Twafwainwa Kwikala ba Kizaku mu Mwingilo

¹ Kufumatu mu 1992, Bakamonyi ba kwa Yehoba mwaya ntanda bengila maawala kukila pa bilyonyi umo pa mwaka pa mwaka mu mwingilo wa kusapwila Bufumu ne kulenga baana ba bwanga. Byo twasangalalapo kuba’mba mu mwaka wa mwingilo wa 2007, kibelengelo kya basapwishi muno mu Zambia kyayijileko bingi peulu mambo basapwishi 127,872 bo batuminenga sawakya wa pa ñondo pa ñondo!

² Pano bino, lusanchilo ne lutotelo byonse biya kwi Yehoba witukwasha ne kwitupa byo tukeba mu mwingilo wetu mu bino “bimye byakatazha.” (2 Timo. 3:1) Ki ka kyo twafwainwa kuba pa kuba’mba tutwajijile kwikala ba kizaku mu uno mwingilo wanema?

³ Kitulengela Kwikala ba Kizaku: Kutemwisha Lesa ne bantu kabiji ne kusakisha kwikela mwayila kwipana kwetu, kyo kitutundaika mu mwingilo wa Bufumu. (Mat. 22:37-39; 1 Yoa. 5:3) Butemwe bo bwitulengela kwipana kuba’mba twingilengako pakatampe mu mwingilo wa kusapwila.—Luka 9:23.

⁴ Ibikaingako Kwikala ba Kizaku: Mulwanyi wetu Diabola wakosako bingi kukeba kwitulefula mu mwingilo wetu. Misula ya bantu ba mu nyaunda yetu, bya kulabika bya ino ntanda, bya kutabataba bya mu bwikalo, ne bijikila bya pa mambo a butuntulu bwetu bwa mubiji bubena kuya na kutaminako, byo bintu bimo byoengijisha kwitulefwilamo.

⁵ Onkao mambo, twafwainwa kwibikako kwikala ba kizaku. Kyanema bingi kwi atweba bonse kukosesha ‘butemwe bwetu butanshi.’ Pa kuba’mba tutwajijile na buno butemwe kikebewa kimye kyonse kutanganga Baibolo Mambo a Lesa, ne kulanguluka langulukapo, kabiji ne kwingijisha bintu byonse Yehoba byo abena kupana kupichila mwi ‘kalume wa kishinka ne wa maana’ bya kukosesha lwitabilo lwetu.—Lum. 2:4; Mat. 24:45; Sala. 119:97.

⁶ Byonkatu bungauzhi bwa mu Baibolo byo bwaamba, juba ja Yehoba ja konawinamo bantu babula kumwakamwa jafwenya kala pepi. (2 Pe. 2:3; 3:10) Byo twayuka kino, twayai twibikengako kwikala ba kizaku mu mwingilo, kabiji ne kwingilangako pakatampe mu uno mwingilo ubena kwingijiwa pa kino kimye wa kusapwila ne kulenga baana ba bwanga!