Kakitenguluzha Ka Mepuzho

◼ Ñanyi bintu banyike byo bafwainwa kufunda pa kuba’mba bakome mu maana a kuyuka Lesa?

Bansemi bena Kilishitu bengila bingi pa kuba’mba bakomeshe bulongo baana babo “mu kwibajimuna ne kwibafunjisha milanguluko ya Yehoba.” (Efi. 6:4) Kya kumwenako, bansemi bavula batana kuba’mba kyanema bingi kubalaula kinembelo kya juba na baana babo lukelo. Kimye kyo baji na kupopwela kwa kisemi ne pa bimye bikwabo, bakonsha kusalapo kutamba vidyo ne kwisamba panyuma ya kwiitamba, kwisamba pa bibaba bimo biji pa mutwe wa kuba’mba Banyike Bepuzha Amba Ka pa keyala wetu wa intaneti, kubapo kifwanyikizho kya jishimikila ja mu Baibolo nangwa kya bintu baana byo batalañana nabyo pa juba pa juba. Bino, pa kuba’mba baana ‘bakomenga,’ kyanema ne kwibafunjisha bishinka byazhika bya mu Baibolo.—Hebe. 6:1.

Langulukai pa byo tufunjisha bantu bo tusambakana mu nyaunda yetu. Kimye kitanshi kyo twisamba nabo nangwa byo tubwelako jibiji, tukeba kutendeka lufunjisho lwa Baibolo kwingijisha buku wa Nanchi Baibolo Kine Ufunjisha’mba Ka? Panyuma ya kupwisha uno buku, tutendeka buku wa ‘Ikalai Monka Mu Butemwe bwa Lesa.’ Mambo ka o tubila bino? Buku wa Baibolo Ufunjisha ukwashako muntu ye tubena kufunjisha kuyuka mafunjisho atanshi a bukine bwa mu Baibolo. Buku wa ‘Butemwa bwa Lesa’ wibafunjisha bya kwingijisha mafunde a mu Baibolo pa juba pa juba. Kwingijisha ano mabuku onse kukwasha bakatataka “kutabilamo” mwi Kilishitu ne “kukoselamo mu lwitabilo.” (Kolo. 2:6, 7) Nanchi ano mabuku kechi akonsha kukwasha baana betu ne nyi? Baana betu nabo bafwainwa kufunda pa bukuzhi, Bufumu, ne byo kikala muntu inge wafwa. Bafwainwa kufunda pa ene mambo Lesa o aswishisha buyanji ne bya kuyuka amba tubena kwikala mu moba apelako. Bafwainwa kushiinwa amba Bakamonyi ba kwa Yehoba bo bafunjisha bukine. Bano baana bafwainwa ne kuyuka mafunde a mu Baibolo ne bya kwikala na “maana a kupima bintu.” (Hebe. 5:14) Ibyo kuba’mba bansemi bafwainwa kutala ne pa kimino kya mwana ne maana anji a kukwatankanya bintu byo babena kumufunjisha. Nangwa byonkabyo, baana bavula baji na maana a kutendeka kufunda bishinka byazhika bya mu Baibolo saka bakijitu banyike.—Luka 2:42, 46, 47.