LUFUNJISHO 2
Ikalai Bakishinka ku Benakwenu
“Akya kyasambakanya lesa, muntu kechi ekyabanye ne.”—Mako 10:9
Yehoba usaka’mba ‘twikale bakishinka’ ku benakwetu. (Malakai 2:16) Kwikala bakishinka mu masongola kwanema bingi, mambo kyakatazha kuketekela muntu wabula bukishinka. Kuketekela mukwenu kukomesha butemwe mu masongola.
Ano moba kwikala bakishinka mu masongola kechi kwapela ne. Mwafwainwa kuzhikijila masongola enu inge mwalondela bino bintu bibiji.
1 MWAFWAINWA KUNEMEKA MASONGOLA ENU
BYAMBA BAIBOLO: “Muyuke bintu byanemesha.” (Filipai 1:10) Masongola enu anema bingi mu bwikalo bwenu. Kabiji mwafwainwa kwianemeka.
Yehoba ukeba’mba mute muchima benakwenu ne kwikala ‘balusekelo.’ (Musapwishi 9:9) Lesa waamba’mba kechi mwafwainwa kulengulula benakwenu ne, mwafwainwa kwibasangajikanga. (1 Kolinda 10:24) Benakwenu bafwainwa kuyuka’mba mwibanemeka.
BYO MWAKONSHA KUBA:
Jonse saka muta muchima bena kwenu
Kulangulukangatu pa bintu bimuwamina anweba bunke bwenu ne
2 LAMAI MUCHIMA WENU
BYAMBA BAIBOLO: “Yense utala mwanamukazhi na lwiso lwa kumukumbwa, wauba nanji kala bukende monka mu muchima wanji.” (Mateo 5:28) Inge muntu saka alanguluka pa byubilo byatama, ko kuba’mba kechi wa kishinka ku mwinakwanji ne.
Yehoba wakambizha’mba, “lama muchima wobe.” (Byambo bya Mana 4:23; Yelemiya 17:9) Kino kibena kulumbulula’mba twafwainwa kusalanga bintu bya kutamba. (Mateo 5:29, 30) Twafwainwa kubanga byonka byaubile mushakulu Yoba wazhijikile meso anji kubula kutala mwanamukazhi mukwabo na lwiso. (Yoba 31:1) Kutambanga bya mulekese ne. Kechi mwafwainwa kwifwalama na muntu wabula mwinakwenu ne.
BYO MWAKONSHA KUBA:
Bantu bafwainwa kuyuka’mba mwi bakishinka ku benakwenu
Kechi mwafwainwa kuvulamako ku bibena kukeba benakwenu ne. Umvwe muntu ye mwisamba nanji ubena kulengela benakwenu kumvwa bibi ku muchima mwafwainwa kuleka