Mutanchi Wa Kupwila Kwa Mwingilo

Mulungu wa Kutendeka April 12

Lwimbo 93

Mamini. 10: Bya kubijika bya pa kipwilo. Bya kubijika byasalululwa mu Mwingilo Wetu wa Bufumu. Kwingijisha mashinda atanshi abiji aji pa peja 8, mweshai bya kushajika Kyamba kya Usopa kya May 1. Mu kimwesho kimo, mweshai jishinda japusanako ja kukumbwilamo bantu bachibikizha mwisambo bamba’mba: ‘Kimye mfwakyo.’—Monai buku wa Ukupelulula, mapeja 19-20.

Mamini. 15: “Kupana kwi Yehoba Bintu Byetu Byawamisha.”a Kimye kyo mubena kwisamba palagalafu 4, ipuzhai luonde kwambapo mashinda amo afwainwa o twakonsha kumwesheshamo butemwe ku bantu kimye kyo tubena kwingila mwingilo wetu.

Mamini. 20: “Kunungako ku Mfungwa ya Tente Wetu.” Kwisamba na luonde. Mapalagalafu 1-7. Kimye kyo mubena kwisamba palagalafu 3, ipuzhai luonde bambepo pa kukoma kwa mwingilo byo kwakwatankana na bungauzhi bwa mu Baibolo.—ip-2 kitango 15, mapalagalafu 8-12.

Lwimbo 91 ne lulombelo lwa kupezhako.

Mulungu wa Kutendeka April 19

Lwimbo 55

Mamini. 8: Bya kubijika bya pa kipwilo.

Mamini. 17: “Ikalai na Muchima wa kwa Yesu.”b Ingijishai mepuzho anembwa. Kimye kyo mubena kwisamba palagalafu 4, ipuzhai boba babena kwingila bupainiya bwa kukwasha bambepo pa mapesho o batanamo mu kwingila uno mwingilo.

Mamini. 20: “Kunungako ku Mfungwa ya Tente Wetu.” Kwisamba na luonde. Mapalagalafu 8-13. Isambai pa lunengezho lwa bantu bepana kufuma mu byalo bingi byo kubena kukwasha bulongo bwetu bwa ntanda yonse. (jv Mapeja 336-9) Lumbululai buwame bwetu bwa kukwasha mwingilo wa ntanda yonse wa bantu ba Lesa.—jv mapeja 341-3.

Lwimbo 80 ne lulombelo lwa kupezhako.

Mulungu wa Kutendeka April 26

Lwimbo 46

Mamini. 12: Bya kubijika bya pa kipwilo. Sawakya wa maakaunti. Vululaiko basapwishi kuleta masawakya a mwingilo wa mu bujimi a April. Tongolai mabuku a kushajika mu May. Kwingijisha mashinda abiji apelako aji pa peja 8, mweshai bya kushajika Kyamba kya Usopa kya May 1. Mu kimwesho kimo, mweshai busapwishi bwa kusapwila ku mukwenu wa ku nkito nangwa wa ku sukulu.

Mamini. 15: Bibena kukebewa pa kipwilo.

Mamini. 18: Nanchi Kupopwela Yehoba Kwitukwasha Byepi mu Bumi Bwetu? Kwisamba na luonde. Mpopwelo ya kine ke kintu kyanema bingi kileta bwikalo bwawama bwa lusekelo. (1) Kwitukwasha byo twakonsha kuba na makatazho ne bya kutabataba bya mu bumi. (Fili. 4:6, 7) (2) Kwitutundaika kwikala na byubilo bimutokesha Lesa pa muchima. (2 Pe. 1:5-8) (3) Kwitukwasha kwingijisha kimye kyetu ne bipe byetu mu jishinda jawama bulongo. (1 Timo. 6:17-19) (4) Kwitupa luketekelo lwa kine lwa bintu bya kulutwe. (2 Pe. 3:13) (5) Kwitulengela kwikala balunda bakine na Yehoba. (Yako. 4:8) Mu kupusanako, bino bintu kechi bibena kumwekana ku bantu babula kumuyuka Yehoba nangwa babula kumwingijila ne.

Lwimbo 38 ne lulombelo lwa kupezhako.

Mulungu wa Kutendeka May 3

Lwimbo 48

Mamini. 10: Bya kubijika bya pa kipwilo. Vululaiko bonse kupana masawakya abo a mwingilo wa mu bujimi.

Mamini. 15: “Anweba bakyanyike—Tangainga Byambo bya Lesa!”c Bujilai jimo wakyanyike umo nangwa babiji bakambepo pa lunengezho lwabo lwa kutanga Baibolo ne kwamba pa buwame bo babena kutana mu kuba kino. Tundaikai bakyanyike kwibikila bikonkwanyi bya kupwisha kutanga Baibolo yense. Ambai ne byambo biji mu buku wa Isukulu lya Butumikishi, pa peja 10, palagalafu 4.

Mamini. 20: Londai byo Bachinchikile mu Kusapwila. Kwisamba na luonde kufuma mu buku wa Popwelai Lesa, mapeja 170-1. Ipuzhai luonde kukumbula mepuzho aipuzhiwa mu palagalafu 7 ne kwingijisha binembelo bijimo pa kukumbula o o mepuzho. Salai binembelo bicheche ne kwibitanga. Lumbululai mafunjisho o tufundamo mu ano mashimikila kabiji ne kumona byo akonsha kwitukwasha kumona bulongo mwingilo wetu wa kusapwila.

Lwimbo 164 ne lulombelo lwa kupezhako.

[Tubyambo twa mushi]