Keyala Wetu wa Intaneti—Mwingijishainga mu Mwingilo
Tundaikainga Bantu Kwingijisha Keyala wa Intaneti: Bantu bamo bakankazhama kwisamba ne atweba nangwa kutambula mabuku etu, bomvwa bulongo kupesapesa pa Bakamonyi ba kwa Yehoba pa keyala wa jw.org mu mazubo abo. Onkao mambo kimye kyonse inge mwamonapo kimye babulai bantu Keyala.
Kumbulai Mepuzho: Kimye kimo mwina nzubo, muntu wamwesha lusekelo, nangwa mulunda netu wakonsha kushikisha mepuzho pa Bakamonyi ba kwa Yehoba nangwa pa byo twaitabilamo. Mukumbulai ponkapotu kupichila mu kwingijisha foni nangwa kompyuta. Kyawama bingi kutanga binembelo byatongolwa pa jipa jiji pa intaneti mu Baibolo. Inge kechi muji na foni nangwa kompyuta uji na Intaneti ne, mulumbulwilai byo akonsha kwingijisha keyala wa jw.org pa kuba’mba etaine mukumbu aye mwine.—Pa keyala wa jw.org, chintai panembwa’mba, “Mafunjisho a mu Baibolo/Mepuzho a mu Baibolo Akumbulwa” nangwa “Pe Atweba/Mepuzho o Bepuzha Javula.”
Tumai Kibaba Nangwa Buku ku Muntu ye Mwayuka: Tuminai pamo na PDF nangwa EPUB. Nangwa kopolwelai buku ye batangila jimo pa selechi. Kimye kyonse kyo mwapa muntu wabula kubatizhiwa buku mutuntulu wa pa selechi, buloshuwa nangwa magazini mwafwainwa kubala’mba mwashajika buku. Kechi mwafwainwa kutuma mabuku mu bufyamfya nangwa kutuma avula ne. Nangwa kwiatuma ku makeyala akwabo a pa intaneti ne.—Chintai panembwa’mba “Mabuku.”
Mumweshai Masawakya Akatataka Aamba pa Bakamonyi ba kwa Yehoba: Kuba bino kukalengela bomufunjisha Baibolo ne bantu bo musapwilako kunemeka mwingilo wetu wa kusapwila mwaya ntanda ne kuyuka bulongo kukwatankana kwetu kwa Bwina Kilishitu. (Sala. 133:1)—Chintai panembwa’mba, “Masawakya.”
[Kipikichala pa peja 5]
(Umvwe mukeba bine byambo, monai mu buku)
Esekai Kumwingijisha
1 Panembwa’mba, “Mabuku,” kebai buku ye mubena kukeba kukopolola ne kuchinta pa byambo nangwa pa byo batangila jimo byo mubena kukeba.
2 Chintai pa “MP3” mumone mutanchi wa bibaba. Chintai pa kibaba nangwa ▸ papo mukopolole pa kuba’mba mutelekeko.
3 Salai mulaka mukwabo pa uno mutanchi inge mubena kukeba kukopolola buku wa mu mulaka kyalo kingi.