Ingijishainga Mashinda Awama Kusolomokelamo Bantu
1. Twakonsha kufunjilako ka ku mashinda apusana pusana aingijishanga bena Kilishitu batanshi?
1 Bena Kilishitu batanshi basapwilanga mambo awama ku bantu bamishobo yapusana pusana ne bupopweshi bwapusana pusana. (Kolo. 1:23) Nangwa kya kuba mutwe ye baambilengapo waambilengatu pa kintutu kimo, Bufumu bwa Lesa, pano bino baingijishanga mashinda apusana pusana kusolomokelamo bantu kwesakana na byo bajinga. Kyakumwenako, Petelo kimye kyoesambilenga na Bayudea banemekele Binembelo, waingijishe byambo bya mu binembelo byaambile ngauzhi Yoela. (Byu. 2:14-17) Paulo naye waingijishe jishinda japusanako byo esambilenga na Bangiliki byonka byo kyanembwa pa Byubilo 17:22-31. Ne lelo jino, bantu baji mu manyaunda amo banemeka bingi Binembelo, onkao mambo twafwainwa kwingijisha Baibolo kimye kyotubena kwingila busapwishi bwa ku nzubo ku nzubo. Nangwa byonkabyo, twakonsha ne kwamba na mushingi kimye kyo tubena kwisamba na bantu bakana kufunda Baibolo nangwa babula kwitabila mu bupopweshi nangwa baji mu bupopweshi bwabula bwa bwina Kilishitu.
2. Twakonsha kwingijisha byepi mabuku pa kuba’mba tukwashe bantu banemeka Baibolo ne babula ku munemeka?
2 Ingijishainga Bulongo Mabuku: Mabuku a kusha mu uno mwaka wa mwingilo bakeapimpulanga pa kupitapo bañondo babiji, kabiji ano ke magazini, matalakiti ne mabuloshuwa. Umvwe bantu baji mu nyaunda yetu kechi bakeba kufunda Baibolo ne, twakonsha kwisamba nabo kibaba kiji mu magazini, talakiti nangwa buloshuwa kyakonsha kwibalengela kukeba kufunda Baibolo. Kimye kimo kechi twakonsha kutanga kinembelo nangwa kwisamba biji mu Baibolo pa kimye kitanshi ne, pano bino umvwe muntu wamwesha lusekelo, twafwainwa kubwelako pa kuba’mba tumukwashe kwitabila mu Mulenga ne mu Mambo anji anembeshiwa na Mupashi. Jishinda jikwabo, umvwe tubena kusapwila mu nyaunda muji bantu banemeka Baibolo, twakonsha kusha mabuku ne kwingijisha jishinda jakwatankana na byotubena kwisambapo. Twakonsha ne kusha buku wa Baibolo Ufunjisha nangwa buloshuwa wa Umvwainga Byamba Lesa nangwa Umvwainga Byamba Lesa Mukekale Myaka, kimye kiji kyonse nangwa kya kuba kechi o mabuku akusha muyewo ñondo ne. Kine kintu ke kwingijisha jishinda jawama jakonsha kulengela bantu kwikala na kilaka kya kukeba kufunda pe Yehoba.
3. Mu ñanyi jishinda bantu baji mu nyaunda yetu mobaikela nobe mushiji?
3 Nengezha Mushiji: Muchima wa muntu ujitu nobe mushiji. (Luka 8:15) Mushiji umo ukebewa kutako maana kumunengezha bulongo pa kuba’mba nkunwa ya bukine ikizhe mizhazhi ne kutendeka kukoma. Bena Kilishitu batanshi bakusanga nkunwa pa mushiji wapusana pusana kabiji kino kibaletejile lusekelo. (Byu. 13:48, 52) Ne atweba twakonsha kwingila byonkabyo umvwe twibikishako kuyuka bya kwisamba na bantu.