‘Ano Mambo Awama Akasapwilwa’!
1. Twayuka byepi kuba’mba kafwako kyakonsha kulekesha mwingilo wa kusapwila?
1 Kafwako kyakonsha kulengela Yehoba kukankalwa kuba kyaswa muchima wanji ne. (Isa. 14:24) Nangwa kyamwekelenga nobe Mutonyi Gidiona ne banabalume banji 300 kechi bakonsheshe kushinda nzhita ya bena Mijanyi bajinga 135,000 ne, Yehoba wamwambijile’mba: “Ukebapokolole bena Isalela mu maboko a bena Mijanyi; amiwa kechi yami nakutuma nenyi?” (Mito. 6:14) Ñanyi mwingilo ye babena kutangijila kwi Yehoba mu ano moba? Yesu waambi le’mba: “Ano mambo awama a bufumu akasapwilwa panopantanda ponse.” (Mat. 24:14) Kafwako ukalekesha uno mwingilo ne!
2. Mambo ka o twafwainwa kuketekela Yehoba kwitukwasha pa muntu pa muntu mu mwingilo?
2 Yehoba Witukwasha pa Muntu pa Muntu: Byo twayuka kuba’mba Yehoba ukwasha Bakamonyi banji mu bujibumba, abya twakonsha ne kuketekela Yehoba kwitukwasha pa muntu pa muntu nyi? Mu bimye byakatazha, mutumwa Paulo wimwenejile Yehoba byo amukwashishe kupichila mwi Mwananji Yesu. (2 Timo. 4:17) Netuwa twafwainwa kuketekela’mba Yehoba uketukwasha pa muntu pa muntu kuba kyaswa muchima wanji.—1 Yoa. 5:14.
3. Yehoba witukwasha mu bimye bya mutundu ka?
3 Nanchi mingilo ya pa juba pa juba imukokesha kya kuba mukankalwa ne kwikala na bulume bwa kuya mu mwingilo nyi? “Aye upana bulume ku batembuka.” (Isa. 40:29-31) Nanchi babena kwimumanyika nangwa kwimukanya nyi? “Utwike Yehoba kisendwa kyobe, ne aye ukakukosesha.” (Sala. 55:22) Nanchi bimye bimo mukankalwa kuchinchika nyi? “Yanga, kabiji amiwa nkekala na kanwa kobe.” (Lupu. 4:11, 12) Nanchi kukolwa kwimulengela kubula kwingilako pakatampe mu mwingilo nyi? Yehoba wanemeka bingi kwibikako kwenu ne byo mwingila na muchima yense nangwatu bicheche.—1 Ko. 3:6, 9.
4. Kuketekela mwi Yehoba kuketulengela kuba ka?
4 Kuboko kwanji Yehoba “wikutanyika kala kabiji ñanyi ukekubwezha?” (Isa. 14:27) Byo twayuka kuba’mba Yehoba upesha mwingilo wetu, twayai tutwajijile ‘kwamba mambo mwi Nkambo na kuchinchika’ kwakubula kuleka.—Byu. 14:3.