Buntungi bwa Mazubo a Bufumu—Ke Lubaji Lwanema Bingi lwa Mwingilo Wazhila
1. Mwingilo ka waingijiwa kala mu buntungi bwa Mazubo a Bufumu, pano bino bintu ka bikwabo bibena kukikebewa?
1 Mu myaka itanu yapitapo, Mazubo a Bufumu 1,248 atungwa, kabiji ne akwabo 8 nao awamishiwa mu nyaunda ya musampi wa Zambia. Tubena kusanchila bingi kwingila na ngovu kwa baji mu Mabumba a Bantungi ba Mazubo a Bufumu ne bonse bebakwashisheko. Nangwa kya kuba mwingilo mukatampe waingijiwa kala, kukiji mingilo ikwabo yavula ibena kukebewa kwingijiwa mu buntungi bwa Mazubo a Bufumu. Atweba bonse twakonsha kukwasha byepi mu luno lubaji lwanema lwa mwingilo wetu wazhila wa Yehoba?—Lum. 7:15.
2. Twakonsha kukwasha byepi pakatampe mu mwingilo wa buntungi bwa Mazubo a Bufumu?
2 Ipanainga: Umvwe mwi musapwishi wabatizwa kabiji waimana bulongo, tubena kwimutundaika kwipana kwingilako na balongo baji mu Mabumba a Bantungi ba Mazubo a Bufumu, aji mu nyaunda yenu. (Sala. 110:3) Bonse bakeba kwingilako bafwainwa kwipana na muchima yense ne kwikala na muchima wa kwingijila pamo. (Sala. 133:1; Efi. 4:16) Nangwa kya kuba kechi mujipo na busendwe bumo mu buntungi ne, mwakonsha kukwasha pakatampe mu mwingilo wa buntungi. Mwakonsha ne kufunda busendwe bukakonsha kwimukwasha kwingijishiwa pakatampe kulutwe na lwendo.
3. Mu ñanyi mashinda akwabo mo twakonsha kumwesheshamo bukwasho bwetu mu luno lunengezho?
3 Umvwe kipwilo kiji mu mpunzha yenu kibena kutunga Nzubo ya Bufumu, kabiji mwakankalwa kwipana kwingilako, mwakonsha kumwesha bukwasho bwenu kupichila mu kutundaika bakwenu bakonsha kwingilako. Kupichila mu kunengezhezha jimo, bakulumpe mu kipwilo bakonsha kumona amba kipwilo kibena kusungwa bulongo, kimye balongo bamo kyo babena kutunga Nzubo ya Bufumu. Kwa kubula nangwa kuzhinaukatu ne, Yehoba umvwa bingi bulongo umvwe ke twingijile pamo mu kutwala bintu bya Bufumu palutwe.—Hebe. 13:16.
4. Twakonsha kutundaika byepi aba bepana kwingilako mwingilo wa buntungi bwa Mazubo a Bufumu?
4 Ikalai Batundaikañana: Kutunga bishimikwa mwa kupopwela kutaya kimye kyabaya bingi ne kwingila na ngovu. Kwa kubula nangwa kuzhinaukatu ne, aba bonse baitwa kufuma mu bipwilo bikwabo kwiya na kukwasha kutunga nzubo ya bufumu, kechi bakatanwangapo pa bipwilo byabo bimye bimo ne. Onkao mambo, twafwainwa kwibatakaika ne kwibatundaika bano bamwingilo ba kwitemenwa ba buntungi, bepana kwingila “uno mwingilo.”—Byubilo 6:3; Loma 14:19.
5. Bamwingilo ba kwitemenwa ba buntungi bakonsha kumwesha byepi amba besakanya bintu?
5 Esakanyainga Bintu: Mwingilo wetu mukatampe wa teokalasi ke wa kusapwila Bufumu bwa Lesa. (Mako 13:10) Na mambo a kino, Mabumba a Bantungi ba Mazubo a Bufumu amona kuba’mba atanchika bulongo mutanchi wa buntungi pa kuba’mba bantu ba mu kipwilo bepana kechi babena kupuswako ku kupwila kwa kipwilo nangwa kwingila mwingilo wa kusapwila ne. Mu jishinda jimotu, bamwingilo ba kwitemenwa ba buntungi bamona kuba’mba baesakanya pa kwingila mingilo yabo yavula. Basala mashinda a kumona amba mingilo yabo ya mu kipwilo nayo yaingijiwa bulongo.
6. Kintu ka kifumamo umvwe bantu bonse mu kipwilo bakwatankena pamo mu kukwasha mpopwelo ya kine kuya palutwe?
6 Mutumwa Paulo walumbulwile bantu ba mu kipwilo kuba’mba babena kwingijila pamo mu mutende pa kuba’mba ‘mubiji ayenga na kubaya ne kwikomesha mwine monka mu butemwe.’ (Efi. 4:16) Butemwe bwetu bo twatemwa Yehoba ne mpopwelo ya kine, bwitulengela kwingijila pamo pa kuba’mba mwingilo wa kusapwila mambo awama engijiwe ne kutundaika mwingilo wa buntungi bwa Mazubo a Bufumu.