“Ikalai na Muchima wa Lupata”
1. Ñanyi kyubilo kyo twafwainwa kwikala na kyo pa kwingila mwingilo wetu?
1 Mwingilo wetu wa bwina Kilishitu kechi twafwainwa kumwingilanga na mukose ne. O ene mambo o betutundaikila ‘kwikala na muchima wa lupata’ ne ‘kwingijila Nkambo.’ (Loma 12:11) Bintu byavula bingi byakonsha kwitulengela kubula kwingila na mukoyo. Twakonsha ‘kuteemesha’ nangwa’mba kwikala byepi na mukoyo mu mwingilo wetu wa Bufumu?—2 Timo. 1:6, 7.
2. Lufunjisho lwa Baibolo lwa pa bunke lwitulengela byepi kwingila na mukoyo?
2 Lufunjisho lwa Baibolo lwa pa Bunke: Musapwishi wa Bufumu watemwa mizhilo ya Yehoba kabiji ye bafika pa muchima ku bukine ye wingila bulongo. (Sala. 119:97) Umvwe twatana bya buneme mu lufunjisho lwa Baibolo lwa pa bunke, bitutundaika ne kwitulengela kwingila na lupata. Kutemwa Lesa mwina Bukine ne kukebesha kusapwila mambo awama kwitutundaika kutota Lesa ne kuyukanyikisha jizhina janji. (Hebe. 13:15) Kya kine, kusapwila mambo awama na mukoyo kumwesha byo twianemeka.
3. Mupashi wazhila wakonsha kwitukwasha byepi mu mwingilo?
3 Lombainga Mupashi wa Lesa: Kechi twakonsha kwingila bulongo mu bulume bwetu ne. Mupashi wa Lesa witulengela kwikala na mukoyo wa kine. (1 Pe. 4:11) Kufwenya kwipi na nsulo ya “ngovu” kuketukwasha kukosa ku mupashi ne kushimuna bukine na kunchichika. (Isa. 40:26, 29-31) Kimye mutumwa Paulo kyo ajinga mu lukatazho mu mwingilo wanji, ‘watambwile bukwasho bufuma kwi Lesa.’ (Byu. 26:21, 22) Mupashi wa Yehoba upana bulume wakonsha kwitukwasha kwikala balupata na mwingilo wetu, onkao mambo twafwainwa kulombanga uno mupashi.—Luka 11:9-13.
4. Byawama ka bifuma mu kwingila na lupata, kabiji twafwainwa kwingilanga byepi?
4 Kwingila na lupata mu mwingilo wa Bufumu kulengela ne bakwetu bena Kilishitu nabo kwingila na lupata. (2 Ko. 9:2) Bantu mu nyaunda batako bingi muchima umvwe tusapwila na kizaku ne na kusumininwa. Twafwainwa kwikala na mukoyo bino saka twatekanya ne kuyuka mwakwambila. (Titu. 3:2) Kimye kyonse twafwainwa kwibapa mushingi bena mazubo ne kunemeka lūsa lwabo lwa kwisajilapo.
5. Ñanyi mukambizho ye twafwainwa kukokela?
5 Byo tuji basapwishi ba Bufumu, twibikengako ‘kwikala na muchima wa lupata.’ Twayai twikale balupata kupichila mu lufunjisho lwa pa bunke ne kulomba kwi Yehoba kwitupa bulume bwa mupashi wazhila. Mu jino jishinda tukakonsha kwingila mwingilo wetu na lupata “mu mupashi wazhila, ne mu kuyukisha kwa kine kukatampe.”—1 Tesa. 1:5.