Itabishainga Bantu pa Kufunjisha
1. Kwingijisha bulongo Mambo a Lesa mu mwingilo kwavwangamo ka?
1 Bamwingilo bayuka kufunjisha, nabiji mutumwa Paulo, bayuka’mba “[kwambatu] bulongo mambo a bukine” kechi kulumbulula kutangatu Binembelo Byazhila byonka ne. (2 Timo. 2:15) Pa kwingijisha Mambo a Lesa, twakonsha “kwitabisha” byepi bantu pa kwibafunjisha?—Byu. 28:23.
2. Twakonsha kukwasha byepi bantu kunemeka Mambo a Lesa?
2 Ingijishainga Mambo a Lesa: Kishinka kitanshi, pa kufunjisha ingijishainga Baibolo mu jishinda jakonsha kulengela muntu kuyuka’mba maana ajimo afuma kwi Lesa. Kwingijisha kwetu bulongo Mambo a Lesa kwakonsha kulengela muntu kuteshako muchima ku kinembelo kyo mubena kutanga. (Hebe. 4:12) Twakonsha kwa mba’mba: “Nekimona kuba’mba kyawama bingi kuyuka biumvwa Lesa pa kino kintu. Akimonai byaamba Mambo anji.” Po kibena kukebewa, ingijishai Mambo a Lesa kulumbulula kyokyo kintu kupichila mu kwiatanga.
3. Panyuma ya kutanga kinembelo, twakonsha kuba byepi pa kuba’mba tukwashe muntu kumvwisha mo kyatala?
3 Kya bubiji, londololai kinembelo kyo mwatanga. Bantu bavula kibakatazha bingi kumvwisha kyepelo umvwe bekitanga kimye kitanshi. Twafwainwa kulondolola kinembelo byo kyakwatankana na mutwe ye tubena kwisambapo. (Luka 24:26, 27) Ambaitu pa byambo biji mu kinembelo bibena kukosesha kishinka kikatampe kyo mubena kwisambapo. Umvwe mwaipuzha muntu bwipuzho, mukayuka inge waumvwisha kine kishinka kiji mu kinembelo nangwa ne.—Mana. 20:5; Byu. 8:30.
4. Jishinda ka japelako jakonsha kwitulengela kwitabisha bantu pa kwibafunjisha?
4 Ambañanainga pa Binembelo: Kya busatu, esekeshai kufika bantu pa muchima. Kwashai mwina nzubo kumona kyepelo byo kyamukunza. Kwambañana pa Binembelo kwakonsha kwitabisha muntu ne kumulengela kupimpula ndangulukilo yanji. (Byu. 17:2-4; 19:8) Kyakumwenako, panyuma ya kutanga Salamo 83:18, twakonsha kwambañana pa mambo a kuyuka jizhina ja muntu o kwanemena pa kulenga bulunda. Kabiji kampe mwakonsha kwipuzha’mba, “Nanchi mulanguluka’mba kuyuka jizhina ja Lesa kwakonsha kulengela milombelo yenu kuwaminako nyi?” Kukwatankanya kinembelo na bwikalo bwa mwina nzubo mu jino jishinda, kukamukwasha kuyuka mwa kubila na bintu. Kufunjisha kwa kwitabisha bantu kufuma mu Mambo a Lesa mu jino jishinda, kukokela bantu bakishinka ku mpopwelo ya kine ne kwi Lesa mumi, aye Yehoba.—Yele. 10:10.