Mambo ka a Kuyila Ponkapotu?

Inge twasambakana kuba’mba tuye mu mwingilo, tukeba bingi kwisamba na balongo. Pano bino, inge kusambakana kwa kuya mu mwingilo kwapwa, twafwainwa kuya mu mwingilo ponkapotu. Mwingilo wetu wa kusapwila ubena kukebewa bingi kumwingila bukiji. (2 Timo. 4:2) Inge twataya kimye na kwisamba, kechi twakonsha kwingila kimye kyabaya mu mwingilo ne. Kimye kyo tubena kwingila na basapwishi mu mwingilo, kyo kimye kyo twafwainwa kwitundaikanga. Kuya mu mwingilo kwa kubula kutaya kimye kumwesha kuba’mba tubena kwingila na ngovu byo tuji ba mwingilo ba kwa Yehoba ne Mwananji.—Loma 12:11.