Majimi byo Atoka Kala Afwainwa Kunowa
1. Ñanyi mwingilo mukatampe ubena kwingijiwa?
1 Yesu byo apwishishe kusapwila mwanamukazhi mwina Samaliya, waambijile baana banji ba bwanga amba: “Inunai meso enu ne kumona majimi, byo atoka kala afwainwa kunowa.” (Yoa. 4:35, 36) Mwingilo wa kunowa saka atendeka kala, Yesu wayukile’mba uno mwingilo ukengijiwa ntanda yonse. Nangwa kya kuba luno uji mwiulu, Yesu watako bingi muchima ku uno mwingilo wa kunowa. (Mat. 28:19, 20) Twayuka byepi kuba’mba uno mwingilo ubena kubailako byo tubena kunangijila ku mpelo?
2. Twayuka byepi kuba’mba mwingilo wa kunowa mu ntanda yonse ubena kubailako?
2 Mwingilo wa Kunowa mu Ntanda Yonse: Mu mwaka wa mwingilo wa 2009 kibelengelo kya basapwishi kyaijileko bingi palutwe. Nangwatu mu byalo mo bakanya mwingilo wa kusapwila namo bavujilako. Kibelengelo kya mafunjisho a Baibolo pa ñondo pa ñondo kyabayile kukila pa 7,619,000. Kino kibelengelo kyabayile kukila kya basapwishi bonse kabiji kyakijile kya mafunjisho a Baibolo a mu mwaka wafumineko. Uno mwingilo byo abena kubailako, mu mapunzha avula babena kukeba bamishonale. Bantu bekala mu byalo bingi bo basapwila mu mulaka wabo bavula babena kutambwila bukine. Kyamwekeshatu patoka kuba’mba Yehoba ye ubena kulengela uno mwingilo wa kunowa kumwingila bukiji byo abena kunangijila ku mpelo. (Isa. 60:22) Nanchi mumvwa bulongo kwingila mu nyaunda yenu nyi?
3. Bamo bakonsha kulanguluka’mba ka pa mwingilo wa kunowa mu nyaunda yabo?
3 Mwingilo wa Kunowa mu Nyaunda Yenu: Bamo bakonsha kwamba’mba: “Bantu ba mu nyaunda kuno kwetu kechi batako muchima ne.” Kya kine mu manyaunda amo bantu bakana, nangwa kuleka kutako muchima. Bakamonyi bamo bakonsha kutendeka kulanguluka’mba mwashalatu bamilengulwila, mwingilo washalako pano ke wa kupupula. Nanchi byobyo kiji nyi?
4. Ñanyi mweno yawama ya mwingilo wetu yo twafwainwa kwikala nayo kabiji mambo ka?
4 Mwingilo wa kunowa kechi wa kwingila na mukose ne, ke kimye kya kuteshako muchima. Akiumvwai byaambile Yesu bimwesha’mba wafwainwa kumwingila bukiji, waambile’mba: “Bujimi bwa kunowa bwabayisha kine, pa kuba ba kunowabo bakepa. Byonkabyo lombai ku Mwina bujimi atume bantu ba kunowa mu bujimi bwanji.” (Mat. 9:37, 38) Yehoba, Mwina bujimi, ye wayuka kimye kya kunowelamo ne mpunzha. (Yoa. 6:44; 1 Ko. 3:6-8) Nanchi mwingilo wetu ye wepi? Baibolo wakumbula’mba: “Kusai nkunwa yenu lukelo, kabiji mabanga nao kechi muvunge kuboko kwenu ne.” (Sapwi. 11:4-6) Ibyo, inge muji pepi na kupwisha kunowa kechi kyo kimye kya kwingila na mulele ne!
5. Mambo ka o twafwainwa kutwajijila kusapwila na kizaku mu nyaunda mo babula kutako muchima?
5 Kange Muleke Kunowa Ne: Tuji na bishinka bya kwitulengela kutwajijila kwingila na kizaku nangwa kya kuba mu nyaunda baingijilamo javula ne bantu kechi batako muchima ne. (2 Timo. 4:2) Bintu byatama bimweka mu ntanda bilengela bantu kupimpula byubilo ne kulangulukapo bulongo pa bikamweka kulutwe. Bakyanyike inge bakoma, bakonsha kutendeka kukeba kwikala ku matwi nzoo. Bantu bamo bamona mukoyo ye tuji nanji bakonsha kwalula milanguluko yabo. Bantu bakananga patanshi bakonsha kuswa mukuya kwa moba. Nangwa boba bakainamotu kya nshiji nabo twafwainwa kwibasopesha.—Ezi. 2:4, 5; 3:19.
6. Inge nyaunda yetu yakatazha, ki ka kyakonsha kwitukwasha kutwajijila kwingila na kizaku?
6 Inge nyaunda yetu yakatazha, ki ka kyakonsha kwitukwasha kutwajijila kwingila na kizaku? Inge busapwishi bwa ku nzubo ku nzubo bwakatazha, twakonsha kumonapo mashinda akwabo, nabiji kuya ku mapunzha a busulu nangwa bwa pa foni. Nangwa twakonsha kwalula alulanga mashinda a kwibasolomokelamo. Twakonsha kwalula mutanchi wetu nabiji kwingilangako mu kimye kya mabanga nangwa pa bimye bikwabo bitanwa bantu pa mazubo. Kimo kimye twakonsha kutendeka kufunda mulaka ungi pa kuba’mba tusapwilenga mambo awama ku bantu bavula. Twakonsha ne kutendeka bupainiya bwa kimye kyonse pa kuba’mba twingileko pakatampe mu mwingilo. Nangwa kuya ku mpunzha kwakepa ba mwingilo wa kunowa. Inge twatemwa mwingilo wa kunowa, tukebikako kwingila pakatampe mu uno mwingilo wanema.
7. Uno mwingilo wa kunowa ukatwajijila kufika kimye ka?
7 Banjimi kechi bekala na kimye kyabaya kya kunowa ne. Onkao mambo, kechi bengila na mulele ne, kanatu bapwisha. Uno mwingilo wa Lesa wa kunowa naye ukebewa kutapo muchima. Nga mwingilo wa kunowa ukatwajijila kufika kimye ka? Ukatwajijila “kufika ku juba jikapelako.” (Mat. 24:14; 28:20) Byonkatu biji aye mwine Musapwishi wayukisha wa kwa Yehoba, netuwa twibikeko tupwishe mwingilo ye betupa. (Yoa. 4:34; 17:4) Twayai tutwajijile kutemwa uno mwingilo ne kumwingila na kizaku ne na lusekelo kufika ne ku mpelo. (Mat. 24:13) Mwingilo wa kunowa kechi wapwa ne.
[Mabulañano pa peja 2]
Mwingilo wa kunowa kechi wa kwingila na mukose ne, ke kimye kya kuteshako muchima