Kuyukanyikisha Jizhina ja Lesa
1. Kuyuka jizhina ja Lesa kulengela bantu kuba ka?
1 Mwaubilepo byepi kimye kitanshi kyo mwafunjile jizhina ja Lesa? Bavula boba byonka byaubile mwanamukazhi umo waambile’mba: “Kimye kitanshi kyo namwene jizhina ja Lesa mu Baibolo, najijile. Kyangikele bingi ku muchima byo nayukile namba nafwainwa kuyuka ne kwingijishanga jizhina ja Lesa.” Kuyuka jizhina ja Lesa kyo kyajinga kintu kyanema ku uno mwanamukazhi kuyukilamo Yehoba amba muntu kabiji wakonsha ne kwikala mulunda nanji.
2. Mambo ka o twafwainwa kufunjishisha bukiji bukiji bakwetu kuyuka Yehoba?
2 Mambo ka a Kwijiyukanyikisha? Kuyuka jizhina ja Lesa kilumbulula kuyuka byubilo byanji, nkebelo yanji ne byo oba. Kabiji twafwainwa kuyuka jizhina ja Lesa pa kuba’mba tukapuluke. Mutumwa Paulo wanembele’mba: ‘Bonse beta pa jizhina ja Nkambo [Yehoba, NW] bakapuluka.’ Paulo wabwelele waipuzha’mba, ‘lelo nanchi bakonsha kumwita byepi’ kwakubula kukimuyuka Yehoba ne kumwitabila? Onkao mambo, bena Kilishitu bafwainwa bukiji bukiji kubulako bakwabo amba bayuke jizhina ja Lesa ne byo jalumbulula. (Loma 10:13, 14) Bino nangwa byonkabyo, kuji mambo akwabo akilamo kunema akebewa jizhina ja Lesa kuyukanyikwa.
3. Ñanyi mambo ene akatampe etulengela kusapwila?
3 Mu ma 1920, bantu ba Lesa bayukile mu Binembelo mambo alamata bilengwa byonse a kubingishiwa kwa bumfumu bwa Lesa ne kuzhijikwa kwa jizhina janji. Yehoba saka akyangye konauna babi kuba’mba afumyepo lwendeleko lwaendelekwa jizhina janji, bukine bwanji bwafwainwa ‘kuyukanyikwa panopantanda ponse.’ (Isa. 12:4, 5; Ezi. 38:23) Onkao mambo, mambo ene akatampe etulengela kusapwila ke akutota Yehoba patoka ne kuzhijika jizhina janji ku bantu bonse. (Hebe. 13:15) Butemwe bwa kutemwa Lesa ne bakwetu bwitulengela kwingila na ngovu mu uno mwingilo yetwapewa kwi Lesa.
4. Bakamonyi bakwa Yehoba bayukanyikwa byepi na jizhina ja Lesa?
4 ‘Bantu ba Jizhina Janji’: Mu 1931, twitumbile jizhina ja kuba’mba Bakamonyi bakwa Yehoba. (Isa. 43:10) Kutendekatu kyo kya kimye, bantu ba Lesa babena kuyukanyikisha jizhina ja Lesa kyakuba buku wa Proclaimers pa peja 124 waamba’mba: “Mwaya ntanda yonse, muntu yense wingijisha jizhina ja Yehoba ufikenatu ponkapo kuyukanyikwa’mba Kamonyi wakwa Yehoba.” Nanchi byo byo muyukanyikwa nyi? Kusanchila buwame bwa Yehoba kwafwainwa kwitulengela ‘kutakaika jizhina janji,’ kwamba pe aye pa kimye kiji kyonse kyafwainwa.—Sala. 20:7; 145:1, 2, 7.
5. Byotuji na jizhina ja Lesa, byubilo byetu byafwainwa kwikala byepi?
5 Byotuji ‘bantu ba jizhina janji,’ twafwainwa kusunga mizhilo yanji. (Byu. 15:14; 2 Timo. 2:19) Javula kintu kitanshi bantu kyo bamona pa Bakamonyi bakwa Yehoba ke byubilo byabo byawama. (1 Pe. 2:12) Kechi twafwainwa nangwa pacheche kwijuba mwenga jizhina janji kupichila mu kuzhilulula mafunde anji nangwa kupichila mu kupelula bupopweshi bwa ku mupopwela aye mu bwikalo bwetu ne. (Levi. 22:31, 32; Mala. 1:6-8, 12-14) Bwikalo bwetu bwafwainwa kumwesha’mba twanemeka jishuko ja kwikala na jizhina janji.
6. Jishuko ka jotuji najo lelo jino ne myaka ne myaka?
6 Lelo jino, tubena kumona kufikizhiwa kwa byambo bya Yehoba bya kuba’mba: “Jizhina jami jatumbalala mu mikoka ya bantu kufuma ku musela kufika ku muzhika.” (Mala. 1:11) Twayai tutwajijile kuyukanyikisha bukine bwa Yehoba ne ‘kutakaika jizhina janji jazhila, myaka ne myaka.’—Sala. 145:21.