Mwingilo Wanema
1. Kwipana kwetu mu mwingilo kuketulengela kuba ka?
1 Mambo ka o betutundaikila kwingijisha kimye, bulume, ne nsabo yetu mu mwingilo? Mambo uno mwingilo wanema bingi! Kulanguluka pa bintu byavula bifumamo kwitulengela kwingila pabaya mu uno mwingilo ukabula kubwelapo jibiji.—Byu. 20:24.
2. Busapwishi bwetu bukwasha byepi kuzhijika jizhina jikatampe ja Yehoba?
2 Uzhijika Jizhina ja Yehoba: Busapwishi bwamba pa Bufumu bwa Yehoba bulamwa na Kilishitu Yesu kuba’mba bukapinga pa makafulumende ne kupwisha makatazho onse apitamo bantu. (Mat. 6:9, 10) Yehoba watumbalala mambo ye yenkatu uketwamuna ku bikola ne lufu. (Isa. 25:8; 33:24) Byo tutelwa pa jizhina janji, aba bamona byubilo byetu byawama ne kizaku kyo tuji nakyo nabo bakonsha kumutumbijika. (1 Pe. 2:12) Byo kituwaminapo kuyukanyikisha mwaya ntanda jizhina ja Nkambo Yehoba!—Sala. 83:18.
3. Ñanyi mapesho ekala na boba bomvwa mambo a Bufumu?
3 Upulusha Bantu: Yehoba kechi ‘usaka nangwa umo onaike ne, poso amba, bonse balapile.’ (2 Pe. 3:9) Bino kwakubula wa kwibafunjisha, bantu bakonsha kufunda byepi byubilo byo atemwa Yehoba ne byo ashikwa? (Yona 4:11; Loma 10:13-15) Umvwe bantu baumvwa mambo awama, baleka byubilo byatama ne bwikalo bwabo buwama. (Mika 4:1-4) Kabiji bekala na luketekelo lwa kukekala na bumi bwa myaka ne myaka. Kusapwila ne kufunjisha kuketupulusha atweba bene ne betumvwa. (1 Timo. 4:16) Kyawama bingi kwingilako uno mwingilo wanema!
4. Mambo ka o twafwainwa kwingilako uno mwingilo wa Bufumu wa kusapwila ne kulenga baana ba bwanga?
4 Katatakatu malwa akatampe akonaune ntanda yabulamo bololoke. Aba bapopwela Yehoba bakapuluka. Onkao mambo, kusapwila ne kulenga baana ba bwanga ke mwingilo wanema kabiji wawama bantu ye babena kwingila lelo jino. Nanchi twayai tumunemekenga mu bwikalo bwetu!—Mat. 6:33.