Nanchi Mbena Kwingila Papelela Ngovu Yami Nyi?
1. Bintu ka byakonsha kulefula bena Kilishitu bakishinka?
1 Nanchi mwakiipuzhapo kala buno bwipuzho nyi? Kampe kechi mwingila byonka byo mwaingilanga kala ne, mwalefulwa na mambo a bukote, kukolwa, nangwa mutembo wa kulama kisemi. Nyenga umo uji na baana basatu wanembele’mba mmona nobe kechi mbena kwingila bulongo mu mwingilo ne, na mambo a kulama kisemi. Ki ka kyakonsha kwitukwasha kwikala na mweno yawama?
2. Nanchi Yehoba ukeba ka kwi atweba?
2 Yehoba byo Akeba kwi Atweba: Atweba bonse tukeba kwingilako pakatampe mu mwingilo. Pano bino, paji lupusano lukatampe pa byo tukeba kuba ne byo twafwainwa kuba. Byo kiji kuba’mba tukeba kwingilako pakatampe mu mwingilo, kimwesha’mba twafwainwa kwingila. Twafwainwa kuvulukanga’mba Yehoba wituyuka bulongo byo tuji, kabiji kechi witukebela byakila pa bulume bwetu ne. (Sala. 103:13, 14) Nanchi ukeba ka kwi atweba? Ukeba kumwingijila na muchima wetu yense, ne kwingila papela ngovu yetu.—Kolo. 3:23.
3. Twakonsha kuyuka byepi papelela ngovu yetu mu mwingilo?
3 Ki ka kyafwainwa kwitukwasha kuyuka po twakonsha kupelela? Twakonsha kulomba kwi Yehoba amba etukwashe kuyuka bulongo bwikalo bwetu byo buji. (Sala. 26:2) Twakonsha ne kwipuzha mukwetu mwina Kilishitu wakoma ku mupashi wituyuka bulongo, kabiji wakonsha kubula kuchina kwitubula inge twafwainwa kuwamishako mumo. (Mana. 27:9) Kabiji vulukainga kuba’mba bwikalo bwaluka aluka, onkao mambo, twafwainwa kupesapesanga bwikalo bwetu kimye kyonse.—Efi. 5:10.
4. Twafwainwa kumonanga byepi byambo biji mu Baibolo bya kwituvululako pa mwingilo wa kusapwila?
4 Byo Twafwainwa Kumonanga Byambo bya Kwituvululako: Umvwe bantu babena kunyema kapela, javula bebatundaika. Kyo bobila bino, bakeba babena kunyema kupwisha kikonkwanyi, kechi kwibalefula ne. Kyo kimotu ne na lutundaiko luji mu Baibolo, byo betuvululako pa kupwila ne biji mu mabuku bitutundaika ‘kusapwila mambo,’ kechi bya kwitulengulula ne. (2 Timo. 4:2) Inge twibikako kwingila papelela ngovu yetu twafwainwa kuketekela’mba Yehoba ukavuluka ‘mwingilo wetu ne butemwe.’—Hebe. 6:10.