Yukishai Bulongo Baibolo
1. Mambo ka Baibolo o anemena?
1 Kuyukisha bulongo Mambo a Lesa kwitulengela kusapwila ne kufunjisha bulongo bukine, kabiji ne kusolola mafunjisho a bubela ne bisho bya bantu.—2 Timo. 2:15; 1 Pe. 3:15.
2. Ki ka kyakonsha kwimukwasha kutana bukiji binembelo?
2 Mwibijilai Bulongo: Byonka byo kiji pa kwingijisha kintu, busendwe bwiya inge wikibijila. Kutanga Baibolo yense kukemulengela kuyuka kishina kijimo. Kabiji kikemukwasha kuvuluka binembelo ne kwibitana bukiji. Umvwe mwayukisha bulongo Binembelo, mukakonsha kwamba na kizaku ne kusumininwa pa kusapwila bantu kya kushukilwa nangwa mu mwingilo wa mu bujimi.—1 Tesa. 1:5.
3, 4. (a) Ñanyi mashinda amo akonsha kwitulengela kwibijila Baibolo? (b) Abya mwaingijishapo kala mashinda akwabo a kwimukwasha kuyuka Binembelo nyi?
3 Pa kimye kya kupwila, kasa mutangila Baibolo wenu pamo na ñambi kinembelo kyoatongola. Pa lufunjisho lwa pa bunke ne pa kunengezha kupwila, tangainga Binembelo bijimo ne kulangulukapo pa byo mwafwainwa kwibingijisha. Bavula bekitana kuba’mba kutanga binembelo mu Baibolo kwawama mambo kwibalengela kulabijila po biji kukila kwibitangila pa kompyuta nangwa pa kipepalatu kyo bakopolola.—Yoa. 14:26.
4 Bisemi bimo byanengezha kimye kya kwisambilamo Binembelo kuba’mba bebilabijilenga. Boba bino kupichila mu kunemba kinembelo pa kipepala apa bino mu bushiya bwakyo banembamo bine byambo bya kyokyo kinembelo. Bapimpuzhana bino bipepala kuba’mba bamone inge bakonsha kwamba byambo biji pa kyokyo kinembelo nangwa kuvuluka kinembelo paji byobyo byambo. Kabiji kupitulukilamo jimo mu bya kuya na kwamba mu bujimi ne kukumbula bwipuzho nangwa kukwasha muntu uji na luzhinauko kwingijisha Baibolo, kwakonsha kwitulengela kuyuka binembelo.
5. Mambo ka o twafwainwa kuyukisha bulongo Baibolo?
5 Kafwako buku mukwabo waesakana na Baibolo ne. Mambo ye yenkatu uji na binembelo byakonsha kulengela bantu kwikala na “mana a kumona lupulukilo.” (2 Timo. 3:15) Byo kiji kuba’mba bantu mu nyaunda yetu kechi bayuka bukine bwa mu Baibolo ne, twafwainwa kumuyukisha bulongo kuba’mba twibabulenga byo aamba.—Mana. 2:1-5.