Kusapwila Banabalume
1. Ñanyi lukatazho lujiko ano moba pa mambo a kutangijila bintu bya Bufumu?
1 Mwingilo wa kusapwila mambo awama a Bufumu byo a bena kuyilako pa lutwe mu ano moba apelako, kubena kukebewa banabalume bafikapo ku mupashi bakutangijila mu bipwilo. (Mako 4:30-32; Byu. 20:28; 1 Timo. 3:1-13) Bino mu mapunzha amo, banabakazhi bavula bo babena kutambwila mambo awama a Bufumu kukila banabalume. Mu bisho bimo, banabalume balanguluka’mba banabakazhi bo bafwainwa kufunjisha baana bintu bya ku mupashi. Pano twakonsha kutundaika byepi banabalume kuta muchima ku bintu bya ku mupashi ne kwiya mu bupopweshi bwa kine?
2. Ñanyi bintu byawama byafumine mu mwingilo wa ba Paulo ne Petelo wa kusapwila banabalume?
2 Tai Muchima Kusapwila Banabalume: Mwanamulume inge waswa bukine, wakonsha kulengela kisemi kyanji kwiya mu bupopweshi bwa kine. Kya kumwenako, byo bebatayile mu kaleya na mambo a kusapwila, ba Paulo ne Silasa basapwijile muota. Uno mwanamulume ne ba mu nzubo yanji bonse babatizwe. (Byu. 16:25-34) Na mambo a busapwishi bwa kwa Paulo mu Kolinda, “Kilishipusa, mukulumpe wa nshinagoga wamwitabile Nkambo ne ba mu nzubo yanji bonse pamo.” (Byu. 18:8) Yehoba waingijishe Petelo kusapwila Koneleusa, mukulumpe wa bashilikale ye balumbulula’mba “wanemekanga Lesa ne kumwakamwa.” Koneleusa pamo ne balongo banji, kabiji ne balunda nanji babatizwe.—Byu. 10:1-48.
3. Bañanyi “baji mu bukulumpe” bo mwafwainwa kusapwila byonka byaubile Filipa?
3 Kusapwila banabalume “baji mu bukulumpe” mwakonsha kufuma byawama bingi. (1 Timo. 2:1, 2) Kya kumwenako, malaika wa Yehoba wamwambijile Filipa kuya na kusapwila “mwanamulume wapewe lūsa lukatampe” waji kalama wa nsabo yonse ya mfumu wamukazhi mwina Etiopya. Filipa byo aumvwine mwanamulume kasa “atanga na jiwi jikatampe mu ngauzhi Isaya” wamusapwijile mambo awama a Yesu. Uno mwina Etiopya waikele ke mwana wa bwanga kabiji kampe watwajile ne mambo awama ku ntanda ya kwabo. Kampe wasapwijile ku mfumu wamukazhi ne ku ba mu kipango kyanji babujile kwikala na jishuko ja kumvwa mambo awama.—Byu. 8:26-39.
4. Twakonsha kulengela byepi banabalume bavula kumvwa mambo awama?
4 Bya Kutana Banabalume: Byo kiji kuba’mba banabalume javula bekala ku nkito kimye kya mute, abya mwakonsha kunengezha mutanchi wenu kuba’mba mwikalenga na kimye kya kuya mu mwingilo mabanga, ku mpelo ya milungu, ne mu moba a kukokoloka nyi? Kwingila javula mu nyaunda ya busulu kukemulengela kusapwila banabalume babula kutanwa pa mazubo. Balongo nabo bakonsha kweseka na ngovu kusapwila banabalume bakwabo mobengijila. Mu busapwishi bwa ku nzubo ku nzubo, kikatakata mu nyaunda mo mwingijila javula, balongo bafwainwa kwipuzhanga kuba’mba besambeko na mwanamulume mwine mwina nzubo.
5. Nyenga wakonsha kuba byepi inge watana wamulume watambwila mambo awama?
5 Inge nyenga watana wamulume ukeba kufunda bukine kechi wafwainwa kubwelako bunke bwanji ne. Wafwainwa kuya na mwata wanji nangwa na musapwishi mukwabo. Umvwe uno muntu ke ayileko palutwe, kyawama kumupana ku mulongo kuba’mba atwajijile kumufunjisha.
6. Twakonsha kulonda byepi mutumwa Paulo pa kuba’mba ‘tumwenemo bavujisha’?
6 Salululai Mitwe Yakonsha Kwibazakula Muchima: Mutumwa Paulo walangulukilanga jimo pa bantu bo aambangako ne kuyuka mwakwambila pa kuba mba ‘a mwenemo bavujisha.’ (1 Ko. 9:19-23) Ne atweba twafwainwa kusala ne kunengezha bulongo mitwe yakonsha kuzakula banabalume michima. Kya kumwenako, banabalume bavula baji bingi na bijikila na mambo a makatazho a mali, kukeba kafulumende wawama, ne kulamawizha bisemi byabo. Kabiji bakonsha ne kukeba kuyuka nkebelo ya bumi, ntanda byo ikekala kulutwe, ne ene mambo Lesa o aswishisha buyanji. Inge ke twambe pa mitwe ya uno mutundu kikebalengela kukeba kumvwa ku mambo a Bufumu.—Mana. 16:23.
7. Nga bonse mu kipwilo bakonsha kutundaika byepi mwanamulume wabula kwitabila inge watanwa ku kupwila?
7 Kwashai Banabalume Babula Kwitabila: Byo kiji kuba’mba byubilo byawama bya banyenga yetu ba bwina Kilishitu byakonsha kulengela bamwata wabo babula kwitabila kwaluka, ba mu kipwilo nabo bakonsha kukwasha. (1 Pe. 3:1-4) Inge mwanamulume wabula kwitabila waiya na kupwila na mukazhanji, kumutambwila bulongo ku ba mu kipwilo kwakonsha kumutundaika. Byo aiya na kupwila kibena kumwesha’mba kampe ujiko na lusekelo lwa kukeba kuyuka bukine, kabiji kampe wakonsha ne kuswa kufunda Baibolo.
8. Nga balongo bakonsha kukwasha byepi banabalume babula kwitabila babula kumwesha lusekelo lwantaka lwa kufunda bukine?
8 Banabalume bamo kechi bamwesha lusekelo ponkapotu ne, bino mukuya kwa moba bakonsha kuswa kufunda Baibolo na muntu ye bakasulukila. Mu kipwilo kimo, balongo bafwakeshanga nyenga wajinga na mulume wabula kwitabila ne kwisamba na uno mwanamulume bintu byo atemenwe. Ko kyakayanga batatwile kwisamba pa bintu bya ku mupashi, kabiji kino kimye uno mwanamulume ke mulongo wabatizwa. Kabiji mulongo umo wakwashisheko mwanamulume wabula kwitabila kushimika luvimba kuzhokolosha nzubo yanji. Kumuta muchima mu jino jishinda, kwamulengejile kuswa lufunjisho lwa Baibolo. (Nga. 6:10; Fili. 2:4) Inge mwi mulongo wa bwina Kilishitu, nga mambo ka akubujila kukwashapo mwanamulume umo wabula kwitabila?
9. Mu kufunjisha banabalume ba bwina Kilishitu mwakonsha kufuma ka?
9 Kufunjisha Banabalume Bakukengilanga Kulutwe: Banabalume batambwila mambo a Bufumu ne kukanamina mashuko mu mwingilo wa Yehoba, bakonsha kwikala “byabupetu ku bantu,” bakulumpe ba bwina Kilishitu bengijisha maana ne bulume bwabo kwimenako kipwilo kya bantu ba Yehoba. (Efi. 4:8; Sala. 68:18) Bano banabalume balama kipwilo kya Lesa na muchima wa kifyele. (1 Pe. 5:2, 3) Bakwasha bingi balongo mwaya ntanda.
10. Bantu bavula bamwenejilemo byepi mu mwingilo wa kwa Ananyasa wa kukwasha Paulo?
10 Kya kumwenako, Saulo washikilwe bena kilishitu waalukile ke “mutumwa wa Bagentila.” (Lo. 11:13) Mwana wa bwanga aye Ananyasa wakankazhamine ne kumusapwila na mambo a lupato lwanji. Nangwa byonkabyo, Ananyasa walondejile byo ba mubujile kwi Nkambo, ne kwamba na uno mwanamulume waalukile ke mutumwa Paulo. Pa myaka yavula, mwingilo wa kwa Paulo wakwashishe bantu bavula bingi boasapwilanga kubikapotu ne ba lelo jino babena kumwenamo mu makalata anji aji mu Baibolo o anembele na lutangijilo lwa mupashi wa Lesa.—Byu. 9:3-19; 2 Timo. 3:16, 17.
11. Mambo ka o twafwainwa kwibikilako kumonapo mashinda a kusapwilamo banabalume?
11 Onkao mambo, twayai twibikengako kumonapo mashinda a kusapwilamo banabalume. Inge ketube bibye, Yehoba uketukwasha mu mingilo yetu ya kuba kyaswa muchima wanji ne ya kutangijila bintu bya Bufumu.