“Yainga na Kufunjisha Bantu ba mu Bisaka Byonse . . . Kwikala ke Baana Bami ba Bwanga”

1, 2. Ñanyi mepuzho o twakonsha kushikisha na mambo a byambo bya kwa Yesu biji pa Mateo 24:14?

YESU waambile’mba mu moba a kupelako, mambo awama a Bufumu bakeasapwila ku bantu bonse. (Mateo 24:14) Atweba Bakamonyi ba kwa Yehoba twayukanyikwa ntanda yonse na mambo a mwingilo wetu wa kusapwila. Bamo batambwila mambo awama o tusapwila, bino bakwabo bakana. Nangwa byonkabyo, bamo pa bano bakana mambo awama betunemeka bingi na mambo a mwingilo ye twingila. Twamba kuba’mba yetu bonka babena kwingila mwingilo waambile Yesu. Nanchi kitufwainwa atweba kwamba bino nyi? Twashiinwa byepi amba mwingilo wetu wa kusapwila ye mwingilo waambilepo Yesu?

² Mabumba a bupopweshi avula amba’mba asapwila mambo awama aambilepo Yesu. Pano bino, basapwilatu mu machechi abo, pa TV, pa Intaneti, nangwa kubulakotu bakwabo pa byo bafunjile pe Yesu. Bakwabo nabo balanguluka’mba kukwasha bantu bakajilwa nangwa kwingila mingilo nabiji ya budokotala, bumanase ne bufunjishi kwa kubula kufola mali jo jishinda jo basapwilamo. Nanchi ino yo mingilo ya kusapwila yaambilengapo Yesu nyi?

3. Kwesakana na byaamba Mateo 28:19, 20, ñanyi bintu bina byafwainwa kuba baana ba bwanga ba kwa Yesu?

³ Nanchi Yesu wakebelenga’mba baana banji ba bwanga bapembelelenga bantu kwiya kwi abo nyi? Ine. Yesu byo asangukile, wabuujile baana banji ba bwanga bavula amba: “Yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha . . . , ne kwibafunjisha kulama bintu byonse byo nemukambizha.” (Mateo 28:19, 20) Onkao mambo, byo tuji baana ba bwanga ba kwa Yesu, twafwainwa kuba bintu bina. Twafwainwa kukwasha bantu kwikala baana banji ba bwanga, kwibabatizha ne kwibafunjisha. Bino patanshi, twafwainwa kuya ku bantu. Shayuka umo wa bya Baibolo waambile’mba: “Muntu yense waitabila wafwainwa ‘kuya’ mu mikwakwa monse, nangwatu ku bushiya bwa tulunga.”—Mateo 10:7; Luka 10:3.

4. Ñanyi bintu byavwangwamo mu mwingilo wa “kukwata bantu”?

⁴ Yesu wakebelenga baana banji ba bwanga kuba byepi? Nanchi wakebelenga’mba basapwilenga bunke bunke nyi, inyi wakebelenga’mba bakwatankane ne kwingijila pamo mu bujibumba? Muntu umo kechi wakonsha kusapwila ku “bisaka byonse bya bantu” ne, onkao mambo, baana banji ba bwanga bafwainwa kwingijilanga pamo nobe jibumba. Muno mo mwatazhizhe Yesu kimye kyo aichile baana banji ba bwanga amba bekale ke “ba kukwata bantu,” byonkatu muntu byo akwata masabi. (Tangai Mateo 4:18-22.) Mu kino kishimpi, Yesu kechi waambilenga pa muntu umo uloba masabi bunke bwanji na kaanda kuji bujo, saka apembelela jisabi kujako ne. Pakuba, Yesu waambilenga pa bantu bakwata masabi kwingijisha makonde. Kukwata masabi na makonde kukebewa kwingila na ngovu, kukwatankana ne kwingijila pamo.—Luka 5:1-11.

5. Ñanyi mepuzho ana o twafwainwa kukumbula, kabiji mambo ka?

⁵ Pa kuba’mba tuyuke babena kusapwila mambo awama, twafwainwa kukumbula ano mepuzho ana:

• Ñanyi mambo awama afwainwa kusapwila baana ba bwanga ba kwa Yesu?

• Ki ka kyafwainwa kwibalengela kusapwila?

• Ñanyi mashinda o bafwainwa kwingijisha pa kusapwila?

• Mwingilo wa kusapwila wafwainwa kubaya byepi, kabiji ukapwa ñanyi kimye?

Mikumbu ya ano mepuzho isakwitukwasha kuyuka bantu babena kwingila uno mwingilo wa kupulusha bantu ne kwitupa kizaku kya kutwajijila kusapwila.—1 Timoti 4:16.

ÑANYI MAMBO AWAMA O TWAFWAINWA KUSAPWILA?

6. Mambo ka o mwashiinwa amba Bakamonyi ba kwa Yehoba bo babena kusapwila mambo awama?

⁶ Tangai Luka 4:43. Yesu wasapwijilenga “mambo awama a Bufumu,” kabiji ukeba’mba baana banji ba bwanga nabo beasapwilenga. Bañanyi babena kusapwila ano mambo awama ku bantu bonse? Ke Bakamonyi ba kwa Yehoba bonkatu. Nangwatu bantu betushikwa baswa kino kishinka. Kya kumwenako, kwajinga pulishiti umo wajinga mishonale wa chechi. Waikele mu byalo byavula, kabiji mu bino byalo, waipuzhanga Bakamonyi ba kwa Yehoba kumubuulako ene mambo awama o basapwila? Pa kupitapo kimye, wabuujile Kamonyi wa kwa Yehoba umo amba: “Bakamonyi bonse bo naipuzhanga buno bwipuzho bafwao maana, mambo bonse bankumbulangatu kimo, amba: ‘Tusapwila mambo awama a Bufumu.’” Byambo bya uno pulishiti kechi bimwesha’mba twi bambulwa maana ne, pakuba, bimweshatu patoka’mba twi bena Kilishitu ba kine bakwatankana. (1 Kolinda 1:10) Bufumu bwa Lesa kyo kishina kikatampe kya Kyamba kya Usopa Kibena Kubijika Bufumu bwa Yehoba. Pa ñondo pa ñondo, magazini a Kyamba kya Usopa pepi 59,000,000 apulintwa mu milaka 254. Onkao mambo, ye magazini ye basampanya bingi kukila magazini onse mwaya ntanda.

7. Twayuka byepi amba bantangi ba bupopweshi kechi basapwila mambo awama ne?

⁷ Bantangi ba bupopweshi kechi basapwila pa Bufumu bwa Lesa ne. Inge baamba pa Bufumu, bamba’mba buji mu muchima wa muntu. (Luka 17:21) Kechi bafunjisha bantu amba Bufumu ke kafulumende wa mwiulu ubena kulamwa na Yesu ne. Pakuba, abo bambatu pe Yesu inge kyafika kimye kya Kiminshiminshi ne Ishita. Kechi bafunjisha bantu amba Bufumu bo bukapwisha makatazho a bantu ne kuba’mba katatakatu bukafumyepo bubi bonse pano pa ntanda ne. (Lumwekesho 19:11-21) Twamonatu patoka’mba bantangi ba bupopweshi kechi bayuka Yesu byo akoba byo aji Mfumu wa Bufumu bwa Lesa ne. Kabiji na mambo a kuba kechi bayuka mambo awama a kwa Yesu ne, kechi bayuka ene mambo o kyanemena kusapwila ne.

KI KA KYAFWAINWA KWITULENGELA KUSAPWILA?

8. Ñanyi mulanguluko watama ye twafwainwa kuchinuzhuka pa kwingila mwingilo wa kusapwila?

⁸ Baana ba bwanga ba kwa Yesu kechi bafwainwa kusapwila na mambo a kukeba kulenga mali nangwa kushimika machechi akatampe ne. Yesu waambile’mba: “Mwatambwiletu kyatu, ne anweba panaitu kyatu.” (Mateo 10:8) Onkao mambo, mwingilo wa kusapwila kechi wafwainwa kwikala nobe busulu ne. (2 Kolinda 2:17, tubyambo twa munshi) Baana ba bwanga ba kwa Yesu kechi bafwainwa kulomba bantu kwibalipila mali pa mwingilo wabo wa kusapwila ne. (Tangai Byubilo 20:33-35.) Nangwa kya kuba bayuka byakambizhe Yesu, bino bantangi ba machechi bavula bapayankanatu na kutambula mali a kulaminamo machechi, ne kufolesha bapashita ne bamingilo bakwabo pa chechi. Onkao mambo, bantangi ba machechi bavula banonka bingi.—Lumwekesho 17:4, 5.

9. Bakamonyi ba kwa Yehoba bamwesha byepi amba bengila mwingilo wa kusapwila na muchima wa kwipana?

⁹ Nanchi Bakamonyi ba kwa Yehoba bapishamo nsanyi na kulomba mali ku bantu pa Mazubo a Bufumu nangwa pa kushonkena nyi? Ine! Mwingilo wabo utundaikwa na bupe bwa kwifuukwila. (2 Kolinda 9:7) Pano bino, mwaka wapwa, Bakamonyi ba kwa Yehoba baingijile maola 2 bilyonyi mu mwingilo wa kusapwila mambo awama, kabiji bafunjishenga Baibolo ku bantu kukila pa 9 milyonyi pa ñondo pa ñondo. Kechi bafola mali pa mwingilo wa kusapwila ne, pakuba, bengijisha mali abo na lusekelo pa kwingila uno mwingilo. Shayuka umo waambile bino pa mwingilo wa Bakamonyi ba kwa Yehoba, amba: “Kine kintu kyo bakeba ke kusapwila ne kufunjisha.” Waambile ne kuba’mba Bakamonyi ba kwa Yehoba kechi baji na bantangi bo bafolesha mali ne. Umvwe kya kuba kechi tusapwila amba tumwenemo mali ne, ñanyi kintu kine kitulengela kusapwila? Twipana kwingila mwingilo wa kusapwila mambo twatemwa Yehoba ne bantu. Kuno kwipana kufikizha bungauzhi buji pa Salamo 110:3 (Tangai.)

ÑANYI MASHINDA O TWAFWAINWA KWINGIJISHA?

10. Ñanyi mashinda aingijishe Yesu ne baana banji ba bwanga pa kusapwila?

¹⁰ Ñanyi mashinda aingijishe Yesu ne baana banji ba bwanga pa kusapwila? Bayanga konse kwataanwanga bantu, basapwilanga mu mikwakwa ne pa bisankanyi. Bayanga ne ku mazubo a bantu. (Mateo 10:11; Luka 8:1; Byubilo 5:42; 20:20) Kusapwila ku nzubo ku nzubo jajinga jishinda jawama jibakwashishe kusapwila ku bantu bonse.

11, 12. Ñanyi lupusano luji pa bisapwila bapopweshi ba mu Kilishitendomu ne bisapwila Bakamonyi ba kwa Yehoba mambo awama?

¹¹ Nanchi bapopweshi ba mu Kilishitendomu basapwila mambo awama byonka byaubanga Yesu nyi? Javula, bapashita bo basapwila pa mutuntamo, kabiji bebafolesha mali. Bano bantangi kechi baya na kukeba bantu ne kwibakwasha kwikala baana ba bwanga ne, bino batatu maana pa kulama bantu bonka bo baji nabo mu chechi. Bimye bimo, beseka kutundaika bantu babo kuya na kusapwila. Mu 2001, Papa, aye John Paul II wanembele mu nkalata amba bapopweshi ba mu chechi bafwainwa kusapwila Mambo Awama ne kwingila na mukoyo wajingapo na mutumwa Paulo, wanembele’mba: “Malwa o ami umvwe nabula kusapwila Mambo Awama!” Kabiji Papa waambile’mba uno mwingilo wa kusapwila kechi bafwainwa kumwingilatu ku bantu bacheche bafunda ne, bino ke bonse bantu ba mu chechi. Nangwa byonkabyo, bachechetu boba bino.

¹² Nga Bakamonyi ba kwa Yehoba boba byepi? Bo bonkatu basapwila amba Yesu ke Mfumu watendekele kulama mu 1914. Bakookela Yesu ne kutangizhako mwingilo wa kusapwila mu bwikalo bwabo. (Mako 13:10) Buku wa kuba’mba Pillars of Faith—American Congregations and Their Partners waambile’mba Bakamonyi ba kwa Yehoba banemeka bingi mwingilo wa kusapwila. Wanungilepo amba inge bataana bantu bafwa nzala, bakajilwa ne bakolwa, bebakwasha, pano bino kechi balubako amba mwingilo wabo mukatampe ke kuspwila bantu pa mpelo ya ino ntanda ne kwibafunjisha byo bakonsha kupuluka ne. Bakamonyi ba kwa Yehoba batwajijila kusapwila ano mambo awama ne kulondela mashinda a kusapwilamo aingijishanga Yesu ne baana banji ba bwanga.

MWINGILO WA KUSAPWILA WA BAYA BYEPI KABIJI UKAPWA KIMYE KA?

13. Mambo ka mwingilo wa kusapwila kyo abayila?

¹³ Yesu waambile’mba baana banji ba bwanga kusapwila mambo awama “pano pa ntanda ponse.” Kabiji wibakambizhe kufunjisha “ba mu bisaka byonse bya bantu.” (Mateo 24:14; 28:19, 20) Kino kibena kulumbulula’mba mambo awama afwainwa kusapwilwa ntanda yonse.

14, 15. Ñanyi bishiino bimwesha’mba Bakamonyi ba kwa Yehoba bafikizha bungauzhi bwa kwa Yesu bwa kusapwila ntanda yonse? (Monai bipikichala bitanshi.)

¹⁴ Bakamonyi ba kwa Yehoba bo bonkatu babena kufikizha bungauzhi bwa kwa Yesu bwa kuba’mba mambo awama afwainwa kusapwilwa ntanda yonse. Mambo ka o twaambila bino? Mu United States muji bantangi ba mu machechi a Kilishitendomu nobe 600,000, bino mu kino kyalo muji Bakamonyi ba kwa Yehoba nobe 1,200,000 babena kusapwila mambo awama. Mu ntanda yonse muji bapulishiti ba Bakatolika pepi na 400,000, bino Bakamonyi ba kwa Yehoba kukila pa 8 milyonyi bo babena kusapwila mambo awama mu byalo 240. Kyamwekatu patoka’mba Bakamonyi ba kwa Yehoba bo babena kusapwila mambo awama ntanda yonse. Kino kiletela Yehoba lukumo ne lutotelo.—Salamo 34:1; 51:15.

¹⁵ Byo tuji Bakamonyi ba kwa Yehoba, kikonkwanyi kyetu ke kusapwila mambo awama ku bantu bavula mpelo saka ikyangye kwiya. Pa kuba’mba twingile uno mwingilo, twatuntulula mabuku avula, magazini, matalakiti ne tupepala twa kwichilapo bantu ku kushonkena ne ku Kivuluko mu milaka kukila pa 700. Tupana ku bantu ano mabuku etu kyatutu. Mwaka wapwa, twapulinchile mabuku alumbulula Baibolo nobe 4.5 bilyonyi. Kabiji twapulinta ma Baibolo a Binembelo bya Ntanda Ipya akila pa 200 milyonyi mu milaka kukila pa 130. Kunungapo, pa keyala wetu wa pa Intaneti paji byambo mu milaka kukila pa 750. Bakamonyi ba kwa Yehoba bo bonkatu babena kwingila uno mwingila wabaya bino.

16. Twayuka byepi amba Bakamonyi ba kwa Yehoba baji na mupashi wa Lesa?

¹⁶ Uno mwingilo wa kusapwila ukapwa kimye ka? Yesu waambile’mba mambo awama bakeasapwila kufikatu ne ku mpelo. Atweba Bakamonyi ba kwa Yehoba twachinchika mu mwingilo wa kuspwila mu moba a kupelako na mambo a kuba tuji na mupashi wazhila wa Yehoba. (Byubilo 1:8; 1 Petelo 4:14) Bantu bamo ba mu bupopweshi bamba’mba: “Atweba yetu tuji na mupashi wazhila.” Nanchi bakonsha kwingila mwingilo ubena kwingila Bakamonyi ba kwa Yehoba mu ano moba apelako nyi? Mabumba a bupopweshi amo aeseka kusapwila byonka byo tusapwila, bino bakankalwa. Bakwabo bepana kusapwila, pano bino kechi batwajijila ne. Kabiji bakwabo nabo baya na kusapwila ku nzubo ku nzubo bino kechi basapwila mambo awama a Bufumu ne. Onkao mambo, kechi twakonsha kwamba’mba babena kwingila mwingilo wakambizhe Yesu ne.

BAÑANYI BABENA KUSAPWILA MAMBO AWAMA LELO JINO?

17, 18. (a) Mambo ka o twashiinwa amba Bakamonyi ba kwa Yehoba bo bonkatu babena kusapwila mambo awama a Bufumu lelo jino? (b) Ki ka kitukwasha kutwajijila mu mwingilo wa kusapwila?

¹⁷ Bañanyi babena kusapwila mambo awama a Bufumu lelo jino? Ke bonkatu Bakamonyi ba kwa Yehoba. Twayuka byepi bino? Mambo tubena kusapwila Mambo Awama a Bufumu, onka akambizhe Yesu. Tuya na kukebakeba bantu mu busapwishi bwetu, kimwesha’mba tubena kulondela mashinda a kusapwilamo akambizhe Yesu. Kine kintu kyawama kitulengela kusapwila ke kutemwa Yehoba ne bantu. Mwingilo wetu wa kusapwila wabaya bingi, mambo tusapwila ku bantu ba mu bisaka byonse ne milaka yonse. Kabiji tukatwajijila kusapwila mambo awama a Bufumu kufikatu ne ku mpelo.

¹⁸ Kituletela bingi lusekelo pa kumona mwingilo ubena kwingila bantu ba Yehoba wa kusapwila mambo awama mu ano moba a kupelako. Ki ka kitukwasha kwingila uno mwingilo? Mutumwa Paulo wanembele’mba: “Lesa byo kyamutokela ku muchima, ubena kwimukosesha ne kwimupa kizaku ne bulume bwa kwingila.” (Filipai 2:13) Twalomba kuba’mba Yehoba atwajijile kwitupa bulume bwa kutwajijila kusapwila mambo awama.—2 Timoti 4:5.