Ingijishainga Keyala Wetu mu Mwingilo—“Mepuzho a mu Baibolo Akumbulwa”

Kipungu kya “Mafunjisho a mu Baibolo” kiji pa jw.org po patanwa mutwe wa kuba’mba “Mepuzho a mu Baibolo Akumbulwa.” Inge twayuka ano mepuzho epuzha bantu javula aji pa Keyala wetu tukamwesha mwina nzubo mikumbu ya mu Binembelo. Twakonsha ne kwingijisha ano mepuzho kutendekelamo misambo mu mwingilo. Twakonsha kusalapo bwipuzho bwatemwa bantu mu nyaunda yetu ne kwibepuzha byo babena kulangulukapo, apa bino ne kwibabuula byamba Baibolo kupichila mu kwingijisha jw.org. Panyuma ya kuba bino, twakonsha kwibamwesha paji bino byambo. Jishinda jikwabo ke kwibabuula betangila bene pa Keyala. Muka kalama wenda umo usapwila bulongo kupichila mu kwingijisha bwipuzho bwa kuba’mba: “Bantu bavula balanguluka kuba’mba Lesa ye ulengela buyanji, ‘nanchi mwakonsha kutemwa kuyuka mukumbu mu kimyetu kicheche nyi?” Bino apa wabikapo mukumbu ye batangila jimo ye akopolola pa foni wanji. Wabwela wamubuula kitango 11 mu buku wa Baibolo Ufunjisha.