Byubilo Byawama ne Mushingi Mukatampe Byakonsha Kupimpula Muntu

Byubilo byawama bya banabakazhi basongolwa beya mu bukine bilengela bamwatawabo kufunda bukine. Nangwa byonkabyo, pa kuba’mba bamwatawabo bafunde bukine, pafwainwa kupita myaka yavula. (1Pe 2:21-23; 3:1, 2) Inge babena kwimumanyika pa kubula mambo, mwafwainwa kutwajijila na kushinda bubi na byawama. (Lo 12:21) Kampe kimye kimo bamwatawenu kechi bakeba kwisamba nabo pe Yehoba ne, bino inge bamona byubilo byenu byawama, bakonsha kupimpula milanguluko.

Monainga bintu monka mubena kumwena benakwenu. (Fp 2:3, 4) Bamweshainga kifyele ne kwibobila lusa. Kabiji ingilainga bulongo mingilo yenu ya pa nzubo. Telekainga inge babena kwamba. (Ya 1:19) Batekenyainga ne kwibatemwa. Nangwa kya kuba bamwatawenu kechi bemumvwina lusa nangwa kwimunemeka ne, yukai’mba Yehoba wanemeka bingi bukishinka bwenu.—1Pe 2:19, 20.

TAMBAI VIDYO WA KUBA’MBA YEHOBA WITUKWASHA KUSENDA BISENDWA BYETU, APA BINO MUKUMBULE ANO MEPUZHO:

• Bwikalo bwa ba Grace Li bwajinga byepi kimye kyo besongweletu na bamwatawabo?

• Ñanyi kintu kibalengejile kufunda bukine bwa mu Baibolo?

• Nyenga Li byo abatizhiwe, waubile byepi pa kuba’mba achinchike makatazho o apichilengamo?

• Nyenga Li byo bamukatezhenga ku bamwatawanji walombele’mba ka?

• Ñanyi bintu byawama byafuminemo na mambo a kuba Nyenga Li wajinga na byubilo byawama ne mushingi?