Lwainga Bulongo
1. 1 Kolinda 9:26 wakonsha kwingila byepi mu mwingilo?
1 Mutumwa Paulo wanembele’mba: “Amiwa kechi nnyema kinyemenyemetu ne; kabiji byo ndwa kechi mpumatu mu mwela ne.” (1 Ko. 9:26) Paulo waambilenga pa byo atele muchima ku kufikizha bikonkwanyi bya kwingijila Yehoba bulongo. Nangwa byonkabyo, bino byambo bingila ne ku mwingilo wa kusapwila. Tukeba ‘kulwa’ nangwa amba kwingijisha bulume bwetu bulongo pa kuba’mba mukafume byawama. Mu ñanyi jishinda?
2. Twakonsha kulondela byepi Paulo ne basapwishi bakwabo ba mu myaka kitota kitanshi pa kusala kimye ne mpunzha ko twafwainwa kuya na kusapwila?
2 Yainga Kutanwa Bantu: Paulo ne basapwishi bakwabo ba mu myaka kitota kitanshi basapwijilenga ku mapunzha ko bamwenenga amba ko kutanwa bantu. (Byu. 5:42; 16:13; 17:17) Ne atweba mu nyaunda yetu inge bavula batanwa pa mazubo kimye kya mabanga, kino kyo kyakonsha kwikala kimye kyawama kusapwila ku nzubo ku nzubo. Nanchi pa kilata kya masakya nangwa mashitima pakinsankena bantu bavula kimye kya lukelo pa kuya ku makito nangwa kimye kya mabanga a bufuku pa kukomboka nyi? Ñanyi kimye kivula bantu mu nyaunda ya busulu? Kyakonsha kuwama bingi kwingila busapwishi bwa mu mukwakwa mu bimye bya uno mutundu.
3. Twakonsha kulwa nangwa amba kwingila byepi bulongo kwesakana na jishinda jo twingijilamo mu nyaunda yetu?
3 Ingilainga Bulongo mu Nyaunda: Kabiji twafwainwa ne kujimuka pa kuba’mba tulwenga nangwa amba kwingila bulongo mu nyaunda yetu. Kyakumwenako, mu kifulo kya kuya na jibumba jabaya mu mpunzha imo, musakukebewanga kimye ne mwingilo mukatampe wa kulama bulongo jibumba kuba’mba jingilenga, kyakonsha kuwama kwabanyapo jibumba. Abya twakonsha kutambulako nyaunda yetu bunke iji kwipi na nzubo yetu, pa kuba’mba tubulenga kwenda kimye kyabaya nyi?
4. Ñanyi kintu kyakonsha kwitukwasha kwingila bulongo mwingilo wa ‘kukwata bantu’?
4 Yesu wapashañenye basapwishi ku bamwingilo “bakukwata bantu.” (Mako 1:17) Muntu ukwata masabi, mwingilo wanji kechi wa kuteyatu bukonde ne, bino ke wa kukwata masabi. Onkao mambo, bantu bayuka kukwata masabi baya pa mpunzha po baketekela kutana masabi kabiji ne kimye kyafwainwa kwiakwachilapo, kepo batendeka kukwata masabi kwa kubula nangwa kukwata ku lusono ne. Kya kine, bengijisha ngovu yabo bulongo. Ne atweba twayai twingilenga na ngovu mu mwingilo wetu wa kusapwila.—Hebe. 6:11.