Kuwamishako Busendwe Bwetu bwa Kusapwila—Kufunjisha Bafunda Baibolo Mashinda mwa Kwifunjishisha

Ene Mambo o Kwanemena: Pa kuba’mba batwajijile kukoma ku mupashi, bafunda Baibolo kechi bafwainwa kuyukatu mafunjisho atanshi aji mu Mambo a Lesa ne. (Hebe. 5:12–6:1) Pa kufunda kikebewa kwibikako. Mwavwangwa kulanguluka pa byakatataka byo tubena kufunda ne kwibyesakanya na byo twayuka kala ne kuyuka mo byatala. (Maana 2:1-6) Kufunda kukebakeba bunke bwabo kukakwasha bafunda Baibolo bya kukumbula mepuzho a mu Baibolo kwingijisha mabuku etu a bwina Kilishitu. Inge bebikako kulondela byo bafunda, kino kikebakwasha kushinda meseko o bakapitangamo byo bakekala bena Kilishitu.—Luka 6:47, 48.

Byo Mwafwainwa Kuba:

Ambai pa buneme bwa kulomba bukwasho bwa Yehoba saka akyangye kutendeka kufunda.—Yoa. 14:26; 1 Ko. 2:10.
Kufumatu ku ntendekelo, mutundaikainga kunengezhezha jimo lufunjisho lwa Baibolo. Mumweshai buku wenu, ne kumubula bya kushila nangwa bya kushilatu pa bishinka bibena kukebewa kwapwa.
Mubulai akumbulenga mepuzho mu byambo byanji. Mwipuzhai mepuzho akonsha kumulengela kubula kutangatu mikumbu byonka byo iji mu buku.
Tundaikai ye mufunjisha Baibolo kutangako kipungu kimo mu Mambo a Lesa pa juba pa juba. Mumweshai mutanchi wa kutanga Baibolo uji pa jw.org, nangwa mu Kyamba kya Usopa kya October 1, 2009, jipa 23 kyamwesha bya kuba bino. Kutanga Baibolo pa juba pa juba kukeba kwibikako, bino mukafuma byawama bingi.—Sala. 1:2, 3.
Mumweshai byo afwainwa kutana mikumbu ku mepuzho a mu Baibolo kwingijisha Watchtower Library nangwa Watchtower—BUTALA BWA MABUKU PA INTANETI nangwa Buku wa Kupesapesa. Mukwashai kuyuka tuyukilo twa mabuku o mwingijisha javula pa kupwila kwa kipwilo.

Esekai Kuba Bino uno Ñondo:

Inge mwapwisha kitango nangwa kamutwe, mwambilai kwamba byo mwafunda mu byambo bicheche. Inge mufwaye ye mufunjisha Baibolo, fundainga bya kwamba byambo bicheche byafuma mu jishimikila ja mu Baibolo nangwa mu jifuka ja Kyamba kya Usopa pa kuba’mba muwamisheko ntangilo yenu.