Bije Byaswishiwa Namuzhilo Byalengwa Katataka

Kyamba kya Usopa kya February 1, 2001, kyalumbulwile jishinda jakwatankanya Bakamonyi bakwa Yehoba jobabena kuyilamo palutwe mumwingilo wa Bufumu panopantanda ponse. Kabiji kyalumbulwile bije byapusana-pusana byaswishiwa na muzhilo byobibena kwingijishiwa mukupeezhako mwingilo wakusampanya mambo awama. Bino bije bikebewa kwikala nabyo kwesakana namizhilo yakuyoyo mpunzha nangwa yakyalo byonka byokyanembwa mu Byambo bya Lesa. (Loma 13:1) Namambo akubaya kwamwingilo wetu nemumapunzha moengijiwa, Jibumba Jitangijila jaitabizha kulengwa kwabije bikwabo byakukwasha mingilo imo ya Bakamonyi bakwa Yehoba mu United States. Bino bije byakatataka ke:

Christian Congregation of Jehovah’s Witnesses

Religious Order of Jehovah’s Witnesses

Kingdom Support Services, Inc.

Bino bije bingijilanga pamo nakije kya Watch Tower Bible and Tract Society of Pennsylvania nekya Watchtower Bible and Tract Society of New York, Inc. Bipwilo ne basapwishi mu United States bakonsha kutambwila makalata kufuma kubino bije. Luno lupimpu lwalengwa na Jibumba Jitangijila mukwingila mwingilo wajo wakulama bintu byonsetu bya Nkambo.—Mat. 24:45-47.