Mwakonsha Kwikala Banonshi!
1. Mambo ka o mwafwainwa kwingijilako mwingilo wa bupainiya bwa kimye kyonse?
1 Nanchi mukeba kwikala balusekelo mu bwikalo bwenu nyi? Nanchi mumwenamo lusekelo mu kukwasha bantu nyi? Abya mukeba kwingilangako pakatampe mu mwingilo wenu kwi Yehoba? Umvwe mwakumbula’mba ee ku ano mepuzho onse, ko kuba’mba mwakonsha kwingilako bupainiya bwa kimye kyonse. Saka mukyangye kunembesha, mwafwainwa kulangulukapo pa mitembo ya kisemi ne ikwabotu ya mu Binembelo kubikapo ne butuntulu bwenu bwa mubiji.
2. Tongolaipo bunonshi bumo bwa ku mupashi bapainiya ba kimye kyonse bo baji nabo.
2 Byambo byanembele Solomone na lutangijilo lwa mupashi wazhila byaesakanya mapesho a Yehoba ku bunonshi bwa ku mubiji. (Mana. 10:22) Mu ano moba, mapesho a Yehoba alengela kikatakata kwikala banonshi ba ku mupashi. Ano mapesho aubatu mbwee ku bapainiya ba kimye kyonse. Kya kumwenako, bamwenamo lusekelo lukatampe bingi lufuma mu kupana byo ‘bapulushako kimye’ ku bintu byabo byo bafwainwa kuba. (Kolo. 4:5; Byubilo 20:35) Yehoba umona mingilo yabo ya butemwe kabiji wibasanchila bingi. Ino “nsabo ya mwiulu” kechi ikapwa bulume ne. (Mat. 6:20; Hebe. 6:10) Kabiji bapainiya byo bekala na ‘jiso jijitu’ ne kuketekela mwi Yehoba kwibapa bintu bikebewa, bulunda bwabo ne aye bukosa bingi.—Mat. 6:22, 25, 32; Hebe. 13:5, 6.
3. Lupusano ka luji pakachi ka kukeba bunonshi bwa ku mupashi ne bwa ku mubiji?
3 Bunonshi bwa ku mubiji javula bulengela muntu kuponena “mu bya lwiso bya kukosama ne bya kwiipaya.” (1 Timo. 6:9, 10; Yako. 5:1-3) Kino kechi byobyo kiji ku mapesho a Yehoba ne. Byo kiji kuba’mba bapainiya ba kimye kyonse bengila kimye kikatampe mu mwingilo wa busapwishi, kibakwasha kutesha muchima pa bintu byanemesha. (Fili. 1:10) Mulongo umo walekele nkito ya bumakanyika yamujilanga kimye kuba’mba engileko bupainiya. Waambile’mba: “Nkito ya ku mubiji yandetelanga bingi kijikila. Bino mwingilo wa bupainiya kechi byobyo aji ne. Pano luno mbena kukwasha bantu ne kwibafunjisha bukine. Uno mwingilo ubena kunsangajika bingi ne kundetela lusekelo lukatampe byo mbena kukwasha bantu kutambula bukine.”
4. Bapainiya ba kimye kyonse bamwenamo byepi pa kukwasha bantu?
4 Kukwasha Bantu: Lelo jino, bantu bonse baji mu “bimye byakatazha.” (2 Timo. 3:1) Bantu konse konse baakamwa. Bakataya mbila ya Bufumu basekela bingi umvwe bakwasha muntu wapelelwa wafunda ne kutambwila mambo awama. Bapainiya ba kimye kyonse bekala bingi na lusekelo mambo pa mwaka pa mwaka bengila maawala kukila pa 800 mu uno mwingilo wa kupulusha bantu!—1 Timo. 4:16.
5, 6. Ki ka kyakonsha kwimukwasha kwikala bapainiya ba kimye kyonse?
5 Abya mulangulukapo kwingilako bupainiya bwa kimye kyonse nyi? Kikebewa ‘kupulushako bimye’ ku bintu byabula kunema pa kuba’mba mwingileko bupainiya. (Efi. 5:15, 16) Bavula byobyo bauba kabiji ne kupezhako bwikalo bwabo kuba’mba kimye kikatampe kyo bafwainwa kwingijilamo nkito ya ku mubiji, bekingijishenga ku bintu bya Bufumu. Nanchi mwakonsha kwinengezha bulongo kuba’mba ne anweba mwikale bapainiya nyi?
6 Lombai maana kwi Yehoba kuba’mba munengezhe bulongo bintu. (Yako. 1:5) Mfweto ka yo mwakonsha kumwenamo? Mukekala na bunonshi bwavula bwa ku mupashi! Kabiji Yehoba ukemupa bintu bikebewa ku mubiji. (Mat. 6:33) Aba bonse babena kumutompa Yehoba mu jino jishinda bakatambula ‘bibusa, kya kuba’mba kechi bakamona ne mwa kwibilonga ne.’—Mala. 3:10.