Nanchi Mwakonsha Kukwasha Muntu Wabula Kwitabila uji mu Masongola na Nyenga Nangwa na Mulongo Nyi?
1. Mambo ka o kyaikela kuba’mba bena Kilishitu baji mu masongola na babula kwitabila kechi bo bonkatu bakeba bena kwabo kwiya mu bukine ne?
1 Nanchi basapwishi bamo mu kipwilo kyenu baji mu masongola na babula kwitabila nyi? Inge mo baji, ko kuba’mba bakeba bena kwabo kwiya mu mpompwelo ya kine. Pano bino, kechi bo bonkatu bakeba bena kwabo kwiya mu bukine ne. Byonka biji Lesa, ne bonse ba mu kipwilo nabo bakeba “bantu bonse bapuluke, bakayukishe bya bukine.” (1 Timo. 2:4) Atweba bonse basapwishi mu kipwilo, twakonsha kukwasha byepi babula kwitabila baji mu masongola na banyenga nangwa na balongo?
2. Maana aketulengela byepi kuyuka bya kukwasha wabula kwitabila uji mu masongola na nyenga nangwa na mulongo?
2 Patanshi twafwainwa kuyuka bibena kulanguluka wabula kwitabila. Bavula babula kwitabila batemwa baana babo kabiji bakeba kwikala bulongo mu masongola, pano bino baya mu bupopweshi bukwabo. Kampe baitabila mu bupopweshi bwapusana na bwetu. Nangwa kechi bayuka bulongo biji Bakamonyi ba kwa Yehoba ne, na mambo a bya bubela byo bebabujile ku bakwabo. Bamo bazhingijila bena kwabo pa kimye kyo bengijisha ku bya mpopwelo mu kifulo kya kwikala na kisemi byonka byo baubanga kala. Maana aketulengela kwikala na mushingi na babula kwitabila kwakubula kukizhamo kwibachinuzhuka.—Mana 16:20-23.
3. Ñanyi jishinda jawama kukwashishamo wabula kwitabila kwiya mu bukine?
3 Batai Muchima: Jishinda jawama kukwashishamo wabula kwitabila kwiya mu bukine, ke kutendekelapo kumumwesha byubilo byawama kechi misambo ya mu Baibolo ne. (1 Pe. 3:1, 2) Kwibata muchima kwanema bingi. Banyenga mu kipwilo bafwainwa kuta muchima wamukazhi wabula kwitabila ne balongo nabo wamulume wabula kwitabila. Mu ñanyi jishinda?
4. Twakonsha kumwesha byepi kuba’mba twibata muchima?
4 Inge mukyangye kumonañanapo na mwina kwabo, kyakonsha kuwama kwisambila jimo na mwina kwanji upwila. Kange kimufichishe ku muchima inge pa kimye kitanshi wabula kwimukasulukila ne. Kwibakasulukila ne kwibata muchima kwakonsha kwibalengela kutendeka kumona bulongo Bakamonyi ba kwa Yehoba. (Loma 12:20) Bena Kilishitu bamo bakoma ku mupashi beta kisemi kya wabula kwitabila ku mazubo abo pa kuba’mba beyuke bulongo kabiji ne kwibalengela kubula misalululo. Besamba pa bintu byo atemwa, mu kifulo kya kukosela kwisamba byambo bya Lesa. Pa kupitapo kimye, inge wabula kwitabila wibakasulukila popo batendeka kwisamba pa Binembelo. Nangwa wakonsha kuswa kuya na kupwila na kumona bibena kufunda mukazhanji na mambo a kuba’mba wayukapo bamo mu kipwilo. Nangwa inge kechi ukeba kwisamba pa bukine ne, mwakonsha kumusanchila pa byo abena kulama bulongo bena kwanji baitabila.
5. Bakulumpe mu kipwilo bakonsha kukwasha byepi wabula kwitabila?
5 Bakulumpe mu kipwilo bafwainwa kuta muchima babula kwitabila baji mu masongola na banyenga nangwa balongo ne kumonangapo tubimye twa kwibasapwila. Wabula kwitabila ubula kuteleka ku Mambo a Lesa wakonsha kutako muchima inge uji mu kipatela nangwa waponenwa na bya malwa. Inge baji mu masongola na wabula kwitabila baikala mu bya malwa, nabiji lufu lwa wa mu kisemi, bakulumpe mu kipwilo bakonsha kumwambila wabula kwitabila kwikalapo kimye kyo babena kutekenesha wa mu kisemi.
6. Mambo ka o twafwainwa kutela muchima babula kwitabila baji mu masongola na balongo ne banyenga?
6 Fwanyikizhai lusekelo lwakonsha kwikala na mwina Kilishitu inge mwina kwanji waiya mu bukine! Kino kisangajika bingi Yehoba, bamalaika ne bonse ba mu kipwilo. (Luka 15:7, 10) Nangwa byonkabyo, inge wabula kwitabila kechi utako muchima ne, kimotu twikala na lusekelo mambo twayuka kuba’mba tubena kutokesha Yehoba pa muchima, aye ubula “kusaka nangwa umo onaike ne, poso amba, bonse balapile.”—2 Pe. 3:9.
[Mabulañano pa peja 6]
Jishinda jawama kukwashishamo wabula kwitabila kwiya mu bukine, ke kutendekelapo kumumwesha byubilo byawama kechi misambo ya mu Baibolo ne