Ingijishainga Keyala wa jw.org mu Mwingilo—“Ikala Mulunda na Yehoba”

Kipungu kya pa jw.org kya kuba’mba “Bifunjisha Baibolo” mutanwa kipungu kya baana kya “Ikala Mulunda na Yehoba,” muji nyimbo, mavidyo ne mafunjisho. Nanchi mwakingijishapo kino kipungu mu mwingilo nyi? Inge mubena kufunda Baibolo na nsemi uji na baana, mwafwainwa kumumwesha. Kino kyafwainwa kumulengela kukebelapo ne bintu bikwabo biji pa Keyala wetu.

Mulongo umo byo asampenyenga talakiti wa Mambo a Bufumu Na. 38, wataine mwanamukazhi awo watendekele kutanga talakiti panyumatu ya kumupa. Wajinga na banyike bavula bakebelenga kuyuka byaambilengapo talakiti. Mulongo wisambile nabo pacheche pa byajinga mu uno talakiti ne kwibamwesha Keyala wajinga kunyuma. Na mambo a kuba’mba uno mwanamukazhi wamwesheshe lusekelo, wamutambisheko vidyo wa Kaleba pamo na baana banji kwingijisha foni.

Nyenga umo wabujile mukwabo mo bengijila uji na baana pa Keyala wetu ne bintu bijipo byaamba pa bisemi. Uno mwanamukazhi washinkwile pa jw.org saka aji na baana banji. Panyuma ya bino, wabujile nyenga amba baana banji baimbilenga saka bakaya lwimbo wa kuba’mba “Sapwilainga Mambo,” pa nyimbo iji mu kipungu kya “Ikala Mulunda na Yehoba.”

Mwafwainwa kuyuka kino kipungu kiji pa jw.org ne kukopolola mavidyo, nyimbo nangwa mafunjisho pa foni wenu. Kuba bino kukemulengela kwingijishanga kino kipungu kya jw.org mu mwingilo. Ke kingijisho kyawama bingi kyakonsha kwitukwasha kwingijila Nkambo!—Byu. 20:19.