Ingijishainga Keyala wa jw.org mu Mwingilo

Keyala wetu wa jw.org bamunengezha kwitukwasha kusapwila mambo awama “monse mwapela ntanda.” (Byu. 1:8) Bantu bavula kechi bayuka bya kutana keyala wa jw.org ne. Bino, bayuka uno keyala inge musapwishi wibamwesha bya kumutana.

Kalama wenda umo wakopolola vidyo wa kuba’mba Mambo ka a Kufunjila Baibolo? pa foni wanji kabiji umwesha uno vidyo ku bantu. Inge uji mwingilo wa ku nzubo ku nzubo, wamba’mba: “Mbena kufwakesha bantu ne kwibakwasha kutana mikumbu ya mepuzho asatu anema a kuba’mba: Mambo ka mu ntanda o mwaikela makatazho avula? Lesa ukeapwisha byepi? Kabiji twakonsha kuchinchika byepi kino kimye Lesa kyo akyangye kwiapwisha? Uno vidyo wakumbula ano mepuzho.” Kepo uno kalama achinta pa foni wanji ne kumwesha muntu uno vidyo ne kumona byo asa kubapo. Uno vidyo wawama bingi kya kuba bantu kechi baleka kutamba ne kanatu wapwa yense. Kepo uno kalama amba’mba: “Byonka byo mwamona, mwakonsha kuya pa intaneti ne kulomba kuba’mba muntu emufunjishenga Baibolo. Pano bino, nakonsha kwimumwesha bukiji bukiji bya kufunda Baibolo.” Inge mwina nzubo waswa kufunda, kalama umumwesha bya kufunda Baibolo kwingijisha buloshuwa wa Mambo Awama. Inge mwina nzubo wapayankana, kalama unengezha kubwelako kimye kikwabo. Inge waya pa mpunzha pa kukokolokela, kalama wimuna muntu ye atana pa yoyo mpunzha ne kwingijisha jishinda jintutu jimo ja kwisambilamo. Nanchi mubena kwingijisha keyala wa jw.org mu mwingilo nyi?