Lubaji 3: Kwingijisha Bulongo Binembelo
Kufunjishanga Mafunjisho a Baibolo Anunguluka
1. Mambo ka o twafwainwa kwambishapo pa Binembelo kimye kyo tubena kufunjisha mafunjisho a Baibolo?
1 Nkebelo yetu ya kufunjishanga mafunjisho a Baibolo ke ‘kulenga baana ba bwanga’ kupichila mu kukwasha bantu kumvwisha ne kwitaba mafunjisho a Byambo bya Lesa ne kwibingijisha mu bwikalo bwabo. (Mat. 28:19, 20; 1 Tesa. 2:13) Onkao mambo, lufunjisho lwafwainwa kwimena pa Binembelo. Patanshi, kyakonsha kuwama kumwesha bobo babena kufunda bya kutana binembelo mu Baibolo wabo. Pano nga twakonsha kwingijisha byepi Binembelo kukwasha bano bantu kuba’mba banunguluke ku mupashi?
2. Tusala byepi binembelo bya mu Baibolo byo twafwainwa kutanga ne kwisambapo?
2 Salai Binembelo bya Kutanga: Kimye kyo mubena kunengezha, monai kinembelo kimo kimo kiji mu lolo lufunjisho byo kyakwatankana na kishinka kibena kwambiwapo, ne kusalapo byo mukatanga ne kwisambapo kimye kya lufunjisho. Kyawama kutanga byobyo binembelo bimwesha mafunjisho etu aimena pa Binembelo. Binembelo byaambakotu pacheche pa byo mubena kufunda kechi byafwainwa kutangiwa ne. Monai kukajilwa ne bwikalo bwa muntu umo umo ye mufunjisha.
3. Buwame ka buji mu kwingijisha mepuzho, kabiji twakonsha kuba byepi kino?
3 Ingijishai Mepuzho: Mu kifulo kya kulondolwela ye mubena kufunjisha binembelo bya mu Baibolo, lekai aye yenka emulondolwelebyo. Mwakonsha kumulengela’mba alondolole kupichila mu kwipuzha bulongo mepuzho. Umvwe kinembelo kyaumvwanyika, mwakonshatu kumwipuzha kyokyo kinembelo byo kyakwasha kishinka kyaambiwapo mu palagalafu. Bimye bimo, kyawama kwipuzha jipuzho jimo nangwa akwabo kuba’mba mukwashe yewo muntu kuba’mba omvwishe. Umvwe mukeba kwambapo byambo bikwabo, kyawama kwibyamba panyuma ya kuba awo muntu wakumbula.
4. Twafwainwa kulondolola byepi binembelo byo tutanga?
4 Kulondolwesha Ne: Muntu wayuka kutaya miketo wingijishatu muketo umo kwasa pa kintu. Po pamotu, mufunjishi wayuka kechi ukebewa kwamba byambo byavula pa kuba’mba kishinka kyumvwanyike ne. Wafwainwa kwamba byambo byapela, byaumvwanyika, kabiji byaluñama. Bimye bimo, mwakonsha kukebakeba mu mabuku a bwina Kilishitu kuba’mba mumvwishe mwatala kinembelo ne kwikilondolola bulongo. (2 Timo. 2:15) Pano bino monai’mba kechi mwalondolola byambo byonse biji mu kinembelo mu lolo lufunjisho ne. Ambaitu byambo byakonsha kukwasha kishinka kibena kwambiwapo kuba’mba kyumvwanyike.
5, 6. Twakonsha kukwasha byepi bo tufunjisha kuba’mba bengijishenga Byambo bya Lesa mu bwikalo bwabo, pano twafwainwa kuchinuzhuka ka?
5 Lumbululai Bulongo mo Kyatala: Umvwe kyafwainwa, kwashai yewo ye mufunjisha kumona binembelo bya mu Baibolo byo byakonsha kumukwasha. Kya kumwenako, umvwe ke mwisambe Bahebelu 10:24, 25 na ye mufunjisha ukyangye kutendeka kutanwa ku kupwila kwa bwina Kilishitu, mwakonsha kwisambapo nanji kupwila kumo byo kubiwa ne kumubula amba akatanweko. Bino kechi mwafwainwa kumukanjikizha ne. Lekai Byambo bya Lesa bimutundaike kubapo kimo kuba’mba atokeshe Yehoba ku muchima.—Hebe. 4:12.
6 Byo twingila mwingilo ye twapewa wa kulenga baana ba bwanga, twayai ‘tukokelenga lwitabilo’ kupichila mu kwingijisha bulongo Binembelo.—Loma 16:26.