Nanchi Mwaingijilepo Bupainiya bwa Kimye Kyonse Kunyumakwe Nyi?

1. Jishuko ka bavula jo bamwenamo, pano bino bakwabo nabo baubapo ka?

¹ Pa myaka yavula yapitapo, bantu bavula baingilako mwingilo wa kimye kyonse, bamwenamo bingi mu ‘kufunjisha ne kusapwila mambo awama.’ (Byu. 5:42) Nangwa byonkabyo, bamo baleka kwingila bupainiya na mambo a bintu byapusana pusana. Umvwe mwaingijilepo kala bupainiya bwa kimye kyonse, nanchi mwamona amba bwikalo bwenu luno bwakonsha kwimuswisha kwingilako bupainiya jikwabo nyi?

2. Mambo ka aba baingijilepo kala bupainiya o bakonshesha kulangulukapo pa biji bwikalo bwabo luno?

² Bintu Byaluka: Kampepo lukatazho lwimulengejile kuleka bupainiya, pa kino kimye lwapwa. Kyakumwenako, umvwe mwalekele bupainiya na mambo a kukankalwa kufikizha maola 90 akebewanga pa ñondo, nanchi luno kibelengelo kya maola byo bekikepeshako kubwela pa 70, mwakonsha kutendeka bupainiya jikwabo nyi? Abya kufuma kimye kyo mwalekele bupainiya, nkito ya ku mubiji nangwa mingilo ya mu kisemi yakepako nyi? Nyenga umo walekela bupainiya na mambo a kukolwa, waishile kutendeka jikwabo bupainiya kimye kyo ajinga na myaka 89. Waikele kukila pa mwaka umo kwa kubula kubwelamo mu kipatela kabiji wamwene kuba’mba kino kyakonsha kumulengela kutendeka bupainiya jikwabo!

3. Ba mu kisemi bakonsha kukwatankena byepi pamo kuba’mba bakwashe umo wa mu kisemi kyabo kwingilako bupainiya?

³ Kampe kechi mwakingilapo kala bupainiya ne, bino kampe umo wa mu kisemi kyenu walekele bupainiya na mambo a kukeba kulama wa mu kisemi, nabiji nsemi wakota. (1 Timo. 5:4, 8) Umvwe kiji bino, abya anweba nangwa bakwabo mu kisemi mwakonsha kukwasha yewa walekele bupainiya nyi? Mambo ka a kubula kwisambila pamo bonse? (Mana. 15:22) Umvwe ba mu kisemi bakwatankena pamo kuba’mba bakwashe umo wa mu kisemi kwingilako bupainiya, bonse bakeumvwa’mba bauba kintu kyanema.

4. Mwakonsha kuba byepi inge kya kuba pa kino kimye kechi mwakonsha kutendeka jikwabo bupainiya ne?

⁴ Kechi mwafwainwa kulefulwa umvwe bwikalo bwenu luno kechi bubena kwimuswisha kutendeka jikwabo bupainiya ne. Kukebesha kwenu kwa kwingilako bupainiya kutokesha Yehoba ku muchima. (2 Ko. 8:12) Ingijishainga bintu byo mwafunjile mu bupainiya mu mwingilo wenu luno. Lombelaingapo pa kukebesha kwenu kwa kwingilako bupainiya ne kumonapo mashinda mo mwakonsha kwalwilamo bwikalo bwenu. (1 Yoa. 5:14) Kampepo, mu kuya kwa kimye, Yehoba ‘ukemushinkwila kibelo kikatampe kya mwingilo’ kuba’mba mukekale jikwabo ba lusekelo pa kwingilako bupainiya bwa kimye kyonse!—1 Ko. 16:9.