Mashinda a Kwingijisha Pa Kupopwela kwa Kisemi
1. Ñanyi nkebelo ya bibaaba bimo biji mu mabuku etu?
1 Mabuku etu avula aji na bibaaba byo banembela kukwasha banyike ne bansemi kukwatankana ne kufwenya kwipi ne Yehoba. (Mpitu. 6:6, 7) Mwakonsha kwingijisha byepi bino bibaaba kufunjisha baana benu?
2. Mwakonsha kusala byepi byo mwafwainwa kufunjisha baana benu kwesakana na kimino kyo bajipo?
2 Kumina Kumo Ne: Baana baenda kupusana pusana. (1 Ko. 13:11) Pano mwakonsha kusala byepi byo mwafwainwa kufunjisha mwanenu kwesakana na kimino kyanji? Ishikishai amba: ‘Ñanyi bintu byo bafwainwa kutemwa baana bami? Nanchi bakonsha kwibyumvwa nyi? Kimye kyalepa byepi kyo bakonsha kwikala na kwisamba pa uno mutwe?’ Umvwe kya kuba muji na baana baji na myaka ya kusemwa isatu nangwa kubwela panshi, mwakonsha kwisamba nabo mashimikila atanwa panembwa amba “Byo Mfunda Baibolo” pa Intaneti. Bisemi bimo bengijisha mashimikila a mu Baibolo atanwa panembwa amba “Funjishai Baana Benu.” Mwakonsha ne kwingijisha bino byalondelapo.
3. Kupopwela kwa kisemi ke kimye kya kuba ka?
3 Bisemi bimo binengezha kupwila pamo. Kuba bino kujitu bulongo, bino kechi byo byonka byo twafwainwa kubatu pa kupopwela kwa kisemi ne. Kupopwela kwa kisemi kechi kwafwainwa kwikala nobe tuji ku kipwilo ne. Kimye kya kupopwela kwa kisemi kyafwainwa kwikala kya kwisamba ne kwamba biji ku muchima. Ke kimye kyo twafwainwa kwisamba pa bintu byo tulanguluka ne misambo yawama bulongo. Muntu pa kubankula buki wafwainwa kuyuka bya kwibubankula. Ne nsemi naye wafwainwa kwingijishapo mashinda amo pa kuba’mba ayuke bibena kulanguluka baana pa bintu byanema kabiji mu kuba bino mufuma byawama bingi. Kupopwela kwa kisemi ke kimye kya lusekelo.
4. Bansemi bakonsha kuyuka byepi bilanguluka baana babo kimye kyo babena kunengezha kupopwela kwa kisemi?
4 Anweba Bansemi, Fwanyikizhainga Bilanguluka Baana Benu: Umvwe muji na baana babacheche langulukai pa ano mashinda alondelapo:
• Nengezhaipo kifwanyikizho kimo kibena kwamba pa jishimikila ja mu Baibolo. Nanchi mwanenu wakonsha kuvwala ne kusombolola byonka byaubanga bantu bakala nyi? Nanchi bakwabo bakonsha kuyuka ye abena kusombolola nyi?
• Kopololai bipikichala bya mu mabuku etu. Vulukai kuba’mba: Pa bipikichala kechi pekala byambo ne, onkao mambo mwafwainwa kwingijisha bipikichala byabula misombelo bitanwa mu Labainga! wa Kizungu. Nanchi mwakonsha kwibilamika mu nzubo yenu nyi?
• Ingijishaipo bimo byakonsha kutundaika baana benu kufwanyikizhanga bintu. Bambilai bashimikizhe pe Nowa, Mosesa, Yosefwa, Maliya, Petelo ne bakwabotu byo bakonsheshe kwikala ne kwiumvwa.
• Tangilai pamo bibaaba byo mwasala.
• Fundainga kwimba Nyimbo ya Bufumu. Nanchi mwakonsha kukebapo kijimba nangwa kulenga ka kijimba ka kwingijisha pa kwimba nyimbo nyi?
5. Mambo ka bansemi o bafwainwa kulombela bukwasho bwa Yehoba pa kufunjisha baana babo bukine?
5 Anweba bansemi, Yehoba ukeba kuba’mba mwingile bulongo mwingilo wa bunsemi. Mulombainga pa kuba’mba emukwashenga kufunjisha baana benu bukine. (Mito. 13:8) Na bukwasho bwa Yehoba, mwakonsha kufunjisha baana kwikala “na maana a kumona lupulukilo kupichila mu kwikala na lwitabilo mwi Kilishitu Yesu.”—2 Tim. 3:15; Mana 4:1-4.