Bifumamo mu Mwingilo Wetu

1. Yehoba umona byepi mwingilo wetu, kabiji bantu bobapo ka?

¹ Mambo a Lesa aamba pa bena Kilishitu byo bashinda mu mwingilo ye bengijila Yehoba. (2 Ko. 2:14-16) Byo tuyukanyikisha maana a Lesa, mwingilo wetu uji nobe bwema bwawama butokesha Yehoba pa muchima. Bantu bamo batambwila mambo awama, bino bakwabo nabo beakana. Pano bino nangwa kya kuba bantu bavula bakana kechi kilumbulula’mba kafwako byawama bifuma mu mwingilo wetu ne. Akilangulukai pa bifumamo mu mwingilo wetu.

2. Mwingilo wetu witulengela kumwesha ka?

² Tumbijikai Yehoba: Satana wamba’mba bantu bengijila Yehoba mambo bakebako bimo kwi aye. (Yoba 1:9-11) Mwingilo wa Bwina Kilishitu witupa jishuko ja kumwesheshamo kuba’mba kwipana kwetu kwi Lesa kwa kine. Basapwishi bavula batwajijila kukokela mukambizho wa kusapwila ne kulenga baana ba bwanga nangwa kya kuba bapita mu makatazho a mu bwikalo, kabiji nangwa bantu bavula bakana. Kuchinchika kwabo mu bukishinka kusangajika muchima wa Yehoba!—Mana. 27:11.

3. Mambo ka o kyanemena kwi atweba kutwajijila kuyukanyikisha jizhina ja Lesa ne nkebelo yanji?

³ Kabiji mwingilo wetu uyukanyikisha bikeba Lesa. Pa mambo a konauna ntanda ya kwa Satana, Yehoba waamba’mba: “Ba mu mikoka ya bantu bakayuka’mba amiwa yami Yehoba.” (Ezi. 39:7) Pa kuba’mba ba mu mikoka ya bantu bayuke kino, kyanema bingi bakalume ba Lesa kutwajijila kwambanga pa jizhina janji ne nkebelo yanji “ku mikoka yonse ne ku bisaka byonse ne ku njimi yonse ne ku mitundu yonse ya bantu.”—Lum. 14:6, 7.

4. Mambo ka mwingilo wa kusapwila kyo bakazhachishilapo bantu?

⁴ Luzhachisho: Kabiji mwingilo wa kusapwila mambo awama bakazhachishilapo bantu. Mutumwa Paulo waambile’mba Yesu Kilishitu ukashinkanya nabo “babula kuyuka Lesa, ne abo babula kukokela mambo awama a Nkambo yetu Yesu.” (2 Tesa. 1:8, 9) Bantu bakebazhachisha kupichila mu byo bobapo pa mambo awama. Bakalume ba Lesa kine baji na mwingilo mukatampe bingi! Pa kuba’mba tubule kwikala na mambo a mashi, kechi twafwainwa kubwela panyuma mu kuyukanyikisha mambo a Bufumu apana bumi ne.—Byubilo 20:26, 27.

5. Lusa lwa Lesa lumwekela byepi mu mwingilo wetu?

⁵ Kutwajijila kwetu kwa na mukoyo wa kukwasha bantu kuba’mba betabilwe kwi Lesa, kumwesha lusa lwa Yehoba. (1 Timo. 2:3, 4) Byo twayuka kuba’mba bwikalo bwa bantu bubena kupimpulwa pa kimye ne kimye, twibendela kimye kyonse ne kwibatundaika kuba’mba bamukebe Yehoba saka kukiji kimye. Kupichila mu kuba kino, tumwesha “lusa lwine lwa Lesa wetu,” ao ‘ubula kusaka nangwa umo konaika ne, poso amba, bonse balapile.’—Luka 1:78; 2 Pe. 3:9.

6. Tumwenamo ka mu kupayankana mu mwingilo wa Yehoba?

⁶ Buwame bo Tumwenamo: Kupayankana mu mwingilo wa Yehoba kwituzhikijila. Kwitukwasha kutwajijila na ‘kusakisha kwiya kwa juba ja Lesa’ kabiji kwitulengela ne kubula kukoweshiwa na buno bwikalo bubi. (2 Pe. 3:11-14; Titu. 2:11, 12) Onkao mambo, twayai tutwajijile kwikala ‘bashikamatu, ne kutelengela ne, kasa tukelwa kwingijisha mwingilo wa Nkambo,’ byo twayuka’mba, mwingilo wetu wa bwina Kilishitu kechi ye watu ne.