Mwingilo Wetu Umwesha byo Twatemwa Lesa
1. Kutemwa Lesa kwalengejile Yesu kuba ka?
1 Butemwe bwalengejile Yesu kwingila mwingilo wanji. Lubaji lonse lwa mwingilo wa kwa Yesu lwamwesheshenga byo atemwa Yehoba. Yesu waambile’mba: “Pakuba amiwa nguba byonka byankambizha Batata namba, ba panopantanda bayuke byo nebatemwa Batata.” (Yoa. 14:31) Byo tuji bakulonda mu ngayo ya kwa Yesu, netuwa tuji na jishuko ja kumwesha byo twatemwa Lesa mu mwingilo wetu.—Mat. 22:37; Efi. 5:1, 2.
2. Butemwe bwetu pe Yehoba bwakunza byepi mwingilo wetu?
2 “Jizhina Jenu Jizhile”: Umvwe ketushukilwe bimye bya kubulako bantu pa mambo a Yehoba ne Bufumu bwanji, tumwesha byo twamutemwa kabiji mu kuba bino tuzhijika jizhina janji. (Sala. 83:18; Ezi. 36:23; Mat. 6:9) Byonka byajinga mwingilo wa kwa Yesu, ne atweba tumwesha kuba’mba tukeba jizhina ja Yehoba kuzhila ne kyaswa muchima wanji kubiwa kupichila mu mwingilo wetu.—Mat. 26:39.
3. Butemwe bwetu pe Yehoba bwitukwasha byepi kushinda mikiika?
3 Butemwe Bwitulengela Kushinda Mikiika: Butemwe bwa kutemwa Lesa bushinda mikiika yonse. (1 Ko. 13:4, 7) Yesu wapichile mu bintu byavula byakonsheshe kumulengela kuleka mwingilo wanji. Pano bino butemwe bwanji bukatampe ne kusaka kuba kyaswa muchima wa Yehoba byamukwashanga kushinda makatazho. (Mako 3:21; 1 Pe. 2:18-23) Netuwa butemwe bwa kutemwa Lesa bwakonsha kwitukwasha kushinda makatazho. Umvwe ketulondele byaubanga Kilishitu, tukekala na luketekelo lwakosa ne kukebesha kwingila mwingilo wetu. Nangwa kya kuba kukolwa kolwa, bukote ne kulengululwa ku ba mu kisemi ne ku bantutu, byakonsha kwitulengela kumvwa bibi, kechi bitulekesha kumwesha butemwe bwetu pe Yehoba kupichila mu kwingila mwingilo wetu bulongo ne.
4. Butemwe bwetu bwa kutemwa Yehoba bwitulengela kuba ka?
4 Butemwe buji bingi na bulume, kabiji twatokwa bingi byo tuji na buno bulume bwa kumwesha byo twamutemwa Lesa na muchima yense mu mwingilo wetu. (1 Ko. 13:13) Byo tubena kunangijila ku kimye kikazhijikilwamo jizhina ja Yehoba kikupu, twayai atweba bonse ‘butemwe bwetu buyengatu na kuvula.’—Fili. 1:9; Mat. 22:36-38.