‘Kechi Wibachine Ne’
1. Ñanyi makatazho ajingapo ne Yelemiya o twakonsha kwikala nao ne atweba?
1 Byo bamupele mwingilo wa bungauzhi, Yelemiya wiumvwine’mba kechi wakonsheshe kumwingila ne. Bino, Yehoba wamwambijile’mba, “kechi wibachine bantu ne,” kabiji wamukoseshe kwingila uno mwingilo. (Yele. 1:6-10) Lelo jino, bumvu nangwa moyo byakonsha kwitulengela kubula kwingila bulongo mu mwingilo. Kuchiina bantu na mambo a bintu byo bakonsha kwitwambila nangwa kwitumona kwakonsha kwitulengela kimye kimo kukankalwa kwibasapwila. Pano twakonsha kukepeshako byepi uno moyo kabiji tukamwenamo ka inge twauba bino?
2. Kunengezhezha jimo kwakonsha kwitukwasha byepi kukepeshako moyo mu mwingilo?
2 Nengezhezhainga Jimo: Kunengezhezha jimo kwakonsha kwitukwasha kukepeshako moyo. Kyakumwenako, umvwe twapitulukilamo jimo mu bintu bantu byo bengijisha kuchibikizhamo misambo, kiketukwasha kuyuka mwakwambila. (Mana 15:28) Pa Kupopwela kwa Kisemi, mwakonsha kumonapo kimye kya kupitulukamo mu makatazho apusana pusana baana o batana ku sukulu ne o mutana mu mwingilo.—1 Pe. 3:15.
3. Kuketekela mwi Yehoba kwitukwasha byepi kukepeshako moyo?
3 Ketekelai mwi Yehoba: Kintu kine kikatampe kiketukwasha kukepeshako moyo ke kuketekela mwi Lesa. Yehoba witulaya’mba, uketukwasha. (Isa. 41:10-13) Buno bo bukwasho bukatampe bo tuji nabo. Kabiji Yesu naye witulayile’mba nangwatu twaikala na makatazho a kubazhimukilatu, mupashi wazhila wa Lesa uketukwasha kusapwila bulongo. (Mako 13:11) Onkao mambo, lombainga kwi Yehoba kimye kyonse kwimupa mupashi wazhila.—Luka 11:13.
4. Tukamwenamo ka umvwe twachinchika mu mwingilo nangwatu tubena kupita mu makatazho?
4 Bintu byo Tukamwenamo: Umvwe twachinchika mu mwingilo nangwatu tubena kupita mu makatazho, tukakosa ne kuyuka mwakubila na meseko a kulutwe. Tuchinchika ne kwikala na bulume bwa kuba bintu, bino ke byubilo biji na bantu batangijilwa na mupashi wazhila. (Byu. 4:31) Kunungapo, umvwe twakepeshako moyo kupichila mu bukwasho bwa Yehoba, tukosesha lwitabilo lwetu ne kuketekela mwi aye amba uketukwasha. (Isa. 33:2) Kabiji twikala balusekelo na mambo a kuyuka’mba tubena kutokesha Shetu wa mwiulu ku muchima. (1 Pe. 4:13, 14) Onkao mambo, kwakubula kuchiina, twayai tutwajijile kusapwila mambo a Bufumu na kuchinchika saka twaketekela mwi Yehoba kimye kyonse amba uketukwasha!