Kwikala na Muchima wa Kwipana Kuleta Bibusa
1. Davida ne Nehemiya bamwesheshe byepi muchima wa kwipana?
1 Kimye Goliata kyo anununshishe mazhita a bena Isalela, mushilikale uji yense wakonsheshe kwipana kulwa nanji. Pano bino, kalombwana kafunga, wabujile kufunda bya bulwi, ye wipaine. (1 Sam. 17:32) Kimye Bayudea kyo bafumine mu buzha kubwela ku Yelusalema ne kukankalwa kushimukulula nsakwa, kalume wa mfumu wa bena Pelisha wipaine kuleka kwingijila mu kipango kya mfumu ne kuya wayile ku Yelusalema na kunengezha bya kushimika. (Ne. 2:5) Yehoba wapesheshe bano banabalume babiji, ba Davida ne Nehemiya, na mambo a muchima ye bamwesheshe.—1 Sam. 17:45, 50; Ne. 6:15, 16.
2. Mambo ka bena Kilishitu o bafwainwa kumweshesha muchima wa kwipana?
2 Lelo jino, mu ntanda kafwamo muchima wa kwipana. Mu ano ‘moba a kupelako,’ bantu bapayankana bingi, kabiji bavula ‘betemwatu abo bene.’ (2 Timo. 3:1, 2) Kyapela bingi muntu kulabama na bintu byanji bya ku mubiji kya kuba walubako ne mashuko o aji nao a kukwashishamo bakwabo umvwe babena kukeba bukwasho. Nangwa byonkabyo, byo tuji bena Kilishitu, tukebesha bingi kulonda Yesu, ao witendekejileko mwine kukwasha bakwabo. (Yoa. 5:5-9; 13:12-15; 1 Pe. 2:21) Twakonsha kumwesha byepi muchima wa kwipana, kabiji bibusa ka byo tukamwenamo?
3. Nga muchima wa kwipana ulengela kupwila kwa kipwilo kwikala byepi?
3 Kwingijila Balongo Betu: Twakonsha kupana “kya bupe kya bumupashi” mu bakwetu kupichila mu kwipana kwambapo umvwe alo lubaji lwa kupwila lubena kukebewa luonde kwambapo. (Loma 1:11) Kwambapo kunemeka Yehoba, kulengela kukosesha bukine mu milanguluko ne mu muchima wetu, kabiji kulengela ne kupwila kwikala kwa lusekelo. (Sala. 26:12) Kabiji twakonsha ne kwipana kwamba jashi mu Sukulu ya Mwingilo wa Teokalasi umvwe mwina jashi ufwapo. Kino kikalengela busendwe bwetu bwa kwamba majashi kuyilako palutwe.
4. Mu ñanyi mashinda akwabo mo twakonsha kumwesheshamo muchima wa kwipana?
4 Balongo bakonsha kumwesha muchima wa kwipana kupichila mu kukanamina kwingila mingilo ya mu kipwilo. (Isa. 32:2; 1 Timo. 3:1) Bonsetu bakonsha kukwasha kuba’mba kupwila kukatampe kutwajijile kwenda bulongo kupichila mu kwipana kwingijila mu madipatimenti apusana pusana. Umvwe twipana kwingijila pamo mu mwingilo na mukulumpe wenda nangwa kumunengezhezhapo bya kuja, kifumamo mu kuba kino ke ‘kwikwasha atwe bene na bene.’ (Loma 1:12) Umvwe twakwasha banabanshiwa, banabakazhi bafwilwa, bakolwa ne babelabela, bainetu baji na baana bakikepa, kabiji ne bakwabotu mu kipwilo, twikala ba lusekelo ne kumona bibusa bya Yehoba.—Mana. 19:17; Byubilo 20:35.
5. Mingilo ka yalamata ku Nzubo ya Bufumu ikebewa kwipana?
5 Jishinda jikwabo jo twafwainwa kupainamo kimye kyetu ne ngovu ke kupichila mu kuwamisha ne kulama bulongo Nzubo ya Bufumu. Kunungapo, na mambo a kuba bantu bavula babena kwiya mu bukine, Mazubo a Bufumu akatataka abena kukebewa kabiji ne boba bakonsha kwipana mu kwiashimika. Bamulume ne mukazhi bepaine kukwasha mu mwingilo wa buntungi nangwa kya kuba kechi bayukile bya kushimika ne. Mu kuya kwa moba, bano bamulume ne mukazhi bebafunjishe bya buntungi kabiji lelo jino bayuka bingi kushimika na matafwali. Mukazhi waambile’mba: “Kwingijila pamo na bakwetu kwalengela kwikala na bulunda bwakosa. Ku mpelo ya juba ne juba, tukoka bingi ku mubiji pano bino ku mupashi twiumvwa bakosa.”
6. Mambo ka kusapwila o kwaikela mwingilo wa kwipana wanemesha ye twafwainwa kwingila?
6 Kupichila mu Kusapwila: Mwingilo wanemesha ye twafwainwa kwipana kwingilako lelo jino ke mwingilo wa kusapwila Bufumu. Bantu byo babena kukwashiwa kumvwa ne kwingijisha mafunde a mu Baibolo, bayuka nkebelo ya bwikalo ne kwikala na ngovu ya kushinda byubilo byatama. Bafunda luketekelo lwa mu Baibolo lukoseshañana pa mambo a bintu bya kulutwe. Kupichila mu kufunjisha bantu Baibolo, twingila mwingilo wa kwitemenwa usangajika kabiji uleta mfweto ibula kupwa. (Yoa. 17:3; 1 Timo. 4:16) Kampe bwikalo bwetu bwakonsha kwituswisha kwingilako pakatampe kupichila mu kwingilako bupainiya bwa kukwasha nangwa bwa kimye kyonse, kuya na kwingijila ku mpunzha kuji kukajilwa kukatampe, nangwa kupichila mu kufunda mulaka mukwabo.
7. Mambo ka kwipana kikatakata lelo jino o kwanemena?
7 Mfumu Davida waawile kuba’mba pa kimye Mesiasa po akatendeka bukalama bwanji, bantu ba Lesa “bakelambula saka baswa abo bene.” (Sala. 110:3) Yehoba byo abena kupelawizha kufikizha kunowa kwa ku mupashi, kuji mingilo yavula ayo ibena kukebewa atweba kwipana. (Isa. 60:22) Abya mwaamba kuba’mba: “Amiwa bano! Ntumai amiwa” nyi? (Isa. 6:8) Kya kine, kupichila mu kumwesha muchima wa kwipana, tutokesha Yehoba pa muchima kabiji tumona bibusa byavula.