LUFUNJISHO 22
Mwafwainwa Kusapwila Byepi Mambo Awama?
Byo mubena kufunda bukine buji mu Baibolo, kampe mwakonsha kulanguluka’mba, ‘Bantu bonse bakebesha bingi kuyuka bukine!’ Ibyo, bantu bonse bafwainwa kufunda bukine. Pano bino, kampe mwakonsha kumvwa moyo kubuulako bakwenu bintu byo mwafunda. Pano twayai twisambe pa byo twafwainwa kushinda moyo ne kutendeka kusapwila mambo awama aji mu Baibolo.
1. Mwafwainwa kusapwila byepi bakwenu bintu byo mwafunda?
Baana ba bwanga ba kwa Yesu baambile’mba: “Atweba kechi twakonsha kuleka kwamba pa bintu byo twamwene ne kumvwa ne.” (Byubilo 4:20) Baana ba bwanga ba kwa Yesu batemenwe bingi bukine kya kuba bakebeshanga bingi kusapwila ku bantu bonse. Nanchi ne anweba byo byo mumvwa ku muchima nyi? Inge byo byo mumvwa, esekainga kubuulako balongo benu ne balunda nenu bintu byo mwafunda.—Tangai Kolose 4:6.
Mashinda amo o mwafwainwa kwingijisha pa kutendeka kwibasapwila
Inge mubena kwisamba na balongo benu, ambaipo kishinka kyo mwafunda mu Baibolo amba: “Kashika uno mulungu nafunda bintu byanema bingi.”
Tangai kinembelo kyafwainwa kutundaika mulunda nenu wakolwa nangwa uji na bijikila.
Buulaiko bakwenu bo mwingila nabo nkito bakeba kuyuka bintu byo mwafunjile mu Baibolo nangwa pa kupwila.
Pai bakwenu keyala wetu wa jw.org.
Itaiko bakwenu batanwepo kimye kyo mubena kufunda Baibolo nangwa kwibabuula byo bafwainwa kunemba pa jw.org inge bakeba muntu wa kwibafunjishanga Baibolo.
2. Mambo ka o kyawamina kwingijilanga pamo na balongo ne banyenga mu mwingilo wa kusapwila?
Baana ba bwanga ba kwa Yesu kechi bapelejiletu pa kusapwila mambo awama ne, bino bakwashanga ne bantu bo bayukile. Yesu ‘wibatumine babiji babiji kutangilako mu mizhi yonse’ na kusapwila. (Luka 10:1) Kwingila bulongo mwingilo wa kusapwila kwalengejile bantu bavula kumvwa mambo awama. Baana ba bwanga baikalanga bingi na lusekelo kusapwila pamo na bakwabo. (Luka 10:17) Nanchi ne anweba kuba ke musapwile pamo na balongo ne banyenga nenyi?
FUNJILAIPO BIKWABO
Langulukaipo mashinda amo afwainwa kwimukwasha kusapwila kwa kubula moyo kabiji kuba bino kukemulengela kwikala na lusekelo.
3. Yehoba ukemukwasha
Bantu bamo bakamwa bingi pa byo bakambanga pa kusapwila nangwa byo bakebamonanga ku bantu ne byo bakebatambwilanga pa mazubo.
Nanchi muchina kubuulako bakwenu bintu byo mwafunda nyi? Mambo ka o mwakumbwila byobyo?
Tambai VIDYO, ne kwisamba buno bwipuzho.
Nanchi bano Bakamonyi banyenga babiji banyike ne mulongo umo bashinjile byepi moyo?
Tangai Isaya 41:10, ne kwisamba buno bwipuzho:
Inge mwaumvwa moyo pa kusapwila, kulomba kwi Lesa kwafwainwa kwimukwasha byepi?
Bishinka bikwabo
Bakamonyi ba kwa Yehoba bavula nabo balangulukanga’mba kechi bakonsha kusapwila mambo awama ku bantu ne. Sergey wimwene’mba kechi wanema ne, kabiji kyamukatazhanga bingi kwisamba na bantu. Bino watendekele kufunda Baibolo. Waamba’mba: “Nangwa najinga na moyo, natendekele kwisamba na bantu pa bintu byo nafunjilenga. Nakuminye bingi kuba’mba byo natendekele kubuulako bakwetu byaamba Baibolo ne moyo wampwile. Kabiji kusapwila bantu bintu byo naitabilamo kwakoseshe bingi lwitabilo lwami.”
4. Ambainga na mushingi
Inge mubena kusapwila mambo awama, mwafwainwa kulangulukanga pa byo musakwamba ne jishinda jo musakwambilamo. Tangai 2 Timoti 2:24 ne 1 Petelo 3:15, ne kwisamba ano mepuzho:
Mwafwainwa kwingijisha byepi bino byepelo pa kwisamba na bantu pa Mambo a Lesa?
Balongo benu bamo nangwa balunda nenu bakonsha kukana byo musapwila. Inge kyaikala bino, mwafwainwa kuba byepi? Kabiji ñanyi kintu kyo mwafwainwa kubula kuba?
Mambo ka o kyawamina kwipuzha bulongo mepuzho kukila kukanjikizha bantu amba kanatu baswe byo mubena kwibabuula?
5. Kusapwila mambo awama kwituletela lusekelo
Yehoba wapeele Yesu mwingilo wa kusapwila mambo awama. Yesu wamonanga byepi uno mwingilo? Tangai Yoano 4:34, ne kwisamba ano mepuzho:
Kuja kajo kawama kukwasha mubiji wetu kwikala bulongo ne kwitulengela kwikala na lusekelo. Pano mambo ka Yesu o aesakenye kuba kyaswa muchima wa Lesa kuvwangakotu ne kusapwila mambo awama ku kuja kajo?
Nanchi kusapwila mambo awama kwafwainwa kwimuletela byepi lusekelo?
Bya kuba
Pa kupwila kwa mukachi ka mulungu, mukateko bingi muchima ne kufunjilako mashinda o mwafwainwa kwingijisha kutendekelamo kwisamba na bantu.
Ipuzhai wimufunjisha Baibolo kwimubuula byo mwafwainwa kuba pa kuba’mba mutendeke kwambangako majashi mu kupwila kwa mukachi ka mulungu. Kwambako ano majashi kukemukwasha kuyuka bya kwisamba na bantu pa bintu byo mubena kufunda.
Ingijishai kipungu kya kuba’mba “Bantu Bamo Bamba’mba” nangwa “Muntu Wakonsha Kwipuzha’mba” biji mu uno buku kwinengezha byo mwafwainwa kukumbula mepuzho ne bantu bakana kwibasapwila.
BANTU BAMO BEPUZHA’MBA: “Ñanyi bintu byo musakumbuulako lelo?”
Mwafwainwa kwingijisha byepi kako kakimye kubuula muntu bintu byo mwafunda mu Baibolo?
ÑANYI BISHINKA BYO MWAFUNDA?
Kusapwila bantu mambo awama kuleta bingi lusekelo. Kabiji inge mwatendekatu kusapwila moyo ukapwa.
Mepuzho a kupitulukamo
Mambo ka o twafwainwa kusapwilanga mambo awama ku bantu?
Mwakonsha kusapwila byepi na mushingi?
Mwafwainwa kushinda byepi moyo pa kuba’mba musapwile?
KEBAI BISHINKA BIKWABO
Monai ano mashinda ana apeela o mwafwainwa kwingijisha kusapwilamo mambo awama kwingijisha kakikachi ka jw.org.
Jishinda ja Kwisambilamo pa Kusha ka Kikachi ka JW.ORG (1:43)
Yukai byubilo bina byafwainwa kwimukwasha kusapwila mambo awama.
“Nanchi Mwinengezha Kwikala ba Kukwata Bantu Nyi?” (Kyamba kya Usopa, September 2020)
Tambai vidyo waamba pa kyamwekele kiji mu Baibolo byo kyakonsha kwimukwasha kubula moyo pa kusapwila mambo awama nangwa kya kuba mukijitu mwanyike.
Tangai bino bishinka byafwainwa kwimukwasha pa kuba’mba musapwile ba mu kisemi kyenu babula kuyuka Yehoba.
“Kufika pa Michima Balongo Betu Babula Kwitabila” (Kyamba kya Usopa, March 15, 2014)