Byo Twakonsha Kukwasha Bantu Kwitabila
1 Mutumwa Paulo wayukanyikilwe amba wamwingilo ukwasha bantu. (Byu. 19:26) Nangwatu Mfumu Agilipa wamwambijile’mba: “Mu bichechetu ubena kweseka kungitabisha’mba, aluke ke mwina Kilishitu.” (Byu. 26:28) Kika kyalengejile mwingilo wa kwa Paulo kwikala wa kukwasha bantu kuba’mba betabile? Wisambilenga nabo mu Binembelo ne kusala byambo byakonsha kukwasha bamutelekelenga.—Byu. 28:23.
2 Byonka byaubilenga Paulo, ne atweba twakonsha kukwasha bantu kwitabila kimye kyo tuji mu mwingilo wetu. Mu jishinda ka? Kupichila mu kwikala ba maana kimye kyo tubena kwamba ne kuteleka ku bakwetu. (Mana. 16:23) Ano mashinda asatu anema aketukwasha kuba kino.
3 Telekeshai: Telekai bibena kwamba muntu ye mubena kwisamba nanji pa kuba’mba muyuke bya kumukumbula. Umvwe wakana, esekai kuyuka ene mambo o akaina. Kyakonsha kuwama inge mwayuka byo aitabila, ene mambo o aitabila kyo kyo, ne kyamulengejile kushiinwa’mba kine. (Mana. 18:13) Na mushingi isambai nanji pa bintu byo aitabila.
4 Ipuzhai Mepuzho: Umvwe muntu waitabila kuba’mba kuji Balesa Basatu, mwakonsha kwipuzha’mba: “Nanchi kutendekatu ne kala mwaitabila’mba kuji Balesa Basatu nyi?” Kepo mwipuzhe ne kuba’mba: “Nanchi mwakipesa-pesamo bulongo mu byamba Baibolo pa uno mutwe nyi?” Kimo kimye mwakonsha ne kwipuzha’mba: “Umvwe Lesa lubaji lwa Balesa Basatu, nanchi Baibolo kuba itulumbulwila bulongo nenyi?” Byo akemukumbula byo bikemukwasha kuyuka bya kwisamba na yewo muntu pa byamba Binembelo.
5 Isambai Bulongo: Kamonyi umo waipwizhe mwanamukazhi waitabijile’mba Yesu Lesa, amba: ‘Umvwe mukeba kwamba kya kumwenako kya bantu babiji baesakana, ñanyi bulongo bwa mu kisemi bomwakonsha kutongola?’ Wakumbwile’mba: “Nakonsha kwamba’mba nkasa ne kolo.” Kamonyi amba “apo kampe mapasa. Yesu byo afunjishe kuba’mba Lesa ye Tata ne aye mwine’mba Mwaana wikitazhizhe muka?” Uno mwanamukazhi waumvwine kishinka kya kuba’mba umo mwi abo mukulumpe kabiji wakilapo ngovu. (Mat. 20:23; Yoa. 14:28; 20:17) Bino byambo byamufikile pa muchima.
6 Kya kine, nangwa ñambilo yetu ilumbuluke byepi, kechi bonse bakonsha kwitabila bya bukine ne. Bino, byonka byajinga Paulo, twayai tweseke na ngovu kukeba bantu bakishinka mu nyaunda yetu, ne kwibakwasha bomvwe ne kwitabila buluwe bwa Bufumu.—Byu. 19:8.