Mwingilo Uleta Lusekelo Lukatampe
1. Ñanyi mwingilo wa kubuka bantu ku mupashi ubena kwingijiwa mu ano moba?
1 Mu myaka kitota kitanshi aba bamweneko byabukilwenga bantu kibaletejile bingi lusekelo. (Luka 5:24-26) Mu ano moba mwingilo wa kubuka bantu ku mupashi wituletela lusekelo lukatampe. (Lum. 22:1, 2, 17) Kituletela bingi lusekelo kutanga mashimikila a bantu bapimpula bwikalo bwabo na mambo a bukwasho bwa Yehoba kupichila mu Mambo anji ne mupashi wazhila. Kikwabo kituletela lusekelo lukatampe ke kwingilako mu uno mwingilo kupichila mu kufunjisha mafunjisho a Baibolo abena kununguluka.
2. Ñanyi bintu bituletela lusekelo byo tufunjisha bantu bukine?
2 Lesa jizhina janji ñanyi? Mambo ka o aswishisha buyanji? Bufumu bwa Lesa bukobila ka bantu? Kukumbula mepuzho kechi kokwituletelatu lusekelo ne, bino ne kumona ye tufunjisha byo ekala na lusekelo umvwe wafunda bukine. (Mana. 15:23; Luka 24:32) Umvwe ye tufunjisha ubena kununguluka utendeka kwingijisha jizhina ja Yehoba, kuvwala bulongo, kuleka byubilo byatama ne kutendeka kusapwila ku bakwabo. Umvwe wipana ne kubatizwa wikala ke mulongo wetu kabiji mukwetu wa mwingilo. Bino byonse bituletela bingi lusekelo.—1 Tesa. 2:19, 20.
3. Ñanyi mashinda akonsha kwitukwasha kutendekelamo lufunjisho lwa Baibolo?
3 Nanchi Mwakonsha Kwingilako Nyi? Inge mukeba kwingilako uno mwingilo uleta lusekelo, lombai Yehoba kwimukwasha kumonapo muntu wa kufunjisha Baibolo ne kwingijila monka mwayila milombelo yenu. (1 Yoa. 5:14) Sapwilainga kutanwa bantu. Tendekainga lufunjisho lwa Baibolo pa kimye kyonse kyafwainwa. (Sapwi. 11:6) Inge mwatana bantu bamwesha lusekelo ne kubyala lukunwa wa bukine, bwelaiko na kutekezha.—1 Ko. 3:6-9.
4. Mambo ka o twafwainwa kutelapo muchima kufunjisha mafunjisho a Baibolo?
4 Bantu bavula baji na nzala ne kilaka kya bololoke. Bañanyi bakonsha kwibakwasha kuyuka Yehoba kupichila mu kwibafunjisha Baibolo? (Mat. 5:3, 6) Atweba bonse twayai twipane na muchima yense kwingilako mwingilo wa kusapwila ne kulenga baana ba bwanga, uno mwingilo wa kunowa saka akyangye kupwa.—Isa. 6:8.