Balemana, Bino Bengila
1 Umvwe nenuwa mwi Bakamonyi balemana ba Yehoba, nangwatu byonkabyo, mwingilo wenu wakonsha kukwasha bantu. Bwikalo bo mujimo bwakonsha ne kwimulengela kwikala na kimye kya kusapwila ne kutundaikilamo bakwenu.
2 Bimye bya Kusapwila: Bavula balemana babena kwingila bingi na ngovu mu mwingilo. Kya kumwenako, nyenga umo washupikiwenga pakwenda ne pakwamba na mambo a opaleshonyi ikatampe, waingilangako mwingilo wa kushajika magazini umvwe mwatawanji waimika motoka kwipi na kunsa ya ka mukwakwa muselakena bantu. Pa kimye kimo washajikile magazini 80 mu maawalatu abiji! Nenuwatu bwikalo bwenu bomujimo bwakonsha kwimulengela kumonañananga na bantu bashupa kumonañana nabo. Umvwe bantu ba uno mutundu ke mumonañane nabo, bobo mwakonsha kusapwilanga.
3 Busapwishi bwenu bwakonsha kukwasha bingi bavula! Umvwe bakwenu ke bemumone byo mubena kwibikako ne kumona byubilo byawama bya bukine bwa mu Baibolo mu bwikalo bwenu, nabo bakonsha kukeba kufunda mambo a Bufumu. Kabiji inge mwatana bantu baji mu makatazho, bwikalo bwenu bo mujimo bwakonsha kwimulengela kwibatekenesha na Byambo bya Lesa.—2 Ko. 1:4.
4 Mwakonsha Kukosesha Bakwenu: Nanchi kechi mwakoseshiwe na jishimikila ja bwikalo bwa kwa Laurel wakelwangatu mu mashinyi amukwashanga kupema bulongo pa myaka 37 bino wakwashishe bantu 17 kufunda maana alumbuluka a bukine bwa mu Baibolo nenyi? Byonkabyo, ne anweba bwikalo bwenu bo mujimo bwakonsha kukosesha bakwenu ba mu lwitabilo kwibikako mu kwingila mwingilo wa Yehoba.—g93 1/22 mape. 18-21.
5 Nangwatu kyakuba bwikalo bwenu bo mujimo bubena kwimulengela kukankalwa kuya mu mwingilo monka mo mukebela, popamotu mwakonsha kukosesha bakwenu. Mulongo umo waambile’mba: “Pano nabayuke namba nangwatu muntu walemana byepi, wakonsha kukwasha bakwabo. Amiwa ne mukazhami twakwasha bingi bavula mu kipwilo. Na mambo a bwikalo bwetu, tutanwapo kimye kyonse.” Bino na mambo a bulema bwenu, ibyo ee kechi kimye kyonse kyo mwakonsha kwingila mwayila kizaku kyenu ne. Bino na bukwasho, mwakonsha kwingilako mwingilo. Onkao mambo, inge mubena kukeba bukwasho, kange mukankazhame kubula bakulumpe nangwa bakwabotu mu kipwilo bakonsha kwimukwasha ne.
6 Yehoba umona byonse byo muba mu ku mwingijila, kabiji usekela bingi mu mwingilo wenu ye mu mwingijila na muchima yense. (Sala. 139:1-4) Byomutwajijila kukinka manungo mwi aye, ukakonsha kwimukosesha kwingila mwingilo walumbuluka.—2 Ko. 12:7-10.