Tubulako Bantu pa Mambo a Luketekelo Lwetu lwa Bufumu
1 Mu ano moba apelako akatazha, bantu bavula panopantanda kechi baji na luketekelo ne. (Efi. 2:12) Bakwabo nabo baketekela mu bunonshi bwa ku mubiji, mu bantangi ba bumuntu, mu byasayansi kabiji ne mu bintutu bikwabo. Byo twasangalalapo pa kwikala na luketekelo lwa kine lwa pa mambo a kimye kya kulutwe, luketekelo luji nobe “kimiko kya muchima kya kinetu ne kukosa”!—Hebe. 6:19.
2 Mu bukalama bwa Bufumu bwa Lesa, ino ntanda ikaluka ke paladisa. Batemwe betu bafwa bakasangulwa. (Byubilo 24:15) Buyanji, nshiji, bikola, bukote ne lufu kechi bikekalako jibiji ne. (Sala. 9:18; Mat. 12:20, 21; Lum. 21:3, 4) Ino yo milaye imo ya Yehoba iji pepi kufikizhiwa. Ñanyi kintu kimo pa bintu byo twaketekela kyo mubena kukebesha’mba kikafikizhiwe?
3 Sapwilainga Mambo Awama: Kechi twafwainwa kusungatu luketekelo lwa Bufumu mu michima yetu kwa kubulako kubulako bantu ne. Butemwe bwa kutemwa Lesa ne bakwetu bo bwitulengela kulonda Yesu ne ‘kusapwila mambo awama ku balanda . . . kusapwila mambo a bupokolweshi ku bo bakasa, ne a kumona meso ku bampofu, ne kwibakasulula bo banyantaula.’ (Luka 4:18) Mutumwa Paulo wasapwilanga mambo awama pa bisankanyi ne konse konse ko atananga bantu. Wasumininwe ne kusumininwa na kusapwila. (Byubilo 18:5) Kumwena ku byo asapwilanga na mukoyo mu mwingilo kuketuzhikijila ku “bya kutabataba bya panopantanda, ne bujimbijimbi bwa bunonshi” bwakonsha kukokesha luketekelo lwetu lwa bwina Kilishitu.—Mako 4:19.
4 Luketekelo lwetu lwa Bufumu kechi lukoka umvwe twatana bantu ba milengulwila, babula kuta muchima ku mambo a Bufumu nangwa betwimena kuntundwa ne. ‘Tukwachisha ku kwisolola kwa luketekelo lwetu ne kubula kutelengela.’ (Hebe. 10:23) Kechi ‘twiobila bumvu mambo awama ne.’ (Loma 1:16) Mu kuya kwa kimye, kusumininwa ne mukoyo wetu byakonsha kulengela bantu bamo kuteleka ku mambo awama.
5 Nangwa kya kuba twambako pa kutaminako kwa byubilo bya panopantanda bibena kufikizha bungauzhi bwa mu Baibolo, kechi twibasapwishi ba bya malwa ne. Mwingilo wetu waimena pa luketekelo lwetu lwa Bufumu—mambo o mambo awama a Bufumu bwa Lesa. Twayai tusapwilenga ano mambo awama na kusumininwa ne na mukoyo kuba’mba ‘tulumbulule luketekelo lwetu kufika ne ku mpelo.’—Hebe. 6:11.