Endainga Nobe Bantu ba Maana
1 Yesu byo aambijile bantu bana bajinga na mwingilo wa kukwata masabi kuba’mba bekale baana banji ba bwanga, kechi baubile mushina ne, bino ‘ponkapotu . . . bamulondejile.’ (Mat. 4:18-22) Saulo mwina Talasusa byo aalulukile ne kutendeka kumona, naye kechi wakwachile ne ku lusono ne, bino “ponkapotu mu mashinagoga wasapwijilenga mambo a Yesu.” (Byubilo 9:20) Kimye kechi kibwela panyuma ne; umvwe kyapitatu kyapwa kyaya. O ene mambo o kyanemena kwi atweba ‘kwenda nobe bantu ba maana’ pa mambo a byo twingijisha kimye kyetu.—Efi. 5:15, 16.
2 Bintu Bisolomokatu: Mashuko o tuji nao lelo jino a kwingijila Yehoba kechi oo tukakonsha kwikala nao ja kesha ne. (Yako. 4:14) Kafwako ubula kufikilwa na ‘bintu bisolomokatu’ ne. (Sapwi. 9:11) Kunungapo, atweba bonse tubena kukota, kabiji “moba atama” eya na mambo a bukote ne kwitukepeshesha bulume bwa kuba byo twakonsha kwingila mu mwingilo wa Yehoba kuba twianyema mu bino bimye byakatazha ne. (Sapwi. 12:1) Onkao mambo, kechi twafwainwa kuba mushina wa kwipana kwi Lesa nangwa kukipembelela’mba patanshi tukikamonepo kimye kyawama bulongo bino pa tukengilengako pakatampe mu mwingilo wetu ne. (Luka 9:59-62) Abalahama waikajile mutende mu moba a bukote bwanji kabiji “wafwijile mu bukote bwafikila bulongo,” mambo waingijishe bwikalo bwanji bonse kwingijila Yehoba.—Nte. 25:8.
3 Kimye Bekikepesha: Ne atweba tukeba kwingijisha kimye kyetu bulongo mambo “kimye bekikepesha kala.” (1 Ko. 7:29-31) Katatakatu buno bwikalo bukote bukapwe. Mashuko a kwingilako mwingilo wa kupwizha pamo bantu ba bumukooko mu kino kimye kya “kunowa bya panopantanda” akapwa. (Lum. 14:15) Twafwainwa kujimuka bingi na bijikila bya mu bwikalo ne bintu bilabikañana kubula kwitujiila kimye kyo twafwainwa kwingilako mu mwingilo. (Luka 21:34, 35) Byo kiketusangajikangapo pa kukalangulukanga ne kumona’mba twaingijilengako pakatampe bingi mu mwingilo wa kunowa!
4 Twafwainwa kwikala bajimuka kimye kyonse ne kumona’mba kechi twalekelela mashuko a mwingilo uleta lusekelo ne. Twayai atweba bonse tupwishe mu michima yetu kwingijila Yehoba papelela bulume bwetu “pano ponka pa kitelwa’mba ja lelo.” (Hebe. 3:13) Kupichila mu kuba bino tukamwesha’mba twi ba maana, mambo “aye uba kyaswa muchima wa Lesa ukekala myaka ne myaka.”—1 Yoa. 2:17.