Mambo Awama Babena Kwiasapwila Byepi?

Katatakatu Yehoba akengijishe Bufumu bwanji kufumyapo makatazho onse o tubena kupitamo. Ano ke mambo awama afwainwa kumvwa bonse. Yesu wakambizhe baana banji ba bwanga kuba’mba bafwainwa kusapwila ano mambo awama ku bantu bonse. (Mateo 28:19, 20) Nga Bakamonyi ba kwa Yehoba babena kulondela byepi uno mukambizho wa kwa Yesu?

1. Kinembelo kya Mateo 24:14 kibena kufika byepi mu ano moba?

Yesu waambile’mba: “Ano mambo awama a Bufumu bakeasapwila pano pa ntanda ponse.” (Mateo 24:14) Bakamonyi ba kwa Yehoba babena kwingila uno mwingilo wanema na lusekelo. Tubena kusapwila mambo awama ntanda yonse mu milaka kukila pa 1,000. Onkao mambo, pa kuba’mba uno mwingilo tumwingile bulongo pakebewa kwibikako ne kwinengezha. Kafwako wafwainwa kwingila uno mwingilo kwa kubula bukwasho bwa Yehoba ne.

2. Ñanyi mashinda o tubena kwingijisha pa kuba’mba tusapwile bantu?

Tusapwila konsetu kutaanwa bantu. Byonkatu byainglanga bena Kilishitu batanshi, ne atweba tusapwila “ku nzubo ku nzubo.” (Byubilo 5:42) Kusapwila ku nzubo ku nzubo kwitukwasha kusapwila bantu bavula bingi pa mwaka pa mwaka. Byo kiji kuba’mba bantu kechi bataanwa pa mazubo kimye kyonse ne, tusapwila ne mu mapunzha mutaanwa bantu bavula. Twingijisha mashinda apusana pusana kusapwila bantu pe Yehoba ne pa kyaswa muchima wanji.

3. Bañanyi bafwainwa kusapwilanga mambo awama?

Bena Kilishitu ba kine bonse bafwainwa kusapwilanga mambo awama ku bantu. Twata bingi muchima ku mwingilo wetu wa kusapwila. Tusapwila ponka papelela bulume bwetu, mambo twayuka’mba uno mwingilo ukapulusha bantu. (Tangai 1 Timoti 4:16.) Kechi tufola mali pa kwingila uno mwingilo ne. Mambo Baibolo waamba’mba: “Mwatambwiletu kyatu, ne anweba panaitu kyatu.” (Mateo 10:7, 8) Kechi bantu bonse baswa kwibasapwila ne. Nangwa byonkabyo, kechi tuleka ne, mambo kuba bino kumwesha’mba tubena kukookela Yehoba ne kumutokesha ku muchima.

FUNJILAIPO BIKWABO

4. Twibikako bingi kusapwila bantu bonse

VIDYO: Kusapwila “Monse Mwapela Ntanda” (7:33)

• Ñanyi bintu byo mwatemwa pa bingila Bakamonyi ba kwa Yehoba mwingilo wa kusapwila?

Tangai Mateo 22:39 ne Loma 10:13-15, ne kwisamba ano mepuzho:

• Mwingilo wa kusapwila ye twingila umwesha byepi amba twatemwa bantu?

• Yehoba umona byepi bantu basapwila mambo awama?​—Monai kyepelo 15.

5. Atweba twi ba mwingilo umo ne Lesa

Kuji bishinka byavula bingi bimwesha’mba Yehoba ye ubena kutangijila mwingilo wetu. Mulongo Paulo wikala mu kyalo kya New Zealand, wataaine mwanamukazhi mute byo asapwijilenga ku nzubo ku nzubo. Jonkaja juba lukelo, uno mwanamukazhi walombele kwi Lesa kwingijisha jizhina ja Lesa, ja Yehoba ne kulomba’mba kine kwiyepo muntu wa kumusapwila. Paulo waambile’mba: “Byo papichiletu maola asatu, nafikile pa nzubo yanji.”

Tangai 1 Kolinda 3:9, ne kwisamba buno bwipuzho:

• Akino kyamwekele mu kyalo kya New Zealand kyamwesha byepi amba Yehoba ubena kutangijila mwingilo wa kusapwila?

Tangai Byubilo 1:8, ne kwisamba buno bwipuzho:

• Mambo ka o tukebela Yehoba kwitukwasha pa kuba’mba twingile bulongo mwingilo wetu?

Bishinka bikwabo

Pa kupwila kwetu kwa mukachi ka mulungu, tufunda bya kusapwila bantu. Inge mwakitaanwako ku kuno kupwila, mwalanguluka’mba byo tufunda byawama nyi?

6. Tukookela mukambizho wa Lesa wa kusapwila

Mu kimye kya bena Kilishitu batanshi, bantu baesekele bingi kukanya baana ba bwanga ba kwa Yesu kuba’mba baleke kusapwila. Pano bino, bena Kilishitu batanshi bazhikijile luusa lwabo lwa kusapwila kupichila mu ‘kutambula luusa lwa kusapwila.’ (Filipai 1:7) Abino byo bibena kuba ne Bakamonyi ba kwa Yehoba lelo jino.a

VIDYO: Kulwilako Mambo Awama (2:28)

Tangai Byubilo 5:27-42, ne kwisamba buno bwipuzho:

• Mambo ka o tukabujila kuleka kusapwila?​—Monai kyepelo 29, 38 ne 39.

ÑANYI BISHINKA BYO MWAFUNDA?

Yesu wakambizhe baana banji ba bwanga kusapwila mambo awama ku bisaka byonse bya bantu. Kabiji Yehoba ubena kukwasha bantu banji kwingila uno mwingilo.

Mepuzho a kupitulukamo

• Mambo awama babena kwiasapwila byepi ntanda yonse?

• Mwingilo wa kusapwila ye twingila umwesha byepi amba twatemwa bantu?

• Nanchi kusapwila kwituletela lusekelo nyi? Mambo ka o mwakumbwila byobyo?

KEBAI BISHINKA BIKWABO

Monai Bakamonyi ba kwa Yehoba byo basapwila mu mapunzha mwavula bantu.

Kusapwila mu Mpunzha Mutaanwa Bantu Bavula mu Paris (5:11)

Bakamonyi ba kwa Yehoba basapwila byepi babipuluka?

Balongo Babena Kufunjisha Babipuluka Bukine (5:59)

Tambai vidyo muyuke mwingilo wa kusapwila byo alengejile nyenga umo kwikala na lusekelo.

Natemwa Bingi Kuba’mba Nafuukwilepo Kwingijila Yehoba (6:29)

Tangai pa mambo o twabinga mu makochi byo etulengela kuba’mba tusapwilenga mambo awama saka twakasuluka.

“Basapwishi ba Bufumu Batwala Mambo abo ku Kochi” (Bufumu bwa Lesa Bubena Kulama! kitango 13)