Lufuunjisho 15

Kukwasha Bakwabo Kuuba Kyaswa Muchima wa Lesa

Kika kyomwafwainwa kubujilako bakwabo byo mubena kufuunda? (1)

Bañanyi bomwafwainwa kubuulako ano mambo awama? (2)

Byubilo byenu byakonsha kusambukila byepi bakwabo? (2)

Kimyeka kyo mwafwainwa kusapwila pamo na kipwilo? (3)

1. Pakino kimye mwafuunda bintu byavula byawama mu Baibolo. Buno buyuuke bwafwainwa kwimutundaika kukomesha bumuntu bwenu bwa Bwinakilishitu. (Efisesa 4:22-24) Buno buyuuke bo bwafwainwa pa kuba ’mba mukatambule buumi bwa myaka. (Yoano 17:3) Pano bino, bakwabo nabo bakeba kumvwa ano mambo awama kuba ’mba bakapuluke. Benakilishitu bakiine bonse bafwainwa kusapwila ku bakwabo. Ye mukambizho wa kwa Lesa.—Loma 10:10; 1 Kolinda 9:16; 1 Timoti 4:16.

2. Mwakonsha kutendeka kusapwila kubomuji nabo pepi bintu byawama byo mubena kufuunda. Bulaiko ba mukisemi kyenu, balunda nenu, bakwenu kusukuulu, ne bakwenu pankito. Ikalai bawama muchima ne kutekanya pakuba byobyo. (2 Timoti 2:24, 25) Vulukai kuba’mba bantu javula bamona byubilo bya muntu kukila byobomvwa ku byo abena kwamba. Kokuba’mba byubilo byenu byawama byakonsha kukoka bakwabo kuteeleka ku mawi o mubena kwibabuula.—Mateo 5:16; 1 Petelo 3:1, 2, 16.

3. Mukupita kwa kimye mwakonsha kutendeka kusapwila pamo na kipwilo kya Bakamonyi ba kwa Yehoba ko mwikala. Kino kyo kintu kikatampe mu kuya kwenu palutwe. (Mateo 24:14) Mwakonsha kusangalala bingi inge mwakwasha muntu kwikala kalume wakwa Yehoba ne kumona buumi bwa myaka!—1 Tesalonika 2:19, 20.