Anweba Bakyanyike—Tangainga Byambo bya Lesa!

¹ Ku bwanyike kyo kimye kishilamo makatazho kabiji kyo kimye kyawama kufuukwilamo bintu byanema. Anweba bakyanyike bavula bena Kilishitu mutanwa mu meseko moba onse a kulala mizhilo ya Lesa ya byubilo byawama. Kimye kyo mwatendeka kwifuukwila anweba bene bya kuba, pa mambo a sukulu, nkito, ne masongola, mwafwainwa kumona’mba mwibikila jimo kikonkwanyi kya bintu bya ku mupashi. Jino jishinda jo jonka jakonsha kwimulengela kufuukula bintu bikakonsha kwimukwasha mu bwikalo bwenu. Kwibikila bikonkwanyi byafwainwa bya ku mupashi kukemukwasha kuba bintu na maana kabiji bwikalo bwenu bukawama. Kupichila mu kutanga ne kulanguluka languluka pa Byambo bya Lesa kimye kyonse, kukemulengela kwikala mwayila lujimuno lwa mu Baibolo, kabiji bintu byawama byo mukeba kuba bikalumbuluka bulongo.—Yosh. 1:8; Sala. 1:2, 3.

² Kukemukwasha Byepi? Ntanda ya kwa Satana yayulwamo na bya bongozhi bilengela kuba bintu byabula kufwainwa. (1 Yoa. 2:15, 16) Mwakonsha kuyuka bamo bo mufunda nabo nangwa boba bo muji nabo jifumbi jimo bapitamo mu ano makatazho na mambo a kukeba kuba byuba bakwabo. Kumvwina lujimuno lwa mu Baibolo kukemupa ngovu ya kuba byubilo byawama bya ku mupashi ne kukana kuya mu jishinda ja bundengamambo. Kunungapotu, lujimuno lwa mu Byambo bya Lesa lwakonsha kwimukwasha kuchinuzhuka tukose twa bujimuku twa kwa Satana. (2 Ko. 2:11; Hebe. 5:14) Kwendanga mu mashinda a Lesa kukemuletela lusekelo lwa kine, ko kuba’mba mukekushiwa mu bwikalo bwenu.—Sala. 119:1, 9, 11.

³ Mafunde a mu Byambo bya Lesa abula kupimpulwa akila maana a bantu. (Sala. 119:98-100) Kuyuka bulongo mafunde a mu Baibolo ne kulanguluka languluka pa nkebelo ya Yehoba yasololwa kubikapo ne lulombelo lwa kufuma panshi ya muchima, kwakonsha kwimukwasha kukosesha bulunda bwenu na Mwine mwina Baibolo wa maana onse, Yehoba Lesa. Aye walaya’mba: ‘Amiwa nkakubula ne kukufunjisha jishinda jo ukayamo: Nkakubulanga maana ne jiso jami saka jikutala.’—Sala. 32:8.

⁴ Monaingapo Kimye kya Kumutanga: Mwanamukazhi umo wakyanyike mwina Kilishitu wibikijile kikonkwanyi kya kutanga Baibolo yense, kabiji wapwishishe kumutanga mu mwaka umo. Kwamukwashishe byepi? Aye uvuluka’mba: “Nafunjile byavula bingi pe Yehoba —bintu byandengejile kufwenya kwipi ne aye kabiji byankwashishe bingi kukeba kumwakamwa mu bumi bwami bonse.” (Yako. 4:8) Nanchi mwapwisha kutanga Baibolo yense nyi? Umvwe mukyangye, mambo ka a kubula kwibikila kikonkwanyi kya kuba kino? Yehoba kine ukemupesha pa kwibikishako kwenu, kabiji mukamwenamo bilambu byavula bingi.