusana-pusana. Pakuba’mba kitukwasheko kunengezha bulongo, Mwingilo Wetu wa Bufumu wa uno ñondo uji na kino kibaba kukipiko kwe paji ñambilo imo mwakwambila pakutambika magazini a Kyamba kya Usopa ne Loleni! Pañondo pañondo, mwikalanga kino kibaba pekalanga mitwe ikebula bantu pakwisamba nabo. Pano ino mitwe ipi mwakonsha kwiyamba byepi?
3 Salaipo ñambilo imo yomubena kumona’mba yakonsha kwingila bulongo munyaunda yenu. Tangai bulongo mutwe ubena kwambiwapo, nekumona bishinka byakonsha kutundaika muntu kwikala na lusekelo lwa kukeba kumvwa byavula. Monaimo kinembelo kimo muyoyo magazini kyakwatankana bulongo namwisambo yemukesambapo pakuba’mba mukamutangilekyo mwinanzubo. Pabyobyo byambo byomwanengezha kukesamba namwinanzubo, umvwe kyakonsheka, nengezhezhaipo ne bikwabo bicheche byomukamba pakupezhako byakumutundaika kutanga yoyo magazini nekumulumbulwila’mba naye wakonsha kupanako bupe bwakukwasha mwingilo wa ntanda yonse wa Bakamonyi bakwa Yehoba. Pano, pitulukaimo mu byambo byomwasala kukamba mumone momukebyambila.
4 Inengezhai Kwingijisha Baibolo: Umvwe mwanengezha bulongo, javula mukavwangangamo nekinembelo mu byambo byenu. Kyakumwenako, basapwishi bayuka bulongo mumapunzha avula babena kwingila bingi bulongo pakusolomoka mwinanzubo sabaji na Baibolo mu maboko, kumwimuna ne kwamba nanji’mba:
◼ “Tubena kushikisha bantu umvwe baitabila mu bino byambo ...” Tangai Ntendekelo 1:1, ne kumushikisha’mba: “Nanchi mwaitabila bino byambo nyi?” Umvwe waitaba’mba ee, ambai’mba: “Neamiwa nebitabila. Pano nanchi abya mubena kulanguluka kuba’mba umvwe Lesa yewalengele bintu byonse, yeubena kulengela nebubi bonsebwe nyi?” Panyuma yakumvwa byoakumbula, Tangai Musapwishi 7:29. Zhikulai buku wa Kuyuka pa peja 71, nekutanga palagalafu 2. Mutundaikai kutanga buku. Umvwe mwinanzubo wakana byambo biji pa Ntendekelo 1:1, mukoseshai kutanga buku wa Creation.
5 Bwelaiko ku Bonse Bakeba Kufunda Bukine: Kechi mwakonsha kumwingila bulongo mwingilo umvwe mwakankalwa kubwela kubakeba kufunda bukine ne. Umvwe mwisamba bulongo namuntu, mwamushila ne magazini nangwa buku mukwabotu, nembai jizhina janji nekeyala. Bwelaiko jibiji bukiji-bukiji mukakomeshe lusekelo lwanji. Byomwabwelako jibiji, tatulai nanji lufunjisho lwa Baibolo.
6 Baana babwanga bamu kitota-myaka kitanshi bayukile kuba’mba Yesu wibakambizhe ‘kukamushimuna.’ (Byu. 10:42) Uno mukambizho wetu ne atweba, mambo jojonka jishinda jotulengelamo baana babwanga. (Mat. 28:19, 20) Twayai tumwingile mwingilo wetu nangovu.—2 Timo. 4:5.