Mu Kino Kimye kya Kivuluko, Nanchi Mukekala na Mukoyo Ujipo na Yehoba ne Yesu Nyi?

1. Ñanyi kintu Bakamonyi ba kwa Yehoba kyo bebikako kuba mu kimye kya Kivuluko?

¹ Yehoba uba na mukoyo bintu byo akeba kuba. Kwamba pa mapesho a Bufumu bwa Lesa amo, Isaya 9:7 waamba’mba: “Mukoyo wa Yehoba wa mabumba ye ukoba kino.” Kyo kimotu, ne Mwana Lesa byo aingijilenga mwingilo wanji pano pa ntanda, wamwesheshe mukoyo wa mpopwelo ya kine. (Yoa. 2:13-17; 4:34) Pa mwaka pa mwaka mu kimye kya Kivuluko, basapwishi bavula kuzhokoloka ntanda yonse bebikako kulondela mukoyo ujipo na Yehoba ne Yesu kupichila mu kwingilako pakatampe mu mwingilo. Nanchi ne anweba mukekala pa bano nyi?

2. Mukoyo uketulengela kuba ka kutendeka pa 7 March?

² Mukwekele wa Kwita Bantu ku Kivuluko: Mukwekele wa kwita bantu ku Kivuluko uno mwaka ukatendeka pa Kibelushi pa 7 March. Inengezhai lonka luno pa kuba’mba mukengileko na mukoyo mu mwingilo. Bipwilo bikekala na lusekelo bingi byo bikebikangako kwingijila mu nyaunda yabyo yonse inge kyakonsheka. Ingilai na ngovu kwita bantu bo mufunjisha Baibolo, bo mwingila nabo, balongo benu, bo mufunda nabo ku sukulu, bo twalayile kubwelako pa kwibapa kapepala ka lwito nangwa kwingijisha jw.org.

3. Twakonsha kwingilako byepi pakatampe mu March ne April?

³ Bupainiya bwa Kukwasha: Mukoyo uketulengela ne kwingilako pakatampe mu mwingilo. Kwa kubula nangwa kuzhinaukatu ne, bavula bakengilako bupainiya bwa kukwasha mu March ne mu April, mambo twakonsha kusalapo kwingila maola 30. Pa kupopwela kwenu kwa kisemi nangwa pa lufunjisho lwenu lwa pa bunke mwakonsha kulombapo ne kulangulukapo byo mwakonsha kuba kino. (Maana 15:22) Kizaku kyenu mu uno mukwekele kyakonsha ne kutundaika bakwenu kwingila na mukoyo. Inge mwapimpulako bwikalo pa kuba’mba mwingileko pakatampe, mukalondelanga mukoyo wa kwa Yesu.—Mako 6:31-34.

4. Ñanyi mfweto ifuma mu kulondela mukoyo ujipo na Yehoba ne Yesu?

⁴ Kulondela mukoyo ujipo na Yehoba ne Yesu mu kino kimye kya Kivuluko kuketuletela mapesho. Bantu bavula mu nyaunda bakomvwa mambo awama. Tukeyowa lusekelo luji mu kwingijila Yehoba ne mu kupana. (Byu. 20:35) Kyakilapo kunema, tukatokesha ku muchima Lesa wetu uji na mukoyo ne Mwananji.